Rusiya, Kiyev tərəfindən qəbul edilmiş Ukraynanın şərqindəki Donbasın inteqrasiyasını nəzərdə tutan qanuna sərt reaksiya verib. Baki-xeber.com xəbər verir ki, bu barədə Rusiya Xarici İşlər Nazirliyi bəyanat yayıb.
Bölgədə gərginliyin artması risqi olduğunu bildirən Rusiya, Qərbi ölkədə baş verə biləcək fəlakətli ssenarinin qarşısını almağa çağırıb.
"Qanunun tətbiq edilməsi Ukraynanın şərq hissəsində gərginliyin artması risqinə gətirib çıxaracaq. Ümid edirik ki, Qərb ölkələri məsələyə diqqət yetirib, Avropanın sabitliyi və təhlükəsizliyi üçün gözlənilməz nəticələrə səbəb ola biləcək, Ukraynada fəlakətli ssenarini önləmək üçün Kiyev üzərindəki təsirindən istifadə edəcək" - Rusiya XİN-nin bəyanatında deyilir.
Rusiya, Kiyevin yeni qanunu qəbul etməklə bölgədəki böhranı güc yolu ilə həll etmək istədiyini iddia edir: "24 fevral 2018-ci ildə Donbasın inteqrasiyası ilə bağlı qalmaqalı qanun qüvvəyə mindi. Beləliklə, Kiyev nəhayət, ölkənin cənubundakı böhranı hərbi yolla həll etmək istədiyini təsdiqlədi. Poroşenko Minsk razılaşmalarını pozdu".
Qeyd edilir ki, qanun Kiyevin nəzarəti xaricində olan Donetsk və Luqansk bölgələrinin güc yolu ilə ələ keçirilməsi üçün şərtləri müəyyənləşdirir.
Yeni qanuna əsasən, Donbass zonalarının sərhədləri və yaşayış yerləri Müdafiə Nazirliyinin və Baş Qərargahın təklifi ilə Ukraynanın prezidenti tərəfindən müəyyənləşdiriləcək. Qanun həmçinin, prezidentə bölgədə güc tətbiq etmək səlahiyyəti də verir.
Bundan əvvəl isə, Ukrayna Təhlükəsizlik Xidməti (SBU) Rusiya xüsusi xidmət orqanlarının Ukraynada kilsələr arasında qarşıdurma yaratmağı planlaşdırdığına dair məlumat yayıb. SBU rəsmisi Viktor Kononenko bildirib ki, Rusiya ölkədə sabitliyi pozmaq və Ukraynanı dünyada gözdən salmaq üçün planlar qurur.
Rusiya xüsusi xidmət orqanları Ukrayna pravoslavlığına qarşı planlar hazırladığını iddia edən Kononenko, bu istiqamətdəki cəhdlərin yaxın günlərdə daha da artacağını bildirib.
"Bunun üçün ruslar kilsə və kilsə təşkilatlarının imkanlarından, vətənpərvər strukturlardan istifadə etməyi planlaşdırır" – deyə o bildirib.
Rusiyanın, Moskva patriarxlığına bağlı Ukrayna pravoslav kilsələrindən təxribat məqsədilə istifadə etməyi planlaşdırdığını iddia edən Kononenko, Rusiya xüsusi xidmət orqanlarının Ukraynada Moskva və Kiyev patriarxlığına bağlı kilsələr arasında münaqişənin böyüməsi üçün planlar hazırladığını deyib.
Ukrayna ordusunun Baş Qərargah rəisi Viktor Mujenko isə bildirib ki, Ukrayna ordusu Rusiyanın genişmiqyaslı hücumuna hazır olmalıdır.
“Ekspertlər Rusiyanın hücuma üç il sonra hazır olacağını deyirlər. Biz isə fərqli düşünür və müxtəlif miqyaslı provokativ fəaliyyətləri nəzərə alırıq. Bizim bu hücumlara qarşı fərqli variantlarımız mövcuddur”, – deyə o bildirib.
Bir neçə gün əvvəl isə Ukraynanın Xarici İşlər Nazirliyi martın 18-də Rusiyada prezident seçkilərinin Krımda da keçirilməsinə etiraz olaraq rəsmi Moskvaya nota verib. Ukrayna XİN başçısı Pavel Klimkinin sözlərinə görə, notada həmçinin Donbas ətrafında da seçkiyə hazırlıq prosesinə etiraz olunub: “Kiyev işğal olunmuş Krımda keçiriləcək prezident seçkilərində iştirak edən bütün şəxslərə müvafiq sanksiyalar tətbiq edəcək”.
