Prezident İlham Əliyev Bakıda məcburi köçkünlər üçün salınmış “Qobu Park-3” yaşayış kompleksinin açılışından sonra məcburi köçkünlərlə görüşündə çıxışı zamanı deyib ki, Dağlıq Qarabağ probleminin həlli ilə bağlı geosiyasi vəziyyətin düzgün qiymətləndirilməsi vacibdir:
“…Bu gün biz elə bir qüdrətli ordu yaratmışıq ki, istənilən vəzifəni icra edə bilərik. Əlbəttə ki, sadaladığım bütün bu müsbət amillər, eyni zamanda, demoqrafik vəziyyət bizim üstünlüyümüzü bundan sonra da təmin edəcək. Dağlıq Qarabağ probleminin həlli tarixi məsələdir və biz bu məsələni birdəfəlik və tam həll etməliyik. Azərbaycanın ərazi bütövlüyü tam bərpa olunmalıdır. Bu gün müzakirə edilən və danışıqlar masasında olan məhz mərhələli həldir. Baxmayaraq ki, Ermənistan rəhbərliyi öz rəsmi populist çıxışlarında bunu inkar etməyə çalışır, ancaq mahiyyət etibarilə danışıqlar çərçivəsində həmin bu mərhələli həll məsələsi müzakirə edilir. Burada da riyakarlıq edir, öz xalqını aldadır, vasitəçiləri aldatmaq istəyir. Mərhələli həldən başqa heç bir həll mümkün deyil, o da nə deməkdir? Birinci mərhələdə torpaqların bir hissəsi işğaldan azad olunur. Bundan başqa variant ola bilməz. Amma mənim dediyim söz odur ki, bu ancaq mərhələli yanaşma ola bilər. Bizim məqsədimiz, əsas amalımız suverenliyimizi tam və birdəfəlik təmin etməkdir və biz bunu edəcəyik. Heç kimdə şübhə olmasın. Sadəcə, daha güclü olmalıyıq, məsələnin həlli üçün vaxtı və geosiyasi vəziyyəti düzgün qiymətləndirməliyik. Mənim fikrim budur və bilirəm ki, Azərbaycan xalqı mənim mövqeyimi dəstəkləyir. Mən bunu dəfələrlə bildirmişəm və bir daha demək istəyirəm ki, Dağlıq Qarabağ məsələsi ancaq ölkəmizin ərazi bütövlüyü çərçivəsində öz həllini tapa bilər. Bir daha demək istəyirəm ki, Dağlıq Qarabağ Azərbaycandır və nida işarəsi".
Prezident geosiyasi vəziyyətin düzgün qiymətləndirilməsi deyəndə nəyi nəzərdə tutur?
“Azərbaycan hazırda əli tətikdə, hədəfində isə Qarabağın azadlığıdır”
“Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, Qarabağ problemini zamanın geosiyasi vəziyyəti ortaya çıxarıb: “SSRİ –nin dağılması nəticəsində dünyada yeni geosiyasi vəziyyət yarandı. Həmin ölkənin Avropadakı bufer zonaları əldən çıxdı. İkinci mərhələdə isə həmin ölkənin daxilində milli münaqişələr yaranmağa, daha doğrusu, yaradılmağa başladı. Həmin proseslərin nəticəsində bizə də Dağlıq Qarabağ konflikti miras qaldı. Biz ötən əsrin əvvəlində də bənzər vəziyyətlə üzləşmişik. Yeni qurulan hökümətimiz məcbur oldu ki, İrəvan xanlığının yerində Ermənistan Respublikasının yaradılmasına şərait yaratsın. Ötən əsrin sonunda yenə həmin proses oldu. Ancaq bu dəfə Azərbaycan xalqı dirəniş göstərə bildi. Belə bir məqamda Heydər Əliyevin Azərbaycanda yenidən hakimiyyətə gəlməsi bir sıra məslələrin həllini təmin etdi. Biz əvvəlcə müstəqilliyimizin təməlini möhkəm etdik, sonra isə ordu quruculuğuna start verdik. Amma Qarabağ problemi qlobal mahiyyət daşıdığı üçün hələlik müəyyən maraqlı tərəflər ermənilərdən bəyrələnə bilir. Bu səbəbdən də ölkə başçısı problemin həllində geosiyasi proseslərin roluna diqqəti yönəldir. Konkret zaman söyləmək çətindir. Ancaq proseslərin gedişi vəziyyətin Azərbaycanın xeyrinə olduğunu göstərir. Artıq ölkəmiz dünyada söz sahibi olan ölkə kimi qəbul olunur. Azərbaycanın beynəlxalq əməkdaşlığı da yüksək səviyyədədir. Hüquqi cəhətdən də bizim əlimizdə əsaslar var ki, öz torpaqlarımızı azad edək. De-yure Qarabağ Azərbaycanındır. De-fakto isə onu əldə etmək üçün uyğun zamanı seçib hərəkətə keçmək lazımdır. Prezident çıxışlarında dəfələrlə bildirib ki, bu məsələdə Azərbaycan öz mövqeyindən zərrə qədər də geri çəkilməyəcək. Hamı bilir ki, uyğun vaxt yetişən kimi biz problemi həll edəcəyik. Azərbaycan hazırda əli tətikdə, hədəfində isə Qarabağın azadlığıdır. Biz istəmirik ki, atdığımız atəş boşa getsin və ya başqa hədəfə dəysin. İstəyimizə tam çatmaq üçün beynəlxalq vəziyyəti düzgün qiymətləndirməliyik. Bunun üçün də cənab İlham Əliyevin yetərli siyasi təcrübəsi var. Azərbaycan regionla bağlı gedən siyasi proseslərdən kənarda deyil, əksinə, aktiv oyunçudur. Yəni biz uyğun zamanı gözləyirik. Hesab edirəm ki, postpandemiya dönəmində Azərbaycan daha uğurlu imkanlar əldə edəcək. Yeni geosiyasi vəziyyət deyəndə bunu da nəzərə almaq olar”.
Məhəmmədəli QƏRİBLİ
