12/07/2020 10:04
728 x 90

“Amnesty İnternational”ın növbəti Azərbaycan qərəzi – Qarabağ separatçıları ilə gizli əlaqəsi olan təşkilatdan daha nə gözləmək olar...

Yadigar Məmmədli: “Sözügedən təşkilatın son bəyanatı növbəti qərəzli yanaşmanı özündə ehtiva edir”

img

“Amnesty İnternational” təşkilatının Azərbaycanda vəziyyətə həsr olunmuş yeni bəyanatı yayılıb. Bəyanatda qeyd olunur ki, guya Azərbaycan hakimiyyəti pandemiyadan sui-istifadə edərək müxalifətyönlü və vətəndaş fəallarına, müstəqil jurnalistlərə qarşı genişmiqyaslı təqib kampaniyasını davam etdirir. İddia edilir ki, indi də bu proses gedir.

“Amnesty İnternational”ın Cənubi Qafqaz üzrə tədqiqatçısı Natalya Nozadze iddia edir ki, guya hökumətin koronavirusa qarşı mübarizə tədbirlərini tənqid edənlər təqiblərə məruz qalır: “Amnesty İnternational” bildirir ki, Azərbaycan hakimiyyəti müxalifətyönlü və vətəndaş fəallarına, müstəqil jurnalistlərə qarşı  genişmiqyaslı təqib kampaniyasına başlamaq üçün COVİD-19  pandemiyasından istifadə edib. Hökumətin koronavirusa qarşı mübarizə tədbirlərini tənqid edənlər təqiblərə məruz qalır. COVİD-19-un Azərbaycan həbsxanalarında yayılması ilə bağlı artan narahatlıqlar fonunda ölkə hakimiyyəti nəinki siyasi motivlərlə həbs olunmuş məhbusların - azərbaycanlı həmkarlarımızın nüfuzlu rəyinə əsasən, onların sayı ən azı yüz nəfərdir - azad edilməsi məsələsini nəzərdən keçirmir, hətta əksinə, hakimiyyət pandemiyaya qarşı mübarizə bəhanəsilə daha çox tənqidçilərini dəmir barmaqlıq arxasına atır”.

Göründüyü kimi, başdan-ayağa iftira və qərəz xarakterli bəyanatdır. Zatən birinci dəfə deyil bu kimi təşkilatların Azərbaycana yönəlik belə qərəzli açıqlamalarının şahidi oluruq. Belə təşkilatlardan biri də "Human Rights Watch"dur. Bu günlərdə ABŞ-ın tanınmış “Newsweek” jurnalı sözügedən təşkilatın İsraillə Ermənistana fərq qoymasını, Ermənistanda baş verən pozuntuları görməzdən gəlməsini, Dağlıq Qarabağdakı separatçılara dəstək verməsini ifşa edib.

  • “Buna siyasi don geydirmək və prosesdən müxtəlif məqsədlər üçün istifadə etmək doğru deyil”

Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədlinin sözlərinə görə, “Amnesty İnternational”ın son bəyanatı növbəti qərəzli yanaşmanı özündə ehtiva edir: “Bundan qabaq insan haqlarından danışan bəzi beynəlxalq təşkilatlar oxşar qərəzli açıqlama ilə çıxış ediblər. Həmin təşkilatların hesabatlarında bir sıra ölkələrlə bağlı tənqidi fikirlər var. Ancaq Azərbaycana isə “xüsusi” yer ayırırlar. Bu da onların ölkəmizə qarşı qərəzli olmalarının əyani göstəricisidir. Belə təşkilatlardan biri də “Amnesty İnternational” təşkilatıdır. Nəzərə almaq lazımdır ki, pandemiya qlobal bir problemdir və bütün ölkələrə öz təsirini göstərir. Virusun mənfi təsirləri böyükdür. Mənfi təsiri təkcə insanların virusa yoluxmaları ilə ölçülmür. Bunun həm də iqtisadiyyata dağıdıcı təsiri var. Bu gün bir sıra ölkələrdə, o cümlədən Azərbaycanda insanları bu bəladan qorumaq üçün məhdudlaşdırıcı addımlar atılır. Ölkə səviyyəsində bir sıra işlər görülür ki, COVİD-19-a yoluxanların sayı çox olmasın. Azərbaycan, hətta bu məqsədlə bir sıra ölkələrə humanitar yardım edir. Son dövrlər Azərbaycanda karantin qaydalarının pozulmasına qarşı çox ciddi münasibət var. Kimliyindən asılı olmayaraq, karantin qaydalarını pozan şəxslərə qarşı qanun eyni qaydada tətbiq olunur. Bütün bunlar isə radikal müxalif düşüncəli insanları razı salmır. Onlar fikirləşirlər ki, xüsusi statusa malikdirlər. Ancaq bu belə deyil. Hamı qanun qarşısında bərabərdir. Buna siyasi don geydirmək və prosesdən müxtəlif məqsədlər üçün istifadə etmək doğru deyil. “Amnesty İnternational” və digər bu kimi təşkilatlar Azərbaycanı qaralamaqdan ötrü bundan sui-istifadə edirlər. Bu isə ədalətsiz yanaşmadır”.

Vidadi ORDAHALLI

Son xəbərlər