Rusiya ilə Böyük Britaniya arasında yeni qalmaqal yaranıb. Buna səbəb isə Rusiya vətəndaşı, Britaniyanın gizli kəşfiyyat xidməti (Mİ6) üçün çalışan Sergey Skripalın zəhərlənməsi olub.
Baki-xeber.com xəbər verir ki, Rusiyanın Britaniyaya casusluqda ittiham etdiyi və İngiltərədə mühacir kimi yaşayan 66 yaşlı Skripalı iki gün əvvəl qızı ilə birlikdə Salisbury şəhərində, hələlik məlum olmayan maddə ilə zəhərləyiblər. 2010-cu ildə Böyük Britaniyada sığınacaq alan Skripal və qızı şəhərdəki alış-veriş mərkəzinin önündəki skamyada ağır vəziyyətdə tapıldıqdan sonra xəstəxanaya qaldırılıb.
Onların bədənlərində xarici görünüşcə hər hansı zədə və ya xəsarət yoxdur. Polis onların başına nə gəldiyini, bunun sui-qəsd olub-olmadığını aydınlaşdırmağa çalışır. Polis Salisbury şəhərində Zizzy restoranını "ehtiyat tədbiri" olaraq bağlayıb. Şəhərin bəzi yerləri də polis mühasirəsinə alınıb, şübhəli yerlərdə dekontaminasiya (zərərsizləşdirilmə) işləri aparılıb. Polis tövsiyə edib ki, özlərini halsız hiss edən şəhər sakinləri dərhal təcili yardıma zəng eləsinlər.
Rusiya İngiltərə üçün casusluq keçmiş məhkum agentin halının pisləşməsinə nəyin səbəb ola biləcəyi haqqında "heç bir məlumatının" olmadığını bildirib. Rəsmi Kreml polis istintaqı ilə əməkdaşlıq etməyə hazır olduğunu söyləyib.
Sergey Skripal ilə bağlı yaşananlara münasibət bildirən Rusiyanın Britaniyadakı səfirliyinin sözçüsü isə deyib ki, nə Skripalın yaxınları, nə də Britaniya hökumətindən bu hadisə ilə bağlı heç kim səfirliyə müraciət etməyib.
İngiltərə xarici işlər naziri Boris Conson isə Sergey Skripalın zəhərlənməsində Moskvanın barmağ olduğu sübut ediləcəyi halda, İngiltərəni Rusiyada keçiriləcək futbol üzrə Dünya Kubokundan imtina edəcəyini bəyan edib. Vəziyyətin ciddi olduğunu deyən Conson, olayda hər hansı bir dövlətin əli olduğu ortaya çıxacağı təqdirdə, buna sərt cavab verəcəyini bildirib.
Qeyd edək ki, Rusiya hərbi kəşfiyyat orqanlarında çalışmış Sergei Skripal 2006-cı ildə 13 il müddətinə azadlıqdan məhrum edilmişdi. O, Rusiyanın gizli agentlərinin kimliyi barədə məlumatları Britaniyanın gizli kəşfiyyat xidmətinə ötürməkdə ittiham olunub.
2010-cu ildə ABŞ-da tutulan 10 rus casusu Avstriyanın paytaxtı Vyanada Rusiyanın casusluqda ittiham edib həbsxanaya saldığı 4 nəfərlə dəyişdirilib. Dəyişdirilmə prosesində azadlığa buraxılan 4 məhbusdan biri də Sergey Skripal olub. Bundan sonra Skripal Britaniyaya sığınıb.
Onu da xatırladaq ki, bundan bir neçə il əvvəl Britaniyaya sığınmış və Rusiyanın casusluqda ittiham etdiyi Aleksandr Litvinenko naməlum maddədən zəhərlənmişdi. Rusiyalı dissident və keçmiş kəşfiyyatçı radioaktiv maddə tökülmüş çaydan içdikdən sonra halı kəskin pisləşmiş və sonra xəstəxanada vəfat etmişdi.
