ABŞ Prezidenti Donald Tramp Suriyadakı amerikalı hərbçiləri bölgədən çıxarmaq üçün Səudiyyə Ərəbistanı kralı Salmandan 4 milyard dollar istəyib. Baki-xeber.com xəbər verir ki, bu iddia ilə “Washington Post” qəzeti çıxış edib.
Qəzet yazır ki, Trampla kral Salman arasında dekabr ayında telefon danışığı olub. Qeyd edilir ki, Tramp Səudiyyə Ərəbistanından Suriyadan çəkilmək üçün 4 milyard dollar və körfəzdəki digər müttəfiqlərdən dəstək istəyib.
ABŞ rəsmiləri tərəflərin razılığa gəldiklərini iddia edir. Trampın İŞİD üzərində qələbəni elan etməyə yaxın olduğu və bu səbəbdən bölgədəki qoşunlarını çıxarmaq istədiyi bildirilir.
Səudiyyə Ərəbistanının Vaşinqtondakı səfirliyi isə Trampın kral Salmandan 4 milyard dollar istədiyinə dair iddiaları şərh etməyib. Ancaq qəzet bildirib ki, Ağ Ev və yerli müttəfiqlərinin İŞİD-dən qutarılan bölgələrin yenidən qurulması və sabitliyin təmin edilməsi üçün Səudiyyə və digər ölkələrdən maliyyə istəyib.
Qəzet iddia edib ki, ABŞ-ın savaşsonrası planı, Suriya lideri Bəşər Əsədin və onun müttəfiqləri olan Rusiya və İranın azad edilən ərazilərdə nəzarəti ələ almasının, habelə İŞİD-in yenidən bu ərazilərdə ortaya çıxmasının qarşısını almaqdır. Bildirilir ki, ABŞ ötən ay Suriyada təhlükəsizlik məsələlərinə 200 milyon dollar xərcləyib.
Tramp prezident olandan sonra Suriyadakı qoşunların sayının artırılmasına razılıq versə də, ABŞ-ın Suriyada daha böyük bir rol oynaması və ölkədə uzun müddət qalması fikrinə məsafəli yanaşdığını yazan qəzet, hazırda ABŞ-ın, bölgədəki tərəfdaşı və YPG-nin əsas bazasını təşkil etdiyi Demokratik Suriya Qüvvələrinə (DSQ) təlim keçmək, məsləhət vermək və dəstəkləmək məqsədilə bölgədə təxminən 2000 əsgər saxladığını bildirir.
Qəzetə danışan ABŞ rəsmisi isə qeyd edir ki, hər 18 aydan bir məsələ yenidən qiymətləndirilməlidir. Başqa bir ABŞ rəsmisi isə bildirir ki, ABŞ-ın hərbi missiyasını genişlətmək istəməməsi və Əsədin uğurlarına görə, DSQ rejimlə anlaşmalıdır.
Ancaq qəzet bu mövzuda Ağ Evdə fikir ayrılıqları olduğuna diqqət çəkir. Başqa bir ABŞ rəsmisi, Əsədin müharibəni udması fikrini rədd edir: “Rejim hər zamankından daha zəifdir. Əgər vətəndaş müharibəsinin ilk vaxtları ilə müqayisə etsək Əsəd, ölkənin yarısını, ya da daha azını, əkilə bilən sahələrin yarısından azını, təbii qaz və neft kimi strateji resursların isə yarısından da azına nəzarət edir".
Digər bir ABŞ rəsmisi isə "rejimin hər zamankından zəif olduğu fikri, ruslar, iranlılar və Hizbullah Suriyadan çıxarılsaydı doğru ola bilərdi" deyir: "Onlar olmadan Əsəd dərhal devrilərdi. Ancaq onlarla birlikdə güclü kimi görünür".
Qəzetə açıqlama verən ABŞ rəsmilərində biri isə DSQ-nin 400 əcnəbi İŞİD-çini əsir saxladığını, geniş otaqlarda birlikdə saxlanan bu terrorçuların yenidən təşkilatlanıb “İŞİD 2.0” adı ilə ortaya çıxmasından narahat olduqlarını deyib. Amerikalı rəsmi Səudiyyə Ərəbistanı kimi müttəfiqlərdən istənilən pulun bir qisminin də məhz bu saxlanılan İŞİD üzvlərinin təkadamlıq kameralara göndərilməsi məqsədi ilə istifadə edilə biləcəyinə işarə edib.
