Ukrayna prezidenti Vladimir Zelenski Krım tatar türkü Rüstəm Umerovun müdafiə naziri təyin edilməsi barədə qərar qəbul edib.
Bu barədə Zelenski sosial media hesabındakı paylaşımında bildirib: "Ukraynanın müdafiə nazirini dəyişməyə qərar verdim. Oleksiy Reznikov 550 gündən çox davam edən genişmiqyaslı müharibəni yaşadı. Hesab edirəm ki, nazirliyin həm orduya, həm də cəmiyyətə qarşı yeni yanaşmalara və yeni qarşılıqlı fəaliyyət formalarına ehtiyacı var. İndi nazirliyə Rüstəm Umerov rəhbərlik etməlidir”.
Zelenski parlamentin qətnaməni dəstəkləyəcəyinə ümid etdiyini bildirib. Oleksiy Reznikov 2021-ci ildən Ukraynanın müdafiə naziridir.
Rüstəm Umerov 1982-ci ildə Özbəkistanın Səmərqənd şəhərində anadan olub. O, Ukrayna tarixində nazir postunu tutan ilk Krım tatarıdır. Krım tatar türk xalqının lideri və Ukrayna deputatı Mustafa Əbdülcəmil Krımoğlunun müşaviri olan Umerov əvvəllər Ukrayna Dövlət Əmlak Fondunun sədri və Ukrayna prezidentinin xüsusi nümayəndəsi vəzifələrində çalışıb.
Prezidentin Məşvərət Şurasının Ukraynanın ərəb və müsəlman dövlətləri ilə qarşılıqlı əlaqəsi üzrə komissarı Umerov 2022-ci ilin fevralından Ukraynanın Rusiya ilə danışıqlar qrupundadır.
Müharibə gedən ölkədə türk əsilli adamı müdafiə naziri təyin etməklə Zelenski nə demək istəyir?
Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki, Zelenski Rüstəm Umerovun müdafiə naziri təyin edilməsi ilə bağlı parlamentə müraciət etdi ki, təsdiqlənsin: “Onu siyasətçi, ictimai xadim kimi yaxşı tanıyırsız. Bu şəxs uzun müddətdir Ukraynada yaşayır, illərlə sınaqlardan keçib, prezident özü də şəxsən tanıyır. Ümumiyyətlə, bir neçə vəzifə var ki, bütün dünyada ora təyinat olunanda hakim partiya və onun başında duran şəxs ən inanılmış, etibar edilmiş şəxslərə etimad göstərir. Bu, müdafiə və daxili işlər naziridir, xüsusi xidmət orqanlarının rəhbərləridir. Bir sözlə, kabinetin mühüm postlarına şəxsən tanıdığı şəxsləri təyin edir. Ukraynada prezidentdən sonra ən mühüm post məhz müdafiə naziridir. Bu şəxsə böyük inam var. Bundan sonra Ukrayna ordusunun həyata keçirəcəyi hücum əməliyyatlarına məhz belə etibarlı şəxsin rəhbərlik etməsi məqsədəuyğun sayılıb. Ukrayna NATO ölkələri ilə sıx əməkdaşlıq edir. Amma Ukraynaya çox da müasir silahları vermir. Onlar istəyir ki, müharibə Ukraynanın öz ərazi bütövlüyünü təmin etməsilə yekunlaşsın. Buna görə də belə bir təyinat mütləq mənada Qərb və NATO ilə razılaşdırılır. Zelenski özbaşına bu addımları atmır. Necə ki, müharibəni onlarla birgə aparır, eləcə də bu məsələdə birgə hərəkət edirlər. Deməli, bu şəxs həm də NATO- nun seçdiyi adamdır”.
Bildirilir ki, Reznikov istefa ərizəsini Ali Radanın sədrinə təqdim edib. Reznikov bu barədə açıqlamanı bazar ertəsi səhər əvvəllər Twitter kimi tanınan X platformasında verib: “Mən Ukrayna Ali Radasının spikeri Ruslan Stefançuka istefa məktubumu təqdim etmişəm. Ukraynanın müasir tarixinin ən çətin dövründə, son 22 ayda Ukrayna xalqına və ölkə ordusuna xidmət etmək mənim üçün şərəf idi. Rusiyanın müvəqqəti işğal etdiyi ərazilərin 50 faizdən çoxu artıq azad edilib. Müdafiəçilərimiz hər gün irəliləyir. Ukraynanın Avropanın şərqdəki qalxanı olduğu anlayışı var”.
Məhəmmədəli QƏRİBLİ
