"Dünya bazarlarında neftin qiymətlərinin aşağı düşməsini özləri üçün "çox maraqlı” mövzuya çevirmiş və bu məsələ ilə bağlı eyni fikirləri on dəfələrlə deməkdən usanmayan bəzi təhlilçilər cəmiyyətdə olduqca yanlış rəy formalaşdırmağa səy göstərirlər".
"APA-Economics”in məlumatına görə, bu fikirləri "Ekonomiks" Beynəlxalq İqtisadi Araşdırmalar Birliyinin sədri, professor Fikrət Yusifov mətbuata açıqlamasında deyib.
Onun fikrincə, dünya bazarlarında neftin qiymətlərinin iki dəfədən çox aşağı düşməsi nəticəsində Neft Fondunun büdcəsində kəsir yaranması təbiidir: "Təəssüf ki, özlərini iqtisadi ekspert kimi təqdim edənlər az qala bunun əksini "isbat" etməyə çalışırlar. Neftin dünya bazarlarındakı qiymətləri son 2-3 ildə təxminən 100 -120 dolları aşdığı və bəzən bundan da yüksək bir həddə çatdığı halda əldə edilən mənfəətin yüksək olması nə qədər təbiidirsə, bunun əksi baş verəndə gözlənilən mənfəətin azalması da bir o qədər təbiidir. Mətbuatdakı çıxışlarımızda dəfələrlə demişik ki, aktivləri 37,3 milyard ABŞ dollarından çox olan Neft Fondunun ondan asılı olmayan səbəbdən bir neçə milyard dollar itirməsi və ya məlum səbəbdən növbəti ilə öz büdcəsini 1,5 milyard dollar kəsirlə proqnozlaşdırması fəlakət sayıla bilməz. Bunu fəlakət kimi cəmiyyətə təqdim etmək sadəcə belə "təqdimatın” ancaq siyasi motivlərə söykənməsindən xəbər verir".
F.Yusifov açıqlamasında uzun müddət bank sektorunda rəhbər vəzifədə çalışan peşəkar bankirin qarşılaşdığı bir məqamı xatırladıb: "Sovet dönəmində prokurorluğun gənc müstəntiqi həmin şəxsə böyük bir təlaşla belə deyib: "Heç bilirsiniz sizin bank nə edib? Bankir çaşqınlıq içərisində hansı əməli törətdiyini soruşub. Müstəntiqin cavabına baxın: "Müəssisəyə kredit vermisiniz”. Bankir də cavabsız qalmayıb. Deyib ki, kredit vermək bankın ana işidir: "Bank kredit verər, meyvə-tərəvəz verməz ki!”. İndi mən də dünya bazarlarında neftin qiymətlərinin iki dəfədən çox aşağı düşdüyü bir dövrdə Neft Fondunun büdcəsində yarana biləcək kəsri faciəyə çevirənlərə deyirəm: burada təəccüblü nə var ki? - neftin qiymətləri aşağı düşəndə Neft Fondunun da gözlənilən mənfəəti təbii olaraq azalar. Heç kəs narahat olmasın, ehtiyac yarandığı halda Neft Fondu dünya bazarlarında neftin qiymətlərinin 100-120 və bəzən bundan da çox olduğu dönəmlərdə bu hesaba yaratdığı rezervlərindən istifadə edib, vəziyyəti nizamlayacaq və bunun özü də çox normal bir addım olacaq. Əslində bu rezervlərin yazılmış və yazılmamış bir təyinatı da analoji hallarda təhlükəsizlik yastığı rolunu oynamaqdır. Digər tərəfdən, neftin qiymətlərinin bu gün olduğundan daha da aşağı düşəcəyi təqdirdə Dövlət büdcəsinə yenidən baxmaq, bu zaman həyati əhəmiyyət kəsb etməyən, bu günün maliyyə imkanları ilə uzlaşmayan investisiya layihələrinin tam və ya qismən dayandırılması mümkündür. Artıq Prezident bu barədə fikirləri cari ilin əvvəlində Azərbaycan Respublikasının Nazirlər Kabinetinin 2014-cü ilin sosial-iqtisadi inkişafının yekunlarına və qarşıda duran vəzifələrə həsr olunan iclasında səsləndirib".
