"Azərbaycanın iqtisadiyyatı bu il müsbət dinamika nümayiş etdirərək artmaqda davam edir. Neftdənkənar sahələrin artım tempi isə ÜDM-in artım tempini 3 dəfəyə yaxın üstələdi. 2014-cü ilin 2-ci yarısından nefin qiyməti aşağı düşməyə başlasa da, bu ilin büdcəsində elə bir ciddi problem yaşanmadı. Rusiya rublundan fərqli olaraq bizdə milli valyutanın-manatın məzənnəsi sabit saxlandı.
İqtisadiyyatda müsbət dinamika gələn il də davam edəcək, neftdənkənar sahənin artım templəri ÜDM-in artım templərini nəzərəçarpan dərəcədə üstələyəcək. Manatın məzənnəsi nisbi sabitliyini saxlayacaq. İdxal inflyasiyası bir qədər artsa da, inflyasiya səviyyəsi MDB ölkələrinin orta statistik səviyyəsindən aşağı olacaq. Maaşlar bir qədər artacaq".
Bunu Milli Məclisin deputatı, İqtisadi və Sosial İnnovasiyalar İnstitutunun rəhbəri Əli Məsimli ilin yekunları ilə bağlı mətbuata verdiyi açıqlamasında qeyd edib.
Millət vəkilinin 2015-ci il üçün səsləndirdiyi proqnozlar, həmçinin, maaşların artacağı barədə fikri Azərbaycan iqtisadiyyatının inkişaf dinamikasından xəbər verir.
Məsələ ilə bağlı fikir bildirən iqtisadçı-ekspert Aydın Hüseynov bizimlə söhbətində bildirdi ki, hazırda Azərbaycan iqtisadiyyatı inkişaf dönəmini yaşayır: "İqtisadiyyat inkişaf etdikcə əhalinin maddi gəliri də artır. Ölkədə aparılan iqtisadi strategiyanın başlıca məqsədi vətəndaşların sosial rifah halının yüksəldilməsidir. Banklarda əmanətlərin artması əhalinin gəlirinin artmasının bariz göstəricisidir. Bütün bunlar ölkə iqtisadiyyatının artması fonunda baş verir".
A.Hüseynov da millət vəkilinin növbəti il ərzində maaşların artması proqnozunun real olduğunu düşünür.
