Azərbaycanın ayrılmaz tərkib hissəsi olan Dağlıq Qarabağla bağlı həqiqətlərin beynəlxalq mediada işıqlandırılması bir ənənə halı almaqdadır. Bununla yanaşı, bu günlərdə qondarma “DQR” rejiminin keçirdiyi saxta, qanunsuz seçkilərə qarşı da dünya dövlətləri sərt mövqe tutur və bunu tanımadıqlarını bəyan etməyə başlayıblar.
Beynəlxalq mediada Azərbaycanın xeyrinə məqalənin çap edilməsi və Almaniyanın Xarici İşlər Nazirliyinin “anti-Artsax” çağırışları ermənilərin kürkünə əməlli-başlı birə salıb, hər iki olay Ermənistanın ciddi narahatlığına səbəb olub.
Qeyd edək ki, Ermənistan sözügedən məsələni parlamentin müzakirəsinə çıxarıb. Fraksiyalardan birinin üzvü Tarun Simonyan çıxışında Azərbaycanın beynəlxalq arenadakı fəaliyyətindən danışıb və bildirib ki, Azərbaycanın beynəlxalq müstəvidə təbliğatı güclənib. Azərbaycanın beynəlxalq mətbuata çıxış baxımından Ermənistanı üstələdiyini deyən deputat qeyd edib ki, dünya mətbuatı Azərbaycanla bağlı təbliğat materialları yayır. Almaniya mətbuatında Almaniya vətəndaşlarının qondarma “DQR”ə getməməsi və qaydaları pozaraq ora gedən vətəndaşların cinayət məsuliyyətinə cəlb ediləcəyi ilə bağlı çağırış da Ermənistanı bərk narahat edir. Ermənistanın Xarici İşlər naziri Mnasakanyan isə Azərbaycanın beynəlxalq aləmdə təbliğatının gücləndiyini təsdiq edərək deyib ki, bu, yenilik deyil və bu halla tez-tez qarşılaşırlar.
“Bu da Ermənistanı narahat edən amillərdən biridir”
“Xalq Cəbhəsi” qəzetinin baş redaktoru, tanınmış politoloq Elçin Mirzəbəyli baki-xeber.com-a bildirdi ki, Azərbaycanın beynəlxalq mətbuatda təbliğatının genişlənməsi və Almaniya XİN-in çağırışları müsbət haldır. “Mən xüsusi olaraq Almaniya Xarici İşlər Nazirliyinin çağırışına diqqət yetirmək istəyirəm. Ermənistanın narahatlığının əsas səbəblərindən biri Almaniya kimi bir dövlətin Xarici İşlər Nazirliyinin çağırışının presedent xarakteri rolunu oynamasıdır. Ermənistanın siyasi rəhbərliyi həm daxildən diqqəti yayındırmaq, həm də Azərbaycanın işğal altında olan ərazilərində yerləşdirilən erməniləri sakitləşdirmək üçün, mütəmadi olaraq, guya qondarma “DQR”in tanınması və onun hansısa qurumlarının xaricdə fəaliyyət göstərməsi ilə bağlı bir görüntü yaratmağa cəhd göstərir. Bu cəhdlərin də son dövrlərdə ciddi iflasa uğradığının şahidi oluruq. Almaniya XİN-in çağırışı da, Almaniyada bununla bağlı atılan addımlar da, birmənalı şəkildə, Ermənistanın bu istiqamətdə apardığı təbliğatın üzərindən xətt çəkir və ciddi presedent yaradır”.
E.Mirzəbəyli vurğuladı ki, bu aspektdən də Ermənistan baş verən hadisələrdən ciddi narahatlıqlar keçirir. Son dövrlərdə Azərbaycanın pandemiya şəraitində beynəlxalq aləmdə nümayiş etdirdiyi fəallıq və beynəlxalq təşkilatların, nüfuzlu dövlətlərin ölkəmizin çağırışlarına səs verməsi məsələsi də çox güman ki, Ermənistanı özündən çıxarır: “Bu da Ermənistanı narahat edən amillərdən biridir. Düşünürəm ki, həm Almaniya XİN-in çağırışları, həm də bu istiqamətdə son dövrlər əldə olunan nəticələr Ermənistanın manevr etmək imkanlarını kifayət qədər məhdudlaşdıracaq”.
İradə SARIYEVA
