Amerika Birləşmiş Ştatlarının prezidenti Donald Tramp rusiyalı həmkarı Vladimir Putinə zəng edərək seçkilərdə qazanması münasibətilə təbrik edib. Baki-xeber.com xəbər verir ki, Trampın Putini təbrik etməsi Amerikada tənqidlə qarşılanıb.
Trampı isə tənqidlərə “Twitter” hesabından bu sözlərlə cavab verib: “ABŞ-ın eks prezidenti Barak Obama da Putinə zəng edib. Media çılğına dönüb. Məndən az qala onun (Putinin) dərisini soymamı istəyirlər. Yanılırlar. Rusiya və başqa dövlətlərlə yaxşı davranmaq yaxşıdır, pis deyil. Rusiya Şimali Koreya, Suriya, Ukrayna, İŞİD, İran və yeni silahlanma yarışı məsələlərinin həllində yardımçı ola bilər… Əvvəlki ABŞ prezidentlərindən Corc Buş da Rusiya ilə yaxşı münasibətlərə çalışdı, amma ağıllı məsləhətçiləri olmadı. B.Obama, dövrün dövlət katibi Hillari Klinton da bunu sınadı, amma kifayət qədər enerjiyə malik olmadılar”.
Ağ Ev də Trampın Putinə telefon zəngi edərək, onu seçkidə qalib gəlməsi münasibətilə təbrik etməsini müdafiə edib. Trampın telefon zəngi Senat panelinin apardıqları detallı təhqiqatın nəticələrinin Rusiyanın 2016-cı il prezident seçkilərinə müdaxilə etdiyini göstərdiyini elan etməsi ilə eyni vaxta təsadüf edib. Tramp bu məsələyə toxunmayıb, onun əvəzinə Putinlə mühüm qlobal məsələləri müzakirə etməyin vacibliyini qeyd edib.
Ağ Evdə Səudiyyə Ərəbistanının nümayəndə heyəti ilə görüşü zamanı müxbirlər önündə çıxış edən Tramp Putinlə telefon söhbətini “çox yaxşı” qiymətləndirib: “Bizim aramızda çox yaxşı telefon söhbəti keçdi və mən düşünürəm ki, biz yaxın gələcəkdə görüşüb, artıq nəzarətdən çıxan silahlanma yarışını müzakirə edəcəyik. Biz həmçinin Ukrayna, Suriya, Şimali Koreya və bir sıra digər məsələləri müzakirə edəcəyik”.
Bu arada isə Senatın Xüsusi Kəşfiyyat Komitəsi bildirib ki, ABŞ-ın hər ştatdakı seçki sistemi ilə bağlı aparılan hərtəfərli təhqiqat Rusiyanın 2016-cı il prezident seçkilərinin nəticələrinə təsir göstərməyə çalışdığını sübut edib. “Rusiya 21 ştatda seçicilərin məlumat bazasına daxil olmağa cəhd edib və biz onların azı bir məlumat bazasına daxil olmaqda müvəffəq olduğunu bilirik,” respublikaçı senator Riçard Burr deyib.
Komitə üzvləri deyib ki, onlar hər hansı səslərin dəyişdiyinə dair heç bir dəlil tapmayıb, lakin istintaqda əksər ştatların səsvermə sistemlərinin köhnəldiyi aşkar olunub. “40 ştat hələ də on ildən daha köhnə olan seçki avadanlığından istifadə edib və həmin avanlıqların softveyrləri köhnədir. Belə ki, indi istəsəniz belə onu yeniləmək mümkün deyil,” demokrat senator Mark Uorner söyləyib.
Hər iki partiyanın üzvlərindən ibarət panel sistemin təcili yenilənməsinə və bu il keçiriləcək ara seçkilərə müdaxilənin qarşısını almaq üçün təhlükəsizlik tədbirlərinin görülməsinə çağırıb. “Biz Rusiya və başqa xarici rəqib və düşmən ölkələrin seçkilərimizi hədəf alacaqlarını və demokratiyamıza xələl gətirməyə çalışacağını bilirik,” demokrat senator Martin Heinriç deyib.
Ağ Ev isə bildirib ki, Trampın Putinlə mehriban telefon söhbəti administrasiyanın Rusiyanın əməllərinə yumşaq münasibət bəsləyəcəyini göstərmir. “Biz mövqeyimizi sərgiləmək üçün Rusiyaya qarşı sərt sanksiyalar tətbiq etmişik və bir sıra başqa addımlar atmışıq,” Ağ Evin sözçüsü Sara Hakabi Sanders söyləyib.
Lakin Ağ Ev rəsmisi həmçinin deyib ki, prezident Rusiya ilə mühüm qlobal məsələrlə bağlı dialoq aparmağın vacibliyinə də inanır.
