Uzun müddətdir müzakirə edilən ABŞ-ın Suriyanı parçalamaq üçün gizli planı olduğuna dair xəbərlər təsdiqlənməyə başlayıb. Artıq ABŞ planın detallarını müttəfiqləri ilə müzakirəyə də çıxarıb. Baki-xeber.com xəbər verir ki, bu barədə Livanın “Al Akhbar” xəbər portalı məlumat yayıb.
Portal İngiltərənin Vaşinqtondakı səfirliyindən aldığı bir teleqrafa istinadən yazır ki, ABŞ dövlət katibinin müavini Devid Satterfield yanvarın 11-də bəzi Qərb və Yaxın Şərq ölkələri nümayəndələri ilə Vaşinqtonda gizli görüş keçirib. Görüşdə ABŞ-ın Suriyanın bölünməsinə dair strategiyası müzakirə edilib. İngilis diplomat Benjamin Normanın imzası olan teleqrafa görə, ABŞ, İngiltərə, Fransa, Səudiyyə Ərəbistanı və İordaniyadan olan "kiçik bir qrupun" ilk görüşündə bir sıra qərarlar qəbul edilib.
Teleqrafda ABŞ cəbhəsinin Suriya, eləcə də Türkiyə, Rusiya və İran başda olmaqla bölgə ilə bağlı plan və hədəfləri yer alır.
Sənədə görə, Devid Satterfield, İŞİD üzərində qazanılan qələbəyə baxmayaraq, ABŞ prezidenti Donald Trampın Suriyada Amerika hərbi varlığının saxlanılması barədə qərar verdiyini təsdiqləyib. O, bunun ABŞ-a illik 4 milyard dollara başa gələcəyini deyib.
Sənəddə deyilir ki, ötən ay ABŞ hərbi aviasiyasının Suriyanın Deyrizor bölgəsində Əsəd rejimi əsgərlərini və Rusiyanın muzdlu ordusu “Vaqner qrupu”nun döyüşçülərini vurması, faktiki olaraq Fəratın şərqi üçün sərhəd xəttinin çəkilməsi cəhdi idi. ABŞ Fəratın qərbi və şərqi arasında bir atəş xətti yaratmağa çalışır. Amerikalılar altı həftə əvvəl “Suriya qrupu”ndakı müttəfiqlərinə növbəti hədəfin ölkənin şərqini qalan hissəsindən ayırmaq olduğunu söyləyib.
Sənəddə Suriyada həyata keçiriləcək 5 mərhələdən bəhs edilir. Bunlar Suriyanı bölmək, Türkiyəni nəzarət altına almaq, BMT-nin Suriya üzrə xüsusi nümayəndəsi Stefan de Misturanı ABŞ-ın məqsədləri üçün istiqamətləndirmək, Soçi prosesini (Rusiya, İran və Türkiyə iştirak edir) sabotaj etmək və Suriya müxalifətini təsir altına alınmasından ibarətdir.
Qrupun hədəfində, sənəddə "Soçidən istifadə etmək və sabotaj etmək" başlığı ilə verilən, Türkiyə, Rusiya və İranın Astanadan sonra başlatdığı Soçi prosesi də var. Soçi prosesinin əhəmiyyətini heçə endirmək üçün Cenevrə prosesini yenidən canlandırmaq nəzərdə tutulur.
ABŞ PKK/PYD terror təşkilatını da Cenevrə prosesinə daxil etməyi planlaşdırır. Türkiyənin buna mane olduğunu deyən ABŞ nümayəndəsi, Türkiyə-Amerika əlaqələrinin onsuz da pis olduğunu və yaxşıya doğru getməyəcəyinə qəti əmin olduğunu bildirib.
İordaniya nümayəndəsinin "bütün zamanların ən gizli ictimai görüşü" adlandırdığı ilk yığıncaqda Almaniya, Misir və Türkiyənin də bu qrupa dəvət edilməsi müzakirə edilib. Ancaq Türkiyə ilə müzakirələrin çətin keçəcəyini nəzərə alan qrup iştirakçıları ilkin mərhələdə Misir və Almaniyanın dəvət edilməsinə qərar verib.
ABŞ-ın Suriya və bölgəyə dair plan və hədəflərinin yer aldığı teleqrafı çəkən Benjamin Norman İngiltərənin Vaşinqtondakı səfirliyində çalışır.
Qeyd edək ki, bundan əvvəl Rusiya Təhlükəsizlik Şurası ABŞ-ın Suriyada YPG/PYD terror təşkilatının nəzarət etdiyi bölgədə indiyə qədər 20-ə yaxın hərbi baza qurduğunu açıqlayıb. Məlumatda həmçinin bildirilir ki, ABŞ kürd yaraqlılara külli miqdarda müasir silah yardımını da davam etdirir.
TAHİR
