ABŞ-ın tanınmış “Newsweek” jurnalında “Koronavirus, korrupsiya və idrakın ziddiyyətli ikiləşməsi QHT məkanına necə təsir göstərir?” adlı məqalə dərc edilib. Məqalədə insan haqlarını müdafiə edən bəzi qrupların İsraili tənqid etdiyi halda, digər dövlətlər tərəfindən törədilən cinayətlərə göz yumulduğu qeyd olunur.
Məqalə müəllifi, Haym Solomon Mərkəzinin prezidenti və icraçı direktoru Paul Miller yazır ki, insan haqlarını müdafiə edən bəzi qruplar İsraili tənqid etdiyi halda, digər dövlətlər tərəfindən törədilən cinayətlərə göz yumurlar. Bu xüsusda Ermənistan nümunəsi göstərilir. İsraildən fərqli olaraq, Ermənistanın qeyri-hökumət təşkilatları (QHT) aləmində sevilən bir dövlət olduğu qeyd edilir. Belə ki, “Human Rights Watch” adlı QHT-nin Yaxın Şərq və Şimali Afrika bölməsinin sabiq direktoru və hazırda “Quincy” İnstitutunun araşdırma üzrə icraçı direktoru Sarah Lea Vitson kimi şəxslərin bariz nümunəsində İsrail kəskin tənqid edildiyi halda, Ermənitan-Azərbaycan münaqişəsi kimi digər on illərlə davam edən münaqişələrə biganə yanaşmanın nümayiş etdirildiyi vurğulanır.
Müəllif məqalədə Ermənistan tərəfindən işğal edilmiş Dağlıq Qarabağ bölgəsində həyata keçirilən qanunsuz fəaliyyəti, bu ərazilərin BMT-nin Təhlükəsizlik Şurası tərəfindən qəbul edilmiş məlum qətnamələrdə Azərbaycanın ərazisi kimi təsdiq edildiyini, həmçinin, bu ərazilərdə həyata keçirilən qanunsuz infrastruktur tikintilərini və buna Sarah Vitson tərəfindən laqeyd yanaşıldığının açıq-aşkar göründüyünü vurğulayır. "Human Rights Watch"un bu nümayəndəsinin hələ 2018-ci ildə Erməni Milli Komitəsi üçün maliyyə yardımının toplanması məqsədilə təşəbbüslə çıxış etdiyi və beləliklə də bu komitənin əsas fəaliyyətinin işğal altında olan Dağlıq Qarabağ bölgəsinin Ermənistanın tərkib hissəsi kimi təşviqinə xidmət etdiyi qeyd olunur.
Beləliklə də Sarah Vitson və onun kimilərin insan haqları adı altında açıq şəkildə Azərbaycanın Dağlıq Qarabağ bölgəsinin Ermənistan tərəfindən işğalına uzunmüddətli dəstəyini görməzdən gəldiyi qeyd olunur.
Məqalədə bu cür riyakar münasibət Sarah Vitson ilə məhdudlaşmır, bir sıra “Rockeffeller Brothers Fund”, “Foundation for Defence of Democracies” kimi digər QHT-lərin də oxşar mövqedən çıxış etdikləri qeyd edilir.
“...erməni lobbisinin əlində alət rolunu oynayır”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, sözügedən məqalə insan haqları adından danışan "Human Rights Watch" təşkilatının iç üzünü ortaya çıxarıb: “Zatən, biz zaman-zaman bəyan etmişik ki, insan hüquqları adından danışan bu təşkilat müəyyən dairələrin əlində bir təsir vasitəsidir. “Human Rights Watch” insan hüquqlarının qorunması məsələsində səmimi olsaydı, o zaman Ermənistanda baş verən ciddi pozuntulara kəskin reaksiya verərdi. Ancaq bu təşkilat ikili prinsiplərdən çıxış edərək Ermənistanda baş verən pozuntuları görməzdən gəlir. Dəfələrlə bunu bəyan etməyimizə rəğmən, beynəlxalq ictimaiyyət bunu görməzdən gəldi. Bəs sözügedən məqalədə öz əksini tapan faktlara nə deyirlər? Bu, bir daha əyani şəkildə sübut edir ki, “Human Rights Watch” erməni lobbisinin əlində alət rolunu oynayır. Bunlar ermənilərə qulluq etməklə onların məkrli siyasətinə dəstək verirlər. Bu kimi təşkilatların məqsədi, məramı insan hüquqlarını qorumaq yox, insan hüquqları adı altında çirkin kampaniya ilə məşğul olmaqdır. O üzdən, bu təşkilatlar hansısa qurumun əlində alət rolunu oynayan təşkilat adlandırılsa daha doğru olar. Riyakarlığın dərəcəsinə bax ki, beynəlxalq hüquqa zidd olaraq, bu təşkilatlar separatçılara dəstək verirlər. Hesab edirəm ki, bu təşkilatların çirkin əməlləri bundan sonra da ifşa edilməlidir”.
Vidadi ORDAHALLI
