Rusiya Baş kəşfiyyat idarəsinin keçmiş polkovniki Sergey Skripal və qızı Yuliyanın zəhərləndiyi məkan bəlli olub.
Baki-xeber.com-un xəbərinə görə, cinayətin izləri araşdırmaçıları Britaniyanın Solsberi şəhərindəki “Zizzi” restoranına aparıb. Hazırda məkanın bağlandığı və təhqiqatın aparıldığı deyilən xəbərdə ona da diqqət çəkilir ki, restoranın digər qonaqlarından və işçi personalından heç kəs həkimə hər hansı şikayətlə müraciət etməyib.
Xəbərə görə, Britaniya hökuməti NATO bloku üzrə müttəfiqləri ilə görüşdə Skripalın zəhərləndirilməsi məsələsini də qaldırmaq niyyətindədir.
“The Times” nəşri isə yazır ki, keçmiş BKİ polkovniki Britaniya kəşfiyyatının “xüsusilə qiymətli” agenti olub. Skripalın Britaniya kəşfiyyatının ən yüksək əməkhaqqı alan agenti olduğu deyilən xəbərdə onun “Təcili” ləqəbi daşıdığı bildirilir. Nəşr yazır ki, Skripal 10 il müddətində Britaniya kəşfiyyatını ən mühüm informasiyalarla təmin edib və eyni zamanda BKİ-nin bütün telefon məlumatlarını onlara ötürüb.
Nəşrin xəbərində deyilir ki, öncə Skripalla İspan kəşfiyyatı maraqlanıb, lakin tezliklə Britaniya təşəbbüsü ələ alıb və 1995-ci ildə Skripalın Britaniya kəşiyyatının zabiti ilə ilk görüşü baş tutub. 2000-ci ildə Skripal Rusiya kəşfiyyat idarəsindən gedib və Britaniya kəşfiyyatı ona Malaqa yaxınlığında ev alıb. Elə bu ölkənin kəşfiyyatçıları ilə görüşləri də bu evdə baş tutub və Skripal hər görüşün ardından 5-6 min avro ödəniş alıb. “Financial Times” özünün mənbələrinə istinadən yazır ki, Skripal 2010-cu ildə Rusiya tərəfindən qarşılıq əsasında Britaniyaya verildikdən sonra , Britaniya ilə yanaşı, digər xarici ölkələrin kəşfiyyatları ilə də əməkdaşlıq edib. Nəşrə danışan şəxslərin ehtimalına görə, onun aradan götürülməsinə bu amil də səbəb ola bilər.
Xatırladaq ki, keçmiş agent və qızı martın 4-də Solsberidəki ticarət mərkəzlərinin birində huşsuz vəziyyətdə aşkarlanıb. Polisin açıqlamasına görə, onu insanı iflic edərək öldürən xüsusi maddə ilə zəhərləyiblər.
“Times” Britaniya hökumətindəki mənbələrinə istinadən yazır ki, yerli polis və kəşfiyyat olayda Rusiya dəstəyinin olduğunu düşünür. Lakin Rusiya deyilənləri qəti şəkildə təkzib edir.
Qeyd edək ki, Skripal Rusiya baş Kəşfiyyat İdarəsində 1999-cu ilə kimi işləyib. Sonradan etiraf edib ki, 1995-ci ildə onu agentliyə təhrik ediblər. Bundan sonra keçmiş polkovnik barəsində “dövlətə xəyanət” maddəsi üzrə 13 illik həbs hökmü çıxarılıb. Lakin 2010-cu ildə Rusiya agentlərinin ABŞ-da aşkarlanması ilə o bəraət alıb və həmin agentlərin qarşılığında ABŞ-a verilib.
