Mahiyyət etibarı ilə işğalçı ölkə olan Ermənistanın beynəlxalq səviyyədə ifşa olunması istiqamətində dövlət olaraq tərəfimizdən çoxlu sayda işlər görülüb. Bu istiqamətdə ölkə başçısı kimi İlham Əliyevin müstəsna xidmətlərini də xüsusi qeyd etməliyik. Prezident nümayiş etdirdiyi əzmkar mövqeyi və təqdim etdiyi təkzibolunmaz faktlarla qısa müddət ərzində Ermənistanın mahiyyət etibarı ilə faşist ideologiyasına sadiq olduğunu sübuta yetirdi. Həmin çıxışların ardıcılığına diqqət edək.
Prezident İlham Əliyevin “Valday” Beynəlxalq Diskussiya Klubunun XVI illik iclasının plenar sessiyasından sonra Aşqabadda hücum taktikasına söykənən növbəti çıxışının şahidi olduq. Prezident İlham Əliyev Azərbaycan həqiqətlərini söyləyən çıxışları ilə əlaqədar zamanın, məqamın və yerin seçilməsinə xüsusi önəm verir. Bu mənada, MDB məkanında baş verən proseslərin öyrənilməsi baxımından MDB dövlət başçılarının iclası da dünyada diqqətlə izlənirdi. Eyni zamanda faşizm üzərində qələbənin 75-ci ildönümü yaxınlaşdığı üçün iclasda müzakirələr həm də bu ətrafda olacaqdı. Bütün bəşəriyyət faşizm üzərində qələbənin 75 illiyini qeyd etməyə hazırlaşırdı. Bu məqamdan Prezident İlham Əliyev maksimum faydalandı və ilk növbədə Azərbaycanın 1941-1945-ci illərdə faşizm üzərində qələbənin əldə edilməsində müstəsna xidmətlərini faktlarla, arqumentlərlə əsaslandırdı. Dövlət başçısı vurğuladı ki, həmin dövrdə neftin 70 faizini, benzinin 80 faizdən çoxunu, mühərrik yağının 90 faizindən çoxunu Azərbaycan təmin edirdi və Bakı nefti olmasaydı, faşizm üzərində qələbə də çox çətin olardı. Prezident İlham Əliyev bu reallıq fonunda bu gün MDB məkanında faşizmin qəhrəmanlaşdırılmasına, təbliğinə, faşistlərlə əməkdaşlıq etmiş şəxslərin Ermənistanda qəhrəman kimi təqdim olunmasına diqqət çəkdi, 2016-cı ildə Ermənistanda faşistlərin əlaltısı olmuş cinayətkar Qaregin Njdeyə heykəl qoyulduğunu xatırlatdı. Bu heykəli Ermənistanda əvvəlki hakimiyyət qoysa da, bugünkü hakimiyyət də heykəli qoruyub saxlayır. Faşistə xidmət etmiş şəxsi qəhrəmanlaşdırırsansa, bu, faşizmə qarşı mübarizəyə ziddir.
Bütün bunlar onu göstərir ki, Ermənistan bir tərəfdən faşizmə qarşı sənədlərə imza atır, digər tərəfdən isə fərqli hərəkət edir. Prezident İlham Əliyev bununla bağlı öz mövqeyini çox kəskin şəkildə ortaya qoydu. Dövlət başçısı, eyni zamanda, Rusiya Federasiyasının Müdafiə naziri Sergey Şoyqunun sədrliyi ilə Müdafiə Nazirliyinin baş redaksiya heyəti tərəfindən nəşr edilmiş 12 cildlik “1941-1945-ci illərin Böyük Vətən müharibəsi” ensiklopediyasının “Böyük Vətən müharibəsi illərində gizli müharibə, kəşfiyyat və əks-kəşfiyyat” adlı VI cildində dərc edilmiş “Müharibənin son dövründə hərbi əks-kəşfiyyatın fəaliyyəti” adlı məqalədən söz açaraq, həmin məqaləyə istinadən Qaregin Njdenin sovet xalqına xəyanət etdiyi və faşistlərin əlaltısı olduğu barədə faktları nəzərə çatdırdı. Prezident İlham Əliyevin çıxışının əhəmiyyəti ondan ibarətdir ki, faşizm üzərində qələbənin 75 illiyinin qeyd olunmasına hazırlıq aparıldığı bir vaxtda Ermənistanda faşizmə xidmət etmiş cinayətkarlar qəhrəmanlaşdırılırsa, deməli, bu, həmin xalqlara ən böyük hörmətsizlikdir. Prezidentin bu təkzibedilməz faktları, dəlilləri qarşısında Nikol Paşinyan tamamilə özünü itirmişdi, cəfəng, məntiqsiz fikirlər söyləməyə məcbur oldu. Dövlət başçımızın ciddi arqumentləri qarşısında onun davam gətirmək imkanı yox idi. Nikol Paşinyan Qaregin Njdeni müdafiə edəcək arqument ortaya qoymadı. Sözündən belə çıxdı ki, Qaregin Njde türklərə qarşı döyüşüb və məqsədi erməniləri xilas etmək olub. O qədər cəfəng mövqe ortaya qoydu ki, bu, açıq şəkildə sovet xalqlarına, MDB dövlət başçılarına hörmətsizlik idi.
İlham Əliyev istər beynəlxalq səviyyəli tədbirlərdə, istərsə də dünyanın nüfuzlu mətbu orqanlarına verdiyi müsahibələrdə daim bu məsələyə xüsusi diqqət yönəldir. Rusiyanın TASS informasiya agentliyinin baş direktorunun birinci müavini Mixail Qusmana eksklüziv müsahibəsində də bildirdi ki, İkinci Dünya müharibəsində ermənilər faşistlərlə yaxından əməkdaşlıq edib, Ermənistan açıq-aşkar şəkildə faşizm təlimlərini yayır, faşizm cəlladlarını qəhrəmanlaşdırır. “Ermənistanda faşist canilərinin qəhrəmanlaşdırılması həyat normasına çevrilir” söyləyən cənab İlham Əliyev onu da vurğulayıb ki, bir neçə il bundan əvvəl Ermənistanda faşist cəllad və cani, Njde ləqəbi ilə məşhur olan Qaregin Ter-Arutyunyana 6 metr hündürlüyündə heykəl qoyulub. Bu adamın cinayətləri sübut olunub. Qələbənin 75 illiyi ərəfəsində həm Rusiya Federasiyası Xarici İşlər Nazirliyi, həm də Rusiya Federasiyası Müdafiə Nazirliyi tərəfindən dərc edilmiş sənədlər də buna sübutdur. Bu adam müharibə dövründə bildirmişdi ki, Almaniya uğrunda həlak olan Ermənistan uğrunda həlak olur”. Njdenin təxribatçılıq fəaliyyəti çoxsaylı insanın ölümünə gətirib çıxarıb.
Rusiyanın nüfuzlu "Natsionalnaya oborona" (“Milli müdafiə”) jurnalının may buraxılışında Azərbaycan Prezidenti İlham Əliyevin müsahibəsi dərc olunub. Qeyd edək ki, bu jurnal Rusiyada və beynəlxalq səviyyədə rəsmi dövlət qurumları, diplomatlar, siyasi, hərbi ekspertlər, tədqiqatçılar və digər mütəxəssislərdən ibarət geniş auditoriyaya malikdir. Həmin müsahibəsində də ölkə başçısı Ermənistan dövlətinin faşizmə olan rəğbəti barədə ciddi faktlar səsləndirib.
Göründüyü kimi, müasir Ermənistanda terrorçuluq və faşizm ideologiyasının dövlət siyasətinin ayrılmaz hissəsinə çevrilməsinin ifşa olunması istiqamətində ölkə başçısı İlham Əliyevin ardıcıl və əzmkar fəaliyyətindən doğan şəxsi tarixi xidmətləri ortadadır.
Məhəmmədəli QƏRİBLİ
