Martın 4-də Solsberi şəhərində Rusiya Baş Kəşfiyyat İdarəsinin (QRU) keçmiş polkovniki Sergey Skripal və onun qızına qarşı əsəb-iflic qazı vasitəsilə həyata keçirilən hücum Böyük Britaniya ilə Rusiya arasında gərginliyi pik həddə çatdırıb. Baki-xeber.com xəbər verir ki, Britaniyanın baş naziri Tereza Mey keçmiş rus agentə sui-qəsd cəhdi ilə əlaqədar Rusiyaya qarşı cavab addımlarını açıqlayıb.
Paerlamentdə çıxış edən T.Mey bildirib ki, İngiltərə bununla bağlı Birləşmiş Millətlər Təşkilatının (BMT) Təhlükəsizlik Şurasının təcili iclasını çağırıb.
T.Mey İngiltərədəki 23 rus diplomatın da deportasiya ediləcəyini açıqlayıb. O deyib ki, bu diplomatlar Rusiya kəşfiyyatının əməkdaşlarıdır və onlara ölkəni tərk etmək üçün bir həftə vaxt verilib. Son 30 il ərzində ilk dəfə bu qədər çox diplomatı ölkədən çıxardıqlarını deyən Mey, onların elan olunmamış kəşfiyyatçı olduqlarını bildirib.
“Rusiya bu iyrənc əmələ görə cavabdehdir. Biz onlara izahat üçün vaxt verdik, onlar bu məhlulun Böyük Britaniyaya necə düşdüyünü izah edə bilərdilər, lakin əvəzində sarkazmla reaksiya verdilər və ittihamları inkar etdilər. Heç bir şübhə yoxdur ki, Rusiya hökuməti cənab Skripala və onun qızına qarşı sui-qəsddə günahkardır”, - deyə T. Mey söyləyib.
“Düşmən dövlət fəaliyyətləri” əleyhinə tədbirlərini sərtləşdirəcəklərini söyləyən Mey, Rusiyanın ölkədəki casus şəbəkəsini məhv edəcəklərini bəyan edib.
T.Mey Rusiya ilə dialoqun tamamilə dayandırılmasının ölkənin milli mənafelərinə zidd olduğunu, ancaq bütün yüksək səviyyəli əlaqələrin dayandırılacağını bildirib. İngiltərə baş naziri Rusiyanın xarici işlər naziri Sergey Lavrovun Britaniyaya səfərinin ləğv olunduğunu və İngiltərə hökumətindən heç bir nazirin və kral ailəsi üzvlərinin Rusiyada bu il keçiriləcək Futbol üzrə Dünya Kubokuna qatılmayacağını bəyan edib.
T.Mey, Birləşmiş Krallıq vətəndaşlarının və ya Birləşmiş Krallıqda yaşayanların həyatına hər hansı təhdid olacağı təqdirdə, Rusiya dövlətinin Birləşmiş Krallıqdakı bütün aktivlərini donduracaqlarını deyib.
Baş nazir Rusiya prezidenti Vladimir Putin və Kreml rəsmiləri və oliqarxlarına qarşı aktivlərin dondurulması, Londondakı evlərinin müsadirə edilməsi və həmin Rusiya rəsmilərinə viza qadağası tətbiq edilməsi də daxil olmaqla bu gün iqtisadi müharibəyə başlayacağını bəyan edib. Baş nazir həmcinin, beynəlxalq müttəfiqləri Britaniyaya qoşularaq dünyanın diqqətini Kreml rəsmilərinə məxsus milyardlarla dollar dəyərində aktivlərə çəkməyə çağırıb.
Rəsmilər təkcə Britaniyanın tədbirlərinin Kremllə əlaqəsi olan rusiyalılara ziyan vuracağını deyib. Britaniya rəsmiləri cinayət maliyyə qanunvericiliyi çərçivəsində rusların aktivlərini müsadirə etmək səlahiyyətinə malikdir. “Bizim planlarımız Rusiyaya ciddi təsir göstərəcək” - deyə yüksək səviyyəli Britaniya rəsmisi bildirib.
NATO-nun və Avropa Birliyinin güclü dəstəyini aldıqlarını ifadə edən ingilis nazir qeyd edib ki, təhlükəsizliyimizi təmin etmək üçün müttəfiqlərimizlə bir araya gəlmək zamanıdır.
Rusiyanı, Böyük Britaniyanın suallarını cavablandırmağa çağıran NATO da, ittifaqın qurulduğu 1949-cu ildən bu yana ilk dəfə NATO ölkələrinin torpaqlarında əsəb-iflic qazı istifadə edildiyini və bundan çox narahat olduqlarını bəyan edib.
Britaniyanın addımlarını şərh edən Rusiyanın Londondakı səfiri Aleksandr Yakovenko isə, rus diplomatlar deportasiya ediləcəyi təqdirdə, Moskvanın da buna bənzər bir şəkildə cavab verəcəyini söyləyib.
Qeyd edək ki, Sergey Skripal 1999-cu ilə qədər Rusiya Müdafiə Nazirliyinin Baş Kəşfiyyat İdarəsində (QRU) çalışıb. 2006-cı ildə Böyük Britaniyaya casusluq üstündə vətənə xəyanət ittihamı ilə həbs edilib və rütbədən məhrum olunub. 2010-cu ildə S. Skripal Rusiya və ABŞ arasında casus mübadiləsi çərçivəsində Britaniyaya göndərilib.
Martın 12-də T. Mey parlamentdəki çıxışında S. Skripal və qızı Yuliyanın zəhərlənməsi barədə aparılan təhqiqata dair ilkin məlumatlar verib. O, deyib ki, hücumda istifadə olunmuş zəhər Rusiya tərəfindən hazırlanan və hərbidə istifadə olunan Noviçok adlanan sinir qazıdır.
"Ya bu zəhərlənmə Rusiya hökuməti tərəfindən birbaşa bizim ölkəyə qarşı atılmış addımdır, ya da artıq Rusiya hökuməti bu zəhərli maddə üzərində nəzarəti itirib və onun başqa əllərə keçməsinə icazə verib", - T.Mey bildirib.
Kreml rəsmiləri isə Skripalsın zəhərlənməsində əli olduğunu rədd edərək, britaniyalıları Rusofobiyanı qızışdırmaqda günahlandırır.
