Suriyanın rəsmi dövlət televiziyası PKK terror təşkilatının Suriya qolu PYD/YPG və Suriya prezidenti Bəşər Əsəd arasında Afrinlə bağlı razılaşma əldə edildiyini bəyan edib. Baki-xeber.com xəbər verir ki, dünən dövlət televiziyası yaxın saatlarda Bəşər Əsədə bağlı “xalq qüvvələri dəstələri” adlandırdığı qüvvələrin Türkiyə Hərbi Qüvvələrinin əməliyyatlarına qarşı Afrinə girəcəyini bildirib.
Məlumatlara görə, rejim Afrinə girməsi üçün PKK qarşısında silahı yerə qoyması da daxil, bir sıra şərtlər qoyub. Afrindəki PKK-çıların və bütün silahlı şəxslərin silahlarını təslim etməsinin tələb edildiyi şərtlərə görə, bölgədəki 52 hərbi baza Suriya rejiminin nəzarətinə keçməli, bütün məktəblər və dövlət obyektləri yenidən rejimin nəzarətinə qaytarılmalıdır.
PYD-nin Afrindəki nümayəndəsi Hevi Mustafa isə bildirir ki, hələlik razılıq əldə olunmayıb və danışıqlar davam edir.
Yayılan başqa bir məlumata görə, Əsəd rejimi Afrinə “Şebbihalar” adlı silahlı qrupu soxacaq. Suriyada 8 illik müharibənin ilk illərində adları tez-tez hallanan "Şebbihalar" qrupu 1975-ci ildə Suriyanın Livana girməsindən sonra yaranıb. Birbaşa Bəşər Əsədə bağlı olduğu bildirilən “Şebbiha” təşkilatının üzvlərinin əksəriyyətini ordudan qovulmuş keçmiş əsgərlər təşkil edir.
Türkiyə Silahlı Qüvvələri isə bu açıqlamanın ardından Əsədə bağlı qüvvələrin keçməsi gözlənən bölgədə bombardmanları artırıb.
Məsələyə münasibət bildirən Türkiyənin xarici işlər naziri Mövlud Çavuşoğlu bəyan edib ki, Əsəd tərəfdarları Afrinə YPG-ni təmizləmək üçün girəcəksə, problem yoxdur: “Yox, YPG-ni qorumaq üçün girirsə, Türkiyə əsgərini heç kim dayandıra bilməz”.
Suriya televiziyasının açıqlamasından sonra yayılan başqa bir xəbərlər isə Əsəd-PPK çirkin işbirliyini tam çılpaqlığı ilə ortaya qoydu. Məlumatlara görə, rejim Suriyanın müxtəlif bölgələrindən topladığı PPK terrorçularını avtobuslarla Afrinə göndərməyə başlayıb. Bununla bağlı Hələbdə çəkilmiş görüntülər də yayılıb. İddialara görə, Türkiyənin terrorçuların siyahısına daxil etdiyi Mehrac Ural və ona bağlı terrorçular da Afrinə göndəriləcək.
Qeyd edək ki, hələ ötən həftə Bəşər Əsəd rejiminin PKK-nın Suriya qanadı YPG-ni Afrində Türkiyə ordusu və Azad Suriya Ordusunun hücumlarından qorumaq üçün PKK ilə işbirliyinə başladığına dair məlumatlar yayılmışdı. Livanın "Al-Mayadeen" televiziyası isə iddia edirdi ki, Əsədə bağlı silahlılar müşahidə aparmaq üçün YPG/PYD terror təşkilatının nəzarətində olan Afrinə göndərilib. Kanal bölgədəki jurnalistlərə istinadən Suriya ordusunun YPG terrorçularına dəstək vermək üçün Afrinə qoşun göndərəcəyini bildirirdi.
Bundan əvvəl Rusiyanın rəsmi RİA”Novosti” xəbər agentliyi, Əsədlə PYD terrorçuları arasında əldə edilən razılaşmaya əsasən, Suriya ordusunun yaxın günlərdə Afrinə girəcəyinə dair məlumat yaymışdı: "Afrin bölgəsinin Türkiyə sərhədinə qədər olan torpaqları Dəməşq rejiminə bağlı silahlılara təslim ediləcək. Suriya ordu birlikləri yaxın günlərdə Afrin bölgəsində nəzarəti ələ almağa başlayacaq".
Daha sonra isə mediada tərəflərin razılaşmadığına dair xəbərlər yayılmışdı.
Rusiyalı ekspert Sergey Demidenko isə Suriya ordusunun Afrinə girmə ehtimalının aşağı olduğunu deyir. Onun fikrincə, bu birbaşa Türkiyə ilə müharibə təhdidi daşıyır: "Proseslərin bu istiqamətdə getmə ehtimalı çox aşağıdır. Çünki Suriya ordusunun bölgədə döyüşməsi üçün qalan tək tərəf Türkiyədir. Məncə, Suriya ordusu belə bir hərbi qarşıdurmaya getməz. Ayrıca, Suriya qüvvələrinin böyük bir hissəsi Əsəd tərəfdarı paramilitar qruplardan ibarətdir. Döyüşə hazır vəziyyətdəki nizamlı birliklər çox az qaldı, ələvilərdən ibarət Respublika Mühafizəçilərindən başqa".
Demidenkonun fikrincə, Türkiyənin Afrində keçirdiyi hərbi əməliyyatlara qarşı Əsəd-PKK işbirliyi iddiaları Suriya ordusu və Dəməşqin həm siyasi, həm də hərbi mənada güclü olduğunu göstərmək məqsədi daşıyır. Onun sözlərinə görə, bu cür açıqlamalar sadəcə, daxili auditoriyaya hesablanıb. Digər tərəfdən, Suriya ordusu kürdlər üçün müttəfiq olmaq baxımından ən yaxşı variant deyil.
