12/07/2020 10:09
728 x 90

Ermənilərin yeni versiyaları - Ramil Səfərovun ekstradisiyasında İlham Rəhimovun vasitəçiliyi və 2012-ci ildə prezident Sarkisyanın Ramil Səfərovla bağlı son tapşırığı...

img

Azərbaycan Ordusunun zabiti Ramil Səfərovla bağlı adi prosedur qaydasında Avropa Məhkəməsinə ermənilərin etdikləri şikayətlə əlaqəli yekun qərarın verilməsi erməni KİV-ni yenidən bu mövzu ətrafında yersiz manipulyasiyalar etməyə həvəsləndirib.

Onların iddiasına görə, guya bu işdə maddi amil vacib rol oynayıb və Azərbaycan zabitimizi pulun gücü ilə ekstradisiya etdirib. Onların versiyasına əsasən, bu işdə “vasitəçiliyi”, yəni “dillerlik” rolunu Putinin tələbə yoldaşı kimi tanınan, Azərbaycan əsilli milyarder İlham Rəhimov edib. Sitat: “Bu hadisə 2012-ci ildə danışıqlarda masada olan Kazan prosesinin iflasa uğraması ilə nəticələndi... Hətta həmin ildə keçirilən Təhlükəsizlik Şurasının iclasında prezident Sarkisyan milli təhlükəsizlik naziri Qorik Akopyana üzünü tutaraq, “bununla bağlı sizə xüsusi tapşırıq olacaq” demişdi. Qorik Akopyan 2016-cı ildə vəzifəsindən çıxarılıb, 2017-ci ildə isə xəstəlikdən ölüb. Bəs həmin xüsusi tapşırığın taleyi necə oldu?”.

Göründüyü kimi, ermənilər öz xislətlərinə uyğun olaraq Ramil Səfərovla bağlı prosesdə iftiralara yol verirlər.  Bu işdə milyarder İlham Rəhimovun adının “diller” kimi hallanmasına münasibət öyrənmək üçün iş adamı ilə əlaqə saxlamağa cəhd etdik, ancaq niyyətimiz alınmadı. Buna baxmayaraq, biz araşdırdıq ki, İlham Rəhimov məhz Ramil Səfərovun Azərbaycana ekstradisiya olunduğu ildə yerli mətbuata müsahibə verib və sözügedən prosesdə rolunun nədən ibarət olduğuna aydınlıq gətirib. Sitat: “Mətbuatda da bu haqda getmişdi, Ramil Səfərov məsələsi ilə bağlı hələ bir neçə il öncə həbsxanada onun yanında olmuşdum. Sonra mediaya bu haqda qısa xəbər verdim, amma görülən işlər, nə etmək istədiyimiz barədə heç nə danışmamışdıq; bu o zaman doğru deyildi. İctimaiyyət də bilirdi ki, bu işlə məşğulam. Bu prosesin içərisində olduğum üçün məsələnin mahiyyəti və detalları barədə bilgiliyəm. O zaman bunları gizli saxlamalı idik, indi daha bunları açıb söyləmək olar. Mən bu işlə birbaşa cənab Prezident İlham Əliyevin tapşırığı və razılığı ilə məşğul olurdum. Yəni mən bu məsələnin hüquqi həll mexanizmlərini araşdırırdım. Bu məsələ ilə bir vətəndaş və bir hüquqşünas, Beynəlxalq Hüquqşünaslar İttifaqının vitse-prezidenti kimi məşğul olmağı özümə borc bilirdim. Ramil Səfərov məsələsini dərindən bilmək üçün gərək gedib Macarıstandakı hüquqşünaslarla diskussiya aparmaq, Ramilin özü ilə söhbət etmək, xüsusilə cinayət işi ilə tanış olmaq lazım idi. Cinayət işini oxumayana qədər hansısa nəticəyə gəlmək, həqiqəti, çıxış yollarını bilmək çətin idi. Bu prosedurları keçəndən sonra Macarıstandakı rəsmilərə sübut etməyə çalışdım ki, birincisi, Ramil Səfərova verilən cəza törətdiyi cinayətə uyğun gəlmir, həddindən artıq yüksəkdir, ağırdır. Düzdür, hakim hökm verəndə daxili inamını da nəzərə alır, amma mən onlara bildirdim ki, Ramil Səfərova hökm çıxararkən, cəza verərkən yalnız ağırlaşdırıcı halları nəzərə alıb, amma onun işi ilə bağlı yüngülləşdirici halları nəzərə almayıb. Bu dəqiq belə idi”.

Göründüyü kimi, hüquqşünas olan iş adamı bu işlə maraqlandığını, hətta Ramil Səfərovla həbsxanada görüşdüyünü də etiraf edir. O, qeyd edir ki, bu işlə əsasən bir hüquq professoru olaraq maraqlanıb və zabitimizin azad olunması istiqamətində hüquqi vasitələrin axtarılmasına çalışıb. Aydındır ki, burada hər hansı bir sövdələşmədən söhbət belə gedə bilməz.

Ramil Səfərovla bağlı həyata keçirilən ekstradisiya və onun əfv olunmasının qanuniliyinə toxunan hüquqşünas Mehman Muradlı “Bakı-Xəbər”ə açıqlamasında bildirdi ki, ekstradisiya olunduqdan sonra Ramil Səfərova qarşı atılan addımların ədalətsiz olduğu nəzərə alınıb və Prezident tərəfindən əfv olunub: “Beynəlxalq qanunlar var, beynəlxalq hüquq var. Həbs olunan şəxslərin bu və ya digər ölkədən öz dövlətlərinə, vətəndaşlıqlarını daşıdıqları ölkəyə köçürülməsi, ekstradisiyası qaydaları mövcuddur. Həmin qaydalara görə, ekstradisiya olunan məhbus həmin ölkəyə qədəm qoyduqda o ölkənin qanunları çərçivəsində məhbus kimi sayılır. Azərbaycan qanunlarına görə də ölkə başçısı kimi Prezident ölkədə əfv etmək səlahiyyətinə malikdir. Ramil Səfərov da Azərbaycan vətəndaşı olaraq ölkəyə qədəm qoyduğu andan dövlətin qanunları ona şamil olunurdu. Prezident də buna görə onu əfv etdi. Əfv etməsəydi, o zaman Ramil Səfərov başqa variantla Azərbaycan həbsxanalarına göndərilməliydi. Amma onu Azərbaycanda həbsxanaya göndərmək erməni fitnəkarlığına haqq qazandırmaq, erməni vəhşiliklərinin, ermənilərin törətdikləri cinayətlərin unudulması demək olardı.

Ramil Səfərovun ekstradisiyası və əfv olunması cənab Prezidentin qətiyyətli siyasətinin və Azərbaycan Ordusuna, zabitinə, vətənpərvər övladımıza diqqət və qayğısının nəticəsidir. Ölkə başçısı bu addımı atarkən yalnız və yalnız Azərbaycanın milli, dövlət marağını, eyni zamanda da Ermənistanla müharibə şəraitində olduğu bir zamanda ölkənin qətiyyətli mövqeyini ortaya qoyub. Sarkisyanın həmin vaxt öz təhlükəsizlik nazirinə guya hansısa tapşırığı verəcəyi ilə bağlı dediklərinə şou adı vermək olar. Belə təəssürat yaratmağa çalışıb ki, guya onlar da bunun qisasını başqa cür almağa hazırlaşırlar. Ancaq bu müddət ərzində gördük ki, heç nə baş vermədi. Deməli, blef olub”.

Məhəmmədli QƏRİBLİ

Son xəbərlər