İsrail-Suriya sərhədində aylardır davam edən gərginlik bu səhər açıq qarşıdurmaya çevrilib. İsrail ordusu Suriyada İrana aid pilotsuz təyyarəni vurub.
Baki-xeber.com xəbər verir ki, bu xəbərdən qısa müddət sonra isə Suriya tərəfindən atılan bir raketlə İsrailin F-16 hərbi təyyarəsi vurulub.. Təyyarənin dağıntıları İsrailin şimalındakı Harduf kəndinə, bəzi hissələri isə İordaniyaya düşüb.
İsrailin Müdafiə Qüvvələrinin sözçüsü Conatan Konrikus İsrailin İranın təcavüzünə cavab olaraq Suriyada bir sıra Suriya və İran hədəflərinə hücum etdiyini bildirib. Konrikus İranın “İsrailin suvernerliyinin pozulmasına görə cavabdeh olduğunu” deyib.
İsrail ordusu Suriyadan havaya qalxan və İrana aid olduğu bildirilən bir PUA-nı İsrail hava məkanını pozduğu üçün vurduğunu bildirib. Buna cavab olaraq Suriyada İrana məxsus hədəflərə hava hücumu təşkil olunub.
Qısa müddət sonra isə Suriyada İsrail ordusuna məxsusu təyyar vurulub. Faktı təsdiqləyən İsrail tərəfi bildirib ki, F-16 təyyarəsi Suriyada İrana aid olan hədəfləri və pilotsuz təyyarəni vura zaman Suriya HHMS-in hücumuna məruz qalıb. Təyyarə İsrail ərazisinə düşüb və pilotlar xilas ediliblər. Onların hər ikisinin vəziyyətinin qənaətbəxş olduğu vurğulanır.
Suriya tərəfi isə, ölkənin havadan müdafiə sisteminin İsrailin birdən çox döyüş təyyarəsini vurduğunu bəyan edib. Bildirilir ki, təyyarələr İsrailin ölkədəki bəzi hərbi bazalara hücumuna görə vurulub.
Təyyarənin vurulmasından dərhal sonra Israil qırıcıları Suriyanın paytaxtı Dəməşq və Hama yaxınlığında hərbi obyekləri bombalamağa başlayıb. Israilin vurduğu 12 hərbi hədəfdən dördünün İrana məxsus olduğu bildirilir. Bununla bağlı Israil tərəfinin açıqlamasında deyilir: “Əsəd rejiminə aid üç havadan müdafiə sistemi və İrana aid dörd hərbi baza vurulub”.
Əsəd rejiminə aid SANA xəbər agentliyi də İsrail qırıcılarının Suriyada İrana məxsus bəzi hədəfləri vurduğunu bəyan edib.
O da bildirilir ki, Israilin hücumu nəticəsində Əsədin sarayının yaxınlığında 6 böyük partlayış baş verib.
İsrail Müdafiə Qüvvələrinin sözcüsü general Ronen Manelis deyib: “İranı regionu sonu bəlli olmayan vəziyyətə salır. Biz müxtəlif insidentlərə hazırıq. Bu insidentə görə kim məsuliyət daşıyırsa, o da bədəlini ödəyəcək.”
“İsrail Müdafiə Qüvvələri İsrailin hava məkanına müdaxilə cəhdlərinə qarşı əməliyyatlarını davam edəcək və İsrailin suverenliyinin pozulmasını qətiyyətli bir şəkildə qarşısını alacaq,” deyə sözcü bildirib.
Bu arada, Suriya qoşunlarının İsrailin F-16 hərbi təyyarəsini vurmasından sonra, ABŞ-ın Orta Şərqdəki ən böyük hərbi bazası olan Qətərdəki Al Hudedi hərbi hava bazasındakı qüvvələri yüksək hazırlıq vəziyyətinə gətirilib. Qeyd edilir ki, ABŞ-ın bazadakı qüvvələrinə Körfəz müharibəsindən bu yana ilk dəfə belə bir yüksək səviyyəli həyəcan siqnalı verilib.
Gözlənildiyi kimi, İran və Rusiya Yaxın Şərqdə vəziyyəti daha da gərginləşdirən hadisələrə sərt reaksiya verib. İsrailin Irana aid pilotsuz təyyarəni vurduğunu və İranı “atəşlə oynamaqla” təhdidinə qarşı iranlı general Hüseyn Selami ABŞ və İsraili hədələyib. O, ABŞ-ın bölgədəki bütün hərbi bazalarını vura bilmək gücündə olduqlarını, İsraili isə cəhənnəmə çevirə biləcəklərini deyib.
Rusiya Xarici İşlər Nazirliyi isə, narahatlığını bildirərərk, tərəfləri gərginliyi azaltmağa çağırıb. Moskva bəyan edib ki, bütün ölkələr Suriyanın suveren hüquqlarına hörmət göstərməlidir.
Bundan başqa, Moskva, Suriyadakı Rusiya hərbi bazalarına hər hansı bir təhlükənin qəbuledilməz olduğunu bildirib.
"Suriyadakı qanuni hökumət tərəfindən terrorla mübarizəni dəstəkləmək üçün çağırılan rus əsgərlərinin həyatı və təhlükəsizliyi üçün hər hansı bir təhlükəli vəziyyətin yaradılması qətiyyən qəbul edilməzdir” – deyə XİN-in bəyanatında deyilir.
Qeyd edək ki, 2006-cı ildən indiyədək ilk dəfədir ki, İsrail hərbi hava qüvvələrinə məxsus obyekt döyüş vaxtı vurulub. 2006-cı ildə İsrailin hərbi helikopteri Livanda Hizbullah tərəfindən raketlə vurulmuşdu. Bu hadisədə bir qadın mühəndis də daxil olmaqla helikopterdəki 5 nəfərlik heyət bütünlüklə həlak olmuşdu.
TAHİR
