Erməni mediası yazır ki, Baş nazir Nikol Paşinyan və onun komandasının uğursuzluqları hər gün artır. Ermənistan cəmiyyətində və siyasi dairələrdə Paşinyanın fəaliyyətindən narazılıq genişlənir. Hakimiyyətin və şəxsən Baş nazir Nikol Paşinyanın Ermənistan daxilində reytinqi, ilk növbədə, koronavirusla bağlı problemlər fonunda düşür.
Mayın 10-dan sonra ermənilərin hökumət başçısına inamının getdikcə azaldığını deməyə yeni səbəblər yaranıb. Son nümunə kimi, Ermənistanın səhiyyə naziri Torosyanın fikirləri əsas gətirilir. O, ölkənin acınacaqlı durumunu koronavirusla izah etməyə çalışaraq, Gürcüstandakı həmkarlarını statistik göstəriciləri saxtalaşdırmaqda ittiham edib. Gürcüstanda pandemiya yox olmaqdadır, hər gün orada ondan az koronavirus xəstəsi aşkar edilir. Torosyanın sözləri Ermənistan-Gürcüstan münasibətlərində yeni gərginlik yaradıb. O da məlum olub ki, Ermənistanda xəstəxanalarda ehtiyat yataq yerləri tükənib və yeni koronavirus xəstələrinin yaşadıqları yerlərdə müalicə olunması lazım gələcək.
Erməni mediası yazır ki, Paşinyan koronavirusla əlaqədar qeyri-ciddi açıqlamaları ilə özünü gülünc vəziyyətdə qoydu: “Paşinyan, ilk olaraq, öz çıxışları və uğursuz zarafatları ilə koronavirus təhlükəsini heçə çevirməyə başladı. Sonrakı iki ay ərzində o və onun nazirləri maska taxmamağa çağırdılar. Və indi hər gün yoluxmuş adamların sayının 500-ə yaxınlaşdığı bir vaxtda qəflətən ayılıb və insanları virusa qeyri-ciddi yanaşmaqda və maska taxmamaqda günahlandırmağa başlayıb”.
Belə görünür ki, koronavirusla əlaqədar Paşinyanın reytinqi sürətlə düşür. Belə gedərsə, Paşinyan necə deyərlər, bütün bunların altından çıxa bilməyəcək.
“Paşinyanın üzləşdiyi situasiya, əslində, göründüyündən daha acınacaqlıdır”
Sözügedən məsələ ilə bağlı fikirlərini baki-xeber.com-la bölüşən siyasi ekspert Ramil Hüseynovun sözlərinə görə, Paşinyanın üzləşdiyi situasiya, əslində, göründüyündən daha acınacaqlıdır: “Əvvəla Paşinyan hakimiyyətə gələndə çoxsaylı populist vədlə çıxış edirdi. Sosial-iqtisadi inkişaf, yeni idarəçilik vəd edirdi. Çox keçmədi ki, bütün bu deyilənlərin siyasi şou olduğu ortaya çıxdı. Bu tərəfdən də koronavirus infeksiyasının ölkədə sürətlə yayılması vəziyyəti bir qədər də mürəkkəbləşdirir. Məsələ ondadır ki, koronavirus pandemiyası onsuz da sosial-iqtisadi tənəzzül içində yaşayan ölkədə ictimai gərginliyi artırır. Ermənistan yoxsul ölkə olduğu üçün koronavirusla mübarizədə yetərli maliyyə vəsaitinə malik deyil. Bu səbəbdən işğalçı ölkə bu gün, faktiki olaraq, iflic vəziyyətindədir. Paşinyanın uğursuz siyasəti ölkəni ağır sosial gərginlik məngənəsinə sürükləyir. Məhz buna görə də hazırda orada ictimai-siyasi gərginlik durmadan artır. Artıq elə bir vəziyyət yaranıb ki, Ermənistan rəsmiləri virusla mübarizədə aciz qaldıqlarını etiraf edirlər. Səhiyyə naziri Torosyanın fikirləri buna əyani sübutdur. Onun fikrincə, belə gedərsə, ağır koronavirus xəstələri üçün çarpayı çatmayacaq. Bu onu göstərir ki, hökumət pandemiya ilə mübarizədə aciz durumdadır”.
Vidadi ORDAHALLI
