Liviyada Milli Həmrəylik Hökumətinə bağlı qüvvələrlə paytaxtı Tripolini ələ keçirmək üçün hərbi əməliyyatlara başlayan general Xəlifə Haftarın rəhbərlik etdiyi Milli Ordu arasında toqquşmalar davam edir.
Baki-xeber.com xarici mediaya istinadən xəbər verir ki, son məlumatlarda, hökumət qüvvələrinə aid döyüş təyyarələrinin, Haftara bağlı qüvvələrin nəzarətində olan Əl-Vütye hərbi hava bazasını vurduğu bildirilir. Haftarın ordusu bu hərbi hava bazasından istifadə edərək Tripolinini bombalayırdı.
Qeyd edək ki, Liviyada, ölkəni 40 ildən çox idarə edən Müəmmar Qəddafinin öldürülməsilə nəticələnən qiyamdan bəri siyasi böhran yaşanır. Ölkədə onlarla fərqli silahlı qrupları var. Bir müddət əvvəl bu qruplar BMT tərəfindən dəstəklənən hökumət ordusu ya da general Xəlifə Haftarın ətrafında birləşiblər.
Misir və Birləşmiş Ərəb Əmirlikləri tərəfindən dəstəklənən və radikal qruplara qarşı çıxan general Haftar, əsasən ölkənin şərq hissəsində nəzarət edir. Bu gün isə Haftar paytaxt Tripolini ələ keçirmək üçün hərbi əməliyyatla başlayıb. O, yuxarıda qeyd edildiyi kimi xaricdən dəstək alır.
Birləşmiş Ərəb Əmirliklərinin (BƏƏ) Ümmət Partiyasının baş katibi Həsən əl Dıggi də, Haftarın sadə bir fiqur olduğunu deyir. Hafterə dəstək verən ən əhəmiyyətli mərkəzin BƏƏ-dəki Serbinya Hərbi Bazası olduğunu qeyd edən Dıggi, Misirin Siva bölgəsi və Çadda yaradılan digər iki bazanın da Haftarin ordusuna dəstək verdiyini deyib.
Həsən əl Dıgginin sözlərinə görə, ABŞ, BƏƏ, Misir və Səudiyyə Ərəbistanının əli ilə yeni bir fəlakət planı işə salınıb. Əl Dıggi general Hafterin hərəkat planının “Black Water” tərəfindən hazırlandığını və hərbi çevriliş planının pərdə arxasında amerikalı Erik Prinsin olduğunu, əməliyyatın maliyyə xərcinin isə Səudiyyə və BƏƏ tərəfindən qarşılandığını bildirib. "Liviya, Əlcəzair və Sudanda baş verən hadislər bölgə miqyasında yayılması planlaşdırılan yeni bir fəlakət planının hazırlıq mərhələsidir” – o deyib.
Bundan başqa, Haftarın, Tripoliyə hücuma başlamaszdan əvvəl, martın 27-də Səudiyyə Ərəbistanının şahzadəsi Məhəmməd bin Salmanla görüşdüyü ortaya çıxıb.
General Haftar 1969-cu ildə Qəddafinin hakimiyyəti ələ keçirilməsinə dəstək verib, amma sonrada araları dəydiyi üçün ABŞ-a sürgünə göndərilib. 2011-ci ildə Qəddafiyə qarşı qiyam başlayanda sonra isə Haftar Liviyaya qayıdıb və öz ordusunu qurub.
Xatırladaq ki, aprelin 4-də Xəlifə Haftar paytaxt Tripolinin silahlı qruplaşmalardan azad olunması üzrə hərbi əməliyyatın başladığını elan edib. Bəzi məlumatlara görə, Haftarın tərəfdarları paytaxtın cənub-şərq hissəsində bir neçə rayona nəzarəti ələ keçirib. Paytaxta nəzarət edən və beynəlxalq ictimaiyyət tərəfindən qəbul edilən Milli Razılıq Hökumətinin rəhbəri Faiz Sarac özünə tabe olan bütün hərbi birləşmələri tam döyüş hazırlığı səviyyəsinə gətirmək əmri verib.
Hazırda ölkədə ikihakimiyyətlilik hökm sürür: şərqdə - Tobruk şəhərində seçkilərdə qələbə qazanan parlament, qərbdə - paytaxt Tripolidə isə BMT və Avropa İttifaqının dəstəyi ilə qurulan Milli Həmrəylik Hökuməti fəaliyyət göstərir. Ölkənin şərq hissəsinin hakimiyyət orqanları Tripoliyə tabe olmur və Liviya Milli Ordusunun komandanı Xəlifə Haftarla əməkdaşlıq edir.
