Prezident İlham Əliyev Bakıda məcburi köçkünlər üçün salınmış “Qobu Park-3” yaşayış kompleksinin açılışından sonra məcburi köçkünlərlə görüşündə çıxışı zamanı bildirdi ki, məcburi köçkünlərin problemləri ardıcıl şəkildə öz həllini tapır.
Ölkə başçısının sözlərinə görə, son 4-5 il ərzində neftin qiyməti bir neçə dəfə kəskin düşsə də, məcburi köçkünlərlə bağlı olan layihələrdə heç bir yubanma yoxdur: “Heç bir proqramın ixtisarı nəzərdə tutulmur. Keçən il məcburi köçkünlər üçün rekord sayda evlər-mənzillər tikildi – 5 minə yaxın. Bu il qarşıya hədəf qoyulub ki, 7 min, bəlkə də 8 min məcburi köçkün ailəsi evlərlə, mənzillərlə təmin edilsin. Əgər biz buna nail olsaq, bir il ərzində həm Bakı şəhərində, Sumqayıt şəhərində və digər şəhərlərdə təqribən 40 minə yaxın insan yeni evlərə köçürüləcək. Bu işlər ardıcıllıqla aparılır”.
Prezident onu da qeyd edib ki, indi dünyada bir neçə ölkədə məcburi köçkünlər var və bu ölkələrin sayı artır: “Çünki müharibələr, toqquşmalar geniş vüsət alır, yeni köçkün şəhərcikləri salınır. Ancaq hesab edirəm ki, Azərbaycanda bu sahəyə göstərilən diqqət nümunəvi xarakter daşıyır, beynəlxalq təşkilatlar da bunu dəfələrlə təsdiqləyiblər. Çünki biz köçkünləri belə gözəl evlərlə təmin edirik. Evlərin həm quruluşu, həm daxili dizaynı, təchizatı göz oxşayır. Azərbaycan bu sahədə də qabaqcıl yerlərdədir”.
Belə baxanda bir sıra postsovet ölkələrində də qaçqın və məcburi köçkün problemi var. Ancaq həmin ölkələrin heç birində məcburi köçkünlərin mənzil şəraitinin yaxşılaşdırılması Azərbaycandakı qədər yüksək səviyyədə deyil. Həmin ölkələrdə sözügedən məsələ ilə bağlı bir sıra problemlər var.
“Azərbaycanda isə bu kateqoriyadan olan vətəndaşlar həm mənzillə təmin edilir, həm də onlar digər sosial imtiyazlardan istifadə edirlər”
Sözügedən məsələ ilə bağlı fikirlərini baki-xeber.com-la bölüşən iqtisadçı-alim Əli Əlirzayevin sözlərinə görə, Azərbaycanda qaçqın və məcburi köçkünlərin mənzil şəraitinin yaxşılaşdırılması müqayisəolunmaz dərəcədə yüksək səviyyədədir: “Hansı ki, digər postsovert ölkələri ilə müqayisədə Azərbaycanda olan qaçqın və məcburi köçkünlərin sayı daha çoxdur. Bu problemdən əziyyət çəkən əksər ölkədə qaçqın-köçkünlərə dövlət tərəfindən ev verilmir. Azərbaycanda isə bu kateqoriyadan olan vətəndaşlar həm mənzillə təmin edilir, həm də onlar digər sosial imtiyazlardan istifadə edirlər. Məcburi köçkünlərin övladları dövlət vəsaiti hesabına ali təhsil alırlar. Dövlətdən kommunal xərclərlə bağlı subsidiyalar alırlar və s. Bu baxımdan, Azərbaycanda olan model dünyanın heç bir ölkəsində yoxdur. Hesab edirəm ki, bu çox yaxşı haldır. Azərbaycan bu nöqteyi-nəzərdən çox humanist ölkədir”.
Vidadi ORDAHALLI
