Türkiyənin Rusiyadan S-400 zenit-raket kompleksləri alması NATO-da ciddi narahatlıq doğurur və bu razılaşma alyans üçün ciddi risqlər yaradır. Baki-xeber.com xəbər verir ki, bunu alyansın hərbi komtəsinin rəhbəri Peter Pavel bəyan edib.
Onun sözlərinə görə, Türkiyəyə Rusiya istehsalı S-400 sistemləri yerləşdirilməsi, Moskvaya bu ölkədə NATO qaynaqları və sistemləri haqqında ətraflı məlumat əldə etmə imkanı verəcək.
Pavel, S-400-lərin NATO texnologiyaları ilə uyğun gəlmədiyini və buna görə də, alyansın ümumi hava əleyhinə müdafiə sisteminə daxil olmayaraq ayrıca vahid kimi tətbiq olunacağını deyib.
Pavelin sözlərinə görə, əsas problem NATO-nun Türkiyədəki hərbi infrastrukturu barədə operativ məlumatdadır. Onun qeyd edib ki, əsl risq, S-400-lər üçün məlumat bazanın bir NATO müttəfiqi olan ölkənin ərazisində toplanması və Türkiyədəki NATO-ya aid bütün obyektlərə dair məlumatların Rusiya sistemlərinə yazılmasıdır: “Problem S-400-lər deyil, raket sisteminin funksiyasını normal yerinə yetirə bilməsi üçün məlumat bazasına çıxışının təmin edilməsidir”.
General, NATO üzvü Türkiyədə, NATO müttəfiqlərinə aid bütün məlumatların Rusiya sistemləri tərəfindən qeydə alınmasının risq təşkil etdiyini vurğulayıb.
O bildirib ki, bu məlumatlar Rusiya sisteminin yaddaşında qalacaq: "Müharibəyə hazır bir S-400 almaq, hər hansı bir təlim görməmiş əsgər tərəfindən istifadə edilə biləcək Kalaşnikov avtomatı almağa bənzəməz. Çünki rus mütəxəssislər, kompleks radar və atəş nəzarət sistemlərindən istifadə etmək üçün gəlib türk hərbçilərə təlim keçəcəklər".
S-400-lərin quraşdırılması üçün Rusiyanın Türkiyəyə öz mütəxəssislərini göndərəcəyini ifadə edən NATO generalı, "NATO mütəxəssislərinin Rusiyada bir neçə ay qalaraq məlumat bazasına daxil olması necə anlaşılmazdırsa, rus mütəxəssislərin də Türkiyədə rus sistemini NATO məlumatları ilə doldurması qəbuledilməzdir. Moskva, NATO-nun bu ölkədə hansı ehtiyatlara və imkanlara sahib olmasına dair kəşfiyyat məlumatları əldə edəcək" - deyib.
Qeyd edək ki, NATO-nun baş katibi Yens Stoltenberq Türkiyənin bu mövzuda istədiyi kimi hərəkət edə biləcəyini açıqlamışdı.
Rusiya ilə S-400 razılaşması Türkiyə-Amerika əlaqələrini də mənfi təsir edib. Hətta ABŞ Türkiyəni sanksiya tətbiq etməklə təhdid etmişdi. Türkiyə prezidenti Rəcəb Tayyib Ərdoğan isə, buna sərt reaksiya verərək, Türkiyənin qonşusu və NATO üzvü Yunanıstandakı S-300 raketdən müdafiə sistemlərinə hər hansı münasibət bildirməyən ABŞ-ı sərt tənqid etmişdi.
Xatırladaq ki, Ankara iki batareya S-400 almaq istəyir. Tərəflər həmçinin zenit-raket komplekslərinin Türkiyədə istehsalının inkişaf etdirilməsi üçün texnoloji əməkdaşlıq barədə də razılığa gəlib.
