Oktyabrın 16-da 2019-cu ildə keçiriləcək Formula 1 Azərbaycan Qran Prisi üçün bilet satışına start verilib. Baki-xeber.com-un məlumatına görə, bunu mətbuat konfransında Bakı Şəhər Halqasının Marketinq və kommunikasıya şöbəsinin müdiri Nigar Arpadarai bildirib.
O deyib ki, biletləri şəhərin 13 satış nöqtəsindən, həmçinin onlayn şəkildə əldə etmək olacaq: "Bu gündən satışa çıxarılan biletlər hələlik yerli sakinlər üçün nəzərdə tutulub".
N.Arpadarai əlavə edib ki, Bakı Şəhər Halqası azarkeşlərə 4 günlük biletlərdə məhdud sayda nəzərdə tutulmuş 20%-lik endirim təklif edir: "1 yanvar 2019-cu ilə qədər qüvvədə olacaq bu təklifdən sonra biletlərin satışı tam qiymətə satılacaq. Sırf yerli sakinlər üçün isə 25% endirim tətbiq olunur".
2019-cu ildə keçiriləcək Formula 1 Azərbaycan Qran Prisi üçün biletlərin qiyməti də açıqlanıb. Xəbərə görə, ilkin endirim kampaniyası müddətində yerli sakinlər üçün təqdim olunan 4 günlük biletlərin qiyməti tribunadan asılı olaraq 190-660 manat arasında dəyişir. Azyaşlılar üçün bu qiymət müvafiq olaraq 130-470 manat təşkil edir. Ayaqüstü zona üçün olan biletlərin qiymətləri isə 80-160 manat aralığındadır.
Bakı Şəhər Halqasının Kommersiya şöbəsinin rəhbəri Bülent Özərdim bildirib ki, Formula 1 yarışını izləmək üçün ötən il Azərbaycana 78 ölkədən qonaqlar gəlib: “Ötən il Azərbaycanda F1 yarışları həmişə olduğu kimi, çox böyük coşqu və uğurlu keçmişdi. Yarışları izləyənlərin 35 faizi xarici, 65 faizi isə yerli sakin olub. Bu il isə xarici azarkeşlərin sayında artıma nail olmaq niyyətindəyik. Bu göstəricini 40-45 faizə çatdırmaq istəyirik”.
Ötən il Formula 1 yarışları ilə bağlı Azərbaycana gələn əcnəbilərin çoxu Rusiyadan olub. Bakı Şəhər Halqasının Kommersiya şöbəsinin rəhbəri Bülənt Özərdim belə bildirib.
O qeyd edib ki, Azərbaycanda keçirilən Formula 1 yarışlarını izləmək üçün Amerikadan Yeni Zelandiyaya qədər - dünyanın dörd bir yanından xarici vətəndaşlar gəlir: "Yarışlara tamaşaçı qismində ən çox Rusiya vətəndaşları qatılıb. İkinci və üçüncü yerləri Böyük Britaniya və Ukrayna vətəndaşları bölüşür. Əlbəttə, bu, çoxluq təşkil edən əcnəbi vətəndaşlardır. Mərkəzi Avropadan, Almaniya və Niderlanddan da gələnlərin sayı çox olub. Yaxın Şərqdən isə Birləşmiş Ərəb Əmirliklərinin vətəndaşları üstünlük təşkil edir”.
Qeyd edək ki, Bakıda növbəti Formula 1 yarışı 2019-cu il 26-28 aprel tarixlərində baş tutacaq.
