Rusiyanın “Vaqner qrupu” adlandırılan özəl hərbi kompaniyasın gizli bazasının görüntüləri ortaya çıxıb.
Baki-xeber.com-un xəbərinə görə, bu görüntüləri təsadüf nəticəsində Znak.com saytının müxbiri əldə edib. Xəbərə görə, Krasnodar vilayətində yerləşən bazanın ərazisinə daha öncə heç bir jurnalist yaxınlaşa bilməyib. Xəbərdə deyilir ki, xaricə ödəniş qarşılığında döyüşməyə gedən hərbçilər məhz bu bazadan göndərilir.
Lenta.ru saytı isə Krasnodardan 30 kilometrlik məsafədə yerləşən bazanın sputnik görüntülərini əldə edib. Saytın yazdığına görə, baza düşərgəsinə daxil olmaq üçün hərbçilərin qoruduğu iki nəzarət-buraxılış məntəqəsini “dəf etmək” lazımdır. Bu zaman isə adətən parol kimi dünyadakı qaynar nöqtələrin adı çəkilir. Elə sayt müxbirini də “Suriyaya” frazasının ardından baza ərazisinə buraxıblar. Müxbirin sözlərinə görə, baza 3 ikimərtəbəli kazarmadan ibarətdir və ərazi şəbəkə ilə hasara alınıb. Maraqlıdır ki, ərazidəki videomüşahidə kameraları ətrafa deyil, məhz ərazinin daxilinə tuşlanıb ki, bu da içəridəkilərin çöldən deyil, məhz baza daxilindən ehtiyat etdiyindən xəbər verir. Yerli sakinlərdən biri sayta danışıb ki, “Vaqner qrupu”nun bazası burada təxminən 5 il qabaq - Ukrayna hadisələrindən öncə peyda olub. Onun sözlərinə görə, buradakı döyüşçülər bir-birini yalnız təxəllüsləri ilə tanıyır, görəvləri ilə bağlı hər şeyi gizli saxlayırlar. Aralarındakı tanınma nişanı isə jetonlardır. Əvvəllər buradakı döyüşçülər aylıq 400 min rubl məvacib alırmış, hazırda bu məbləğ yarıbayarı azalıb. Hər ölən döyüşçünün ailəsinə isə daha öncə 5 milyon rubl verilirdi ki, hazırda bu məbləğ 3 milyona düşüb. Sayta danışan şəxsin sözlərinə görə, hazırda təşkilat döyüşçüləri əsasən Afrikaya təlimçi qismində göndərir.
Özəl hərbi qrupun “Vaqner qrupu” adlandırılması isə onun rəhbəri Dmitri Utkinin adı ilə bağlıdır. Belə ki, “Vaqner” onun hərbi təxəllüsüdür. Qrupun döyüşçülərinin indiyə kimi Krımda, Donbasda və Suriyada döyüşdüyü bildirilir. Xəbərdə o da ehtimal olunur ki, hazırda təşkilat döyüşçülərini Cənubi Sudana – prezident Ömər əl-Bəşərin tərəfində döyüşməyə göndərir.
