Gələn il bütün ölkə "ASAN xidmət"dən istifadə edə biləcək. Gözlənən yenilikləri Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov mətbuata açıqlamasında deyib.
Bu gün Azərbaycanda 7 "ASAN xidmət" mərkəzi fəaliyyət göstərir. Bu mərkəzlər vasitəsilə indiyədək işi asanlaşan insanların sayı isə 3 milyon yarımı ötüb. Bura stasionar mərkəzlərlə yanaşı, səyyar avtobusların fəaliyyəti də daxildir. Məhz 2014-cü ildə bu üsulla Cənubi Qafqaz boru kəmərinin keçdiyi rayonların sakinlərinə əmlakla bağlı xidmətləri "ASAN xidmət" öz üzərinə götürüb. Bu ilin bir mühüm hadisəsi isə artıq Bakı şəhərində ərazi üzrə qeydiyyat məhdudiyyətinin aradan qalxması oldu. Gələn il bir neçə bölgədə yeni mərkəzlərin açılması ilə ümumiyyətlə ölkə üzrə qeydiyyat məhdudiyyəti aradan qalxacaq.
İnam Kərimovun sözlərinə görə, gələn ilin ilk rübündə Bərdədə "ASAN xidmət" mərkəzi açılacaq: "Yay aylarının sonunda Qəbələ "ASAN xidmət" mərkəzi, gələn ilin sonunda Masallı "ASAN xidmət" mərkəzi açılacaq".
Yəni rayonda yaşayanlar Bakıda, paytaxt sakinləri isə istənilən rayonda yerləşən "ASAN xidmət" mərkəzinə müraciət edə biləcək. Bundan başqa, səyyar xidmətlərin əhatə dairəsini genişləndirmək üçün 6 yeni avtobus alınacaq. Belə ki, gələn ilin ilk rübündə artıq "ASAN xidmət" 10 səyyar avtobusla xidmət göstərəcək.
Sözügedən məsələni dəyərləndirən ekspert İlqar Hüseynli hesab edir ki, "ASAN xidmət" şəbəkəsinin genişləndirilməsi müsbət addımdır: "Ən azından ona görə ki, bu, vətəndaşların rahatlığına xidmət edir. Yəni əvvəl vətəndaş hansısa sənədi dəyişməkdən ötrü uzun-uzadı növbəyə dayanmalı olurdu və bu zaman müəyyən çətinliklər ortaya çıxırdı. "ASAN xidmət" mərkəzləri fəaliyyətə başlayandan sonra bu kimi məsələlərdə hansısa məmurdan asılı olmaq, demək olar, aradan qalxıb. Göstərilən xidmətlərin sayı artdıqca, əhalinin bundan faydalanmaq imkanları da artır. Bu kontekstdə gələn il ölkə üzrə qeydiyyat məhdudiyyətinin aradan qaldırılacağı müsbət haldır. Artıq paytaxtda yaşayan, işləyən, amma rayon qeydiyyatında olan şəxslərin buna görə bölgələrdəki "ASAN xidmət" mərkəzlərinə müraciət etməsinə ehtiyac qalmayacaq. Hansısa işlərini düzəltməkdən ötrü yol qət etmələrinə və buna görə vəsait xərcləmələrinə ehtiyac qalmayacaq".
