Məlum olduğu kimi, mayın 28-də Bakının Qaradağ rayonunda məcburi köçkünlər üçün salınmış “Qobu Park-3” yaşayış kompleksinin açılışı olub.
Açılış mərasimində çıxış edən Prezident İlham Əliyev Dağlıq Qarabağ problemi ilə bağlı danışıqlar prosesindən danışıb və qeyd edib ki, münaqişənin həllinə nail olmaq üçün işlər davam etdirilir. “...Dağlıq Qarabağ probleminin həlli tarixi məsələdir və biz bu məsələni birdəfəlik və tam həll etməliyik. Azərbaycanın ərazi bütövlüyü tam bərpa olunmalıdır. Bu gün müzakirə edilən və danışıqlar masasında olan məhz mərhələli həlldir. Baxmayaraq ki, Ermənistanın rəhbərliyi öz rəsmi populist çıxışlarında bunu inkar etməyə çalışır, ancaq mahiyyət etibarilə danışıqlar çərçivəsində həmin bu mərhələli həll məsələsi müzakirə edilir. Burada da riyakarlıq edir, öz xalqını aldadır, vasitəçiləri aldatmaq istəyir. Mərhələli həlldən başqa heç bir həll mümkün deyil, o da nə deməkdir? Birinci mərhələdə torpaqların bir hissəsi işğaldan azad olunur. Bundan başqa variant ola bilməz. Amma mənim dediyim söz odur ki, bu, ancaq mərhələli yanaşma ola bilər. Bizim məqsədimiz, əsas amalımız suverenliyimizi tam və birdəfəlik təmin etməkdir və biz bunu edəcəyik. Heç kimdə şübhə olmasın. Sadəcə, daha güclü olmalıyıq, məsələnin həlli üçün vaxtı və geosiyasi vəziyyəti düzgün qiymətləndirməliyik” - deyə Prezident İlham Əliyev qeyd edib.
Prezident İlham Əliyev, həmişə olduğu kimi, bu dəfə də Paşinyanın yalanlarını ifşa etdi. Yəni Prezident dedi ki, hazırda ancaq Qarabağ probleminin mərhələli həlli müzakirə edilir və problemin mərhələli həllindən başqa variant yoxdur. Halbuki, Pasinyan isə iddia etmişdi ki, guya danışıqlarda heç bir sənəd müzakirə olunmur. Amma, gördüyümüz kimi, Prezident Paşinyanın yalanını növbəti dəfə ifşa etdi.
“Paşinyan da bu suallar qarşısında çaş-baş qaldığından, tez bir yalan uydurub açıqlama verdi ki, burada tamam başqa məsələ müzakirə edilir”
Məsələyə münasibət bildirən Qarabağ Azadlıq Təşkilatının (QAT) sədri Akif Nağı baki-xeber.com-a bildirdi ki, Ermənistan tərəfi, həmişə olduğu kimi, problemin həllinə dair məsələlərdə çaşdırıcı mövqe tutmağa cəhd edir, Azərbaycan isə hər dəfə onların iç üzünü açır. “Dağlıq Qarabap probleminin mərhələli həlli məsələsi gündəmdədir. Problemin bu şəkildə həll edilməsinə dair müzakirənin Rusiyanın Xarici İşlər naziri Sergey Lavrov tərəfindən gündəmə gətirildiyi məlumdur. Ermənistan tərəfindən isə yalnız bu ölkənin Xarici İşlər naziri Zöhrab Mnasakanyan boş, mənasız açıqlama verərək qeyd etdi ki, burada bu məsələ müzakirə olunmur, təhlükəsizlik məsələsi çözülür. Paşinyan uzun müddət susdu. Amma bu məsələ ilə bağlı Paşinyana müxalifət təmsilçiləri və digər şəxslər tərəfindən suallar ünvanlandı ki, Lavrov problemin mərhələli həllinə dair müzakirələr aparıldığını deyir, sən isə susursan. Onlar Paşinyana deyirlər ki, problem mərhələli variantda həll olunursa, onda sənin 2 illik fəaliyyətin sıfıra bərabər olub. Yəni Ermənistanda Paşinyana qarşı bu cür ittihamlar səsləndirilir. Bu o deməkdir ki, Dağlıq Qarabağ münaqişəsinin həlli ilə bağlı Azərbaycanın istədiyi variant müzakirə olunur. Paşinyan da bu suallar qarşısında çaş-baş qaldığından, tez bir yalan uydurub açıqlama verdi ki, burada tamam başqa məsələ müzakirə edilir. Prezident İlham Əliyevin iştirakı ilə məcburi köçkünlər üçün “Qobu Park-3” yaşayış kompleksinin açılışında ölkə başçısı bu məsələyə xüsusi toxundu və buna konkret şəkildə aydınlıq gətirdi, bir çox məsələyə dəqiq cavab verdi. Birincisi, diqqətçəkən məqam ondan ibarət oldu ki, Dağlıq Qarabağ problemi Azərbaycanın ərazi bütövlüyü çərçivəsində öz həllini tapacaq və Azərbaycanın ərazi bütövlüyü bərpa ediləcək, bunun üçün də Prezident güc amilini, ordumuzu xüsusi olaraq vurğuladı. O qeyd etdi ki, Azərbaycanın ərazi bütövlüyünün bərpa edilməsi üçün bir sıra amillər var, biz o amillərə əsaslanırıq və o amillərdən də birincisi Azərbaycan Ordusunun gücüdür”.
QAT sədri bildirdi ki, Prezident Azərbaycan Ordusunun gücü ilə torpaqlarımızın işğaldan azad olunmasını birmənalı şəkildə ön plana keçirdi. “Eyni zamanda da problemin mərhələli variantda həlli məsələsini vurğuladı və qeyd etdi ki, hazırda bu variant müzakirə olunur, Azərbaycan torpaqlarının bir hissəsi ilk mərhələdə, digər hissələri isə sonrakı mərhələlərdə azad olunacaq. Hesab edirəm ki, Azərbaycan dövlətinin mövqeyi dövlət başçısı səviyyəsində konkret olaraq ortaya qoyuldu və o istiqamətdə atılacaq addımlarla bağlı anons verildi. Fikrimcə, bu cəhətdən Prezidentin açıqlaması müsbət dəyərləndirilməlidir.
21 mayda ermənilərin Şuşada keçirdiyi “inauqurasiya mərasimi” Azərbaycan cəmiyyətinə çox mənfi təsir göstərib, insanların içində qəzəb kükrədi. Bu məsələyə də cənab Prezident aydınlıq gətirdi ki, torpaqlarımız hökmən işğaldan azad olunacaq. Yəni ermənilərin boş-mənasız, saxta və yalançı təbliğatlarına baxmayaraq, torpaqlarımız işğaldan azad ediləcək. Prezident, həmçinin, xüsusi olaraq vurğuladı ki, Dağlıq Qarabağ Azərbaycanın tarixi torpağıdır, Azərbaycanın haqqı, hüququ, suveren hüquqları bütün ərazilərdə, o cümlədən də Dağlıq Qarabağda bərpa olunacaq” - deyə A.Nağı qeyd etdi.
İradə SARIYEVA
