Cənubi Koreya və Şimali Koreya gələn ayın sonunda liderlər sammitində bir araya gəlməklə bağlı razılığa gəlib. Baki-xeber.com xəbər verir ki, Cənubi Koreya xəbər agentliyi “Yonhap”, iki ölkə başçısının aprelin sonunda liderlərinin iştirak edəcəyi zirvə toplantısında görüşəcəyini yazıb.
Cənubi Koreyanın təhlükəsizlik məsələləri üzrə baş müşaviri Çanq Eu-yonq zirvə görüşünün iki ölkə sərhədindəki Panmunjeom birgə təhlükəsizlik zonasında keçirilməsinin qərara alındığını açıqlayıb.
Şimali Koreya rəhbərliyi üzərinə Cənubi Koreyaya qarşı nüvə silahından istifadə etməməyi, Amerika Birləşmiş Ştatları ilə (ABŞ) razılaşarlarsa, nüvə və raket sınaqlarını dayandırmaq öhdəliyini götürüb. Çanq Eu-yonq deyib ki, Pxenyan ölkəyə qarşı hərbi təhlükələrin azaldığı təqdirdə, nüvə proqramını davam etdirməyə ehtiyacın olmadığına işarə edib. Çanq əlavə edib ki, Şimali Koreya nüvəsizləşdirilmə və ABŞ-la münasibətlərin normallaşdırılmasını müzakirə etməyə hazırlıq göstərib.
İki ölkə lideri bir-birilə məsləhətləşmələr aparmaq və hərbi gərginliyi azaltmaqla bağlı xüsusi xətt yaradılması ilə bağlı da qərar verib.
Şimali Koreya rəhbərliyindən bu addımlar Cənubi Koreyadan xüsusi nümayəndə Çunq Munun (Chung Moo) rəhbərliyi ilə 4 nəfərlik rəsmi heyətin Pxenyana iki günlük səfərdən sonra atılmağa başlayıb.
ABŞ prezidenti Donald Tramp isə Şimali Koreya ilə “mümkün inkişaf”ın əldə edildiyini bildirib, lakin Pxenyanla bağlı müsbət işarələrin “yanlış ümid” ola biləcəyinə dair xəbərdarlıq edib.
ABŞ prezidenti Twitter səhifəsində mesajında yazıb: “Uzun illərdən bəri ilk dəfədir ki, bütün maraqlı tərəflər ciddi səy göstərir. Dünya baxır və gözləyir! Bəlkə də bunlar `yalan ümidlər`dir, amma ABŞ bütün istiqamətlərdə səy göstərməyə hazırdır!”
Onu da qeyd edək ki, Şimali Koreya Seulun bəyanatını hələlik şərh etməyib. Lakin təsdiq edilsə, bu, Kim Yonq Unun siyasətində əhəmiyyətli dəyişikliyin baş verməsindən xəbər verir. Keçən həftə Şimali Koreya ABŞ-la dialoqa başlamağa hazır olduğunu bildirib, lakin danışıqlar üçün hər hansı ilkin şərti rədd edib. ABŞ Pxenyanla danışıqlardan öncə Şimali Koreyanın ilk növbədə nüvə proqramına son qoymalı olduğunda israr edir.
“Amerikanın Səsi”nə müsahibə verən Merilend ştatından demokrat senator Ben Kardin Seulun açıqlamasını “müsbət işarə” kimi qiymətləndirib və Tramp administrasiyasını “bu imkandan istifadə etməyə" çağırıb: “Biz bu böhranın sona çatdırılmasının yeganə məntiqli yolunun diplomatiyadan ibarət olduğunu hesab edirik. Buna başlamaq üçün Şimali Koreya öz nüvə proqramını dondurmalıdır”.
