ABŞ başqa ölkələrdəki seçkilərə müdaxilə edib. Baki-xeber.com xəbər verir ki, belə bir etirafla ABŞ Mərkəzi Kəşfiyyat Təşkilatının (CIA) keçmiş direktoru Ceym Vulsi çıxış edib.
Amerikanın “Fox” televiziyasına açıqlamasında Rusiyanın Amerikadakı seçkilərə müdaxiləsi iddialarını dəyərləndirən Ceym Vulsi, ABŞ-ın da başqa ölkələrdəki seçkilərə müdaxilə etdiyini etiraf edib.
C.Vulsi ABŞ-ın başqa ölkələrdəki seçkilərə qarışıb-qarışmadığına dair suala cavabında, "Ehtimal ki, bəli. Ancaq kommunistlərin iqtidara gəlməsinə mane olmaq üçün, sistemin yaxşılığı üçün, yəni demokratiyanın xeyrinə, yalnız yaxşı bir məqsəd üçün" – deyə bildirib.
Bill Klintonun prezidentliyi dövründə CIA direktoru vəzifəsində çalışan C.Vulsinin sözləri, Rusiyanın Londondakı səfirliyinin sosial media hesabından “hər şeyi açıq etiraf edir" başlığı ilə paylaşılıb.
Qeyd edək ki, Moskvanın təkziblərinə baxmayaraq, Amerika kəşfiyyatı Rusiyanın Trampın leyhinə seçkilərə müdaxilə etdiyində israr edir.
Iki gün əvvəl isə Rusiyanın ABŞ-da 2016-cı il prezident seçilərinə müdaxiləsini araşdıran xüsusi prokuror Robert Müllerin təhqiqat qrupu 13 Rusiya vətəndaşı və 3 rus şirkətinə qarşı Amerikanın siyasi prosesləri və seçkilərinə müdaxilə ittihamları irəli sürüb. İttihamlara konspirasiya, bank və pulköçürmə fırıldaqçılığı, habelə şəxsi məlumatların oğurlanması daxildir.
İttihamnaməyə əsasən, 2016-cı ildə təqsirləndirilən şəxslərin əməliyyatları Trampın namizədliyini "dəstəkləməyə" və onun Demokrat rəqibi Hillari Klintonu "pisləməyə" yönəlib. Onlar həmçinin Demokrat namizəd Berni Sandersə dəstəyi artırmağa və Respublikaçı namizədlər "Ted Kruz və Marko Rubionu gözdən salmağa" çalışıblar.
37 səhifəlik ittihamnamə indiyədək ABŞ hökumətinin Rusiyanın 2016-cı ilə seçkilərinə müdaxiləsini ən ətraflı şəkildə detallayan sənəddir.
Dünən isə Almaniyada Rusiyanın və ABŞ-ın yüksək vəzifəli rəsmiləri arasında ABŞ Ədliyyə Nazirliyinin 13 Rusiya vətəndaşına rəsmi ittiham irəli sürməsi ilə bağlı mübahisə yaranıb. ABŞ prezidenti Donald Trampın milli təhlükəsizlik müşaviri H.R. MakMaster Münhen Təhlükəsizlik Konfransından deyib ki, “federal ittiham nümayiş etdirir ki, ABŞ getdikcə xarici casusluq və təxribatın mənbəsini müəyyən etməkdə daha çox bacarıqlı olur”.
O əlavə edib ki, Rusiyanın ABŞ seçkilərinə müdaxiləsi inkaredilməzdir.
Bu ifadədən bir neçə dəqiqə öncə isə Rusiya xarici işlər naziri Sergey Lavrov ittihamları “boşboğazlıq” adlandırıb: “Siz istədiyiniz şeyi nəşr edə bilərsiniz, gördüyümüz odur ki, bu ittihamlar, bəyanatlar getdikcə daha çox artır”.
