Cənubi Qafqazda Ermənistanın, ona bağlı qüvvələrin təkcə Azərbaycan yox, həm də regionun digər dövləti olan Gürcüstan üçün ciddi təhdid yaratdıqları birmənalı həqiqətdir. Hazırda ermənilərin Gürcüstan üçün hazırladığı düşmən ssenarisi iki istiqamətdən özünü göstərir. Bunlardan birincisi Gürcüstana qarşı olan ərazi iddilarıdır.
Məlumdur ki, ermənilər uzun müddətdən bəri Gürcüstanda Samtsxe-Cavaxetiya bölgəsini ələ keçirmək istiqamətində intensiv iş aparır. Bu xüsusda gürcü tərəfinin gördüyü qabaqlayıcı tədbirlər hələ də istənilən nəticəni vermir. Əvəzində ermənilərin daha bir istiqamətdə təhlükəli fəaliyyəti genişlənir. Söhbət Gürcüstanda yaşayan etnik azlıqlarla gürcü milləti arasında qarşıdurma yaratmaq səylərindən gedir. Ermənilərin bu istiqamətdə əsas fəaliyyəti hazırda Gürcüstan azərbaycanlıları ilə gürcülər arasında qarşıdurma yaradılması üzərində qurulub. Bu barədə danışmazdan öncə qeyd edək ki, Gürcüstanda əhalinin 83,8%-ini təşkil edən gürcülərdən əlavə digər böyük etnik qruplar da var. Bunların 6,5%-i azərbaycanlılar, 5,7%-i ermənilər, 1,5%-i ruslar, qalanları abxazlar, acarlar və osetinlərdir. Cənubi Qafqazın yerli sakinləri olmayan ermənilər XXI əsrdən etibarən, Qafqazın digər regionları ilə yanaşı, Gürcüstanda da məskunlaşdırılıb. O vaxtdan bəri ermənilər, Azərbaycan və Türkiyə ilə olduğu kimi Gürcüstan hesabına da "Böyük Ermənistan" yaratmaq iddiasındadırlar. Yuxarıda qeyd edildiyi kimi, onlar Gürcüstanın Samtsxe-Cavaxetiya bölgəsini öz əraziləri hesab edirlər. Eyni zamanda burada etnik zəmində qarşıdurma yaratmağa da çalışırlar. Bunu gürcü tərəfi özü də etiraf edir. Keşikçidağ ətrafında yaranan məlum durum fonunda bu hal özünü aydın göstərdi. Bu xüsusda ötən ayın əvvəlində Gürcüstanın Dövlət Təhlükəsizliyi Xidmətinin hesabatında maraqlı məqamlar qeydə alındı. Burada qeyd olunurdu:“Ötən il bəzi qruplar və fərdi şəxslər də daxil olmaqla, müxtəlif qüvvələr Keşikçidağ ətrafındakı hadisələrdə milli dəyərləri qorumaq adı altında iştirak ediblər”. Sənəddə bildirilirdi ki, Gürcüstan-Azərbaycan sərhədində vəziyyətin saxtalaşdırılması ilə dağıdıcı kampaniya aparılıb və bu kampaniya strateji tərəfdaşlıq əlaqələrinə malik iki ölkə arasında əlaqələrin zədələnməsi məqsədi güdüb:“Bölgədəki geosiyasi çətinliklər fonunda Gürcüstan Türkiyə, Ermənistan və Azərbaycanla qonşuluq münasibətlərini davam etdirir. Bununla belə, davam edən ikitərəfli münasibətlərə birbaşa və ya dolayı yolla müdaxilə və onların qəsdən zədələnməsi üçün davamlı cəhdlər mövcuddur. Gürcüstan etnik və dini müxtəlifliyə görə daim dözümsüzlük və separatizm təzahürlərinin eskalasiyası təhlükəsi altındadır. Məhz buna görə xarici ölkələrin xüsusi xidmət orqanları Gürcüstanın müəyyən bölgələrinə maraq göstərir. 2019-cu ildə Gürcüstanda ultrasağ düşüncəli qruplarla bağlı risqlər müəyyən edilib. Bu cür fikirlər davam edən qlobal böhran nəticəsində artan beynəlxalq miqrasiya prosesi ilə də bağlı olub”. Hesabatda vurğulanırdı ki, Gürcüstanın təhlükəsizliyi üçün önəmli problemlərdən biri də hibrid təhdidlərdir: “Gürcüstanda təsirə sahib olmaqda maraqlı ölkələr məqsədlərinə nail olmaq üçün “hibrid müharibə” alətlərini daha effektiv istifadə etmək məqsədilə cəmiyyətdə müxtəlif qrupları araşdırmağı davam etdiriblər”. Elə o vaxt aydın idi ki, söhbət burada əsas etibarı ilə ermənilərdən, Ermənistanın xüsusi xidmət orqanlarından gedir. Çünki məhz ermənilər gürcülərlə azərbaycanlıların arasında problemlərin olmasında xüsusi maraqlı tərəf kimi çıxış edir.
Bütün bunların ardınca indi yayılan yeni məlumatlar göstərir ki, bu istiqamətdə ermənilərin mənfur fəaliyyəti davam edir. Gürcüstanın Dövlət Təhlükəsizliyi Xidmətinin yaydığı yeni bəyanatdan da bunu aydın sezmək olar. Burada qeyd olunur ki, Gürcüstanın Kvemo Kartli və Kaxeti bölgələrində etnik gürcülər və azərbaycanlılar arasında qarşıdurmanı alovlandırmağa cəhd edən bir neçə qrup və bir sıra vətəndaşlar var. Həmin şəxslər etnik azərbaycanlıların sıx yaşadığı bölgələrdə illər ərzində toplanmış problemlərdən təhrif olunmuş vətənpərvərlik düşüncələrinə əsaslanaraq mənfi kontekstdə istifadə edirlər. Sənəddə deyilir ki, həmin insanlar milli zəmində münaqişə yaratmaq məqsədilə Kvemo Kartli və Kaxeti bölgələrində dövlət və hökumətin səlahiyyətlərinə aid olan məsələlərlə məşğul olurlar. Bildirilir ki, bu istiqamətdə yalan və aqressiv çağırışlar yaymaqla bir qrup şəxs etnik gürcü və azərbaycanlı vətəndaşlar arasında gərginlik yaratmağa çalışır, milli şərəf və ləyaqətə xələl gətirən ifadələr və hərəkətlərə yol verir. Bununla da insan hüquqlarının kobud şəkildə pozulması baş verir. Bir qrup insan vəziyyəti açıq şəkildə elə təqdim etməyə çalışır ki, guya etnik gürcü əhali Gürcüstandakı digər etnik azlıqlardan üstündür. Bu da milli qarşıdurma risqini daha da artırır. DTX-nin Dövlət Təhlükəsizliyi Departamenti irqi ayrıseçkilik, insan haqlarının birbaşa və ya dolayı şəkildə məhdudlaşdırılması, milli zəmində düşmənçilik və diskriminasiya, milli şərəf və ləyaqətin alçaldılması maddələri üzrə istintaqa başlayıb. Gürcüstanın Dövlət Təhlükəsizliyi Xidməti günahkarların kimliyini açıqlamasa da, məlumdur ki, söhbət burada əsas etibarı ilə məhz ermənilərdən gedir. Məsələ burasındadır ki, rəsmi Gürcüstan hökuməti Ermənistanla diplomatik səviyyədə normal münasibətlər saxlamağa çalışdığı üçün baş verənlərin arxasında ermənilərin dayandığını birbaşa bəyan etmir. Lakin gürcü xalqı arasında ermənilərə mənfi münasibət var. Gürcüstanda yaşayan yerli ermənilərin ərazi iddiları, həm də Rusiyayönümlü olduqları üçün gürcü cəmiyyətində onlara qarşı münasibət olduqca neqativdir. Indi ermənilərin burada etnik azərbaycanlılarla gürcülər arasında qarşıdurma yaratmaq niyyəti onlara qarşı nifrəti daha da artırır.
Nahid SALAYEV
