Ilqar Orucov: “Son illərdə elmlər doktoru adını alanlar arasında elələri var ki, onlar hətta magistr diplomuna belə layiq deyillər”
Ali təhsilin ən yüksək pilləsi olan doktoranturaya maraq azalıb. Dəfələrlə elm adamları, təhsil mütəxəssisləri və rəsmilər bu problemi dilə gətiriblər. Milli Məclisin ötən iclasında da bu məsələyə toxunulub.
Qeyd edilib ki, fəlsəfə doktorluq dərəcəsi almaq istəyən gənclərin sayı artsa da, elmlər doktoru olmağa can atanların sayı azalıb. Maraqlıdır, elmlər doktorluğuna marağın azalmasının səbəbləri nədir?
Azərbaycan Gənc Alim, Doktorant və Magistrlər Cəmiyyətinin sədri İlqar Orucov baki-xeber.com-a bildirdi ki, elmlər doktorluğuna marağın azalmasının bir neçə fundamental səbəbi var: “İlk olaraq qeyd edim ki, iki pilləli doktorluq sisteminin hələ də Azərbaycanda mövcudluğu bu sahədə vəziyyəti daha da çətinləşdirir. Sovet dövründən qalmış formallıqlar və yorucu prosedurlar elm adamlarını bu istəkdən uzaqlaşdırır. Elm bir kənarda qalır, insanlar isə sənəd toplamaqla məşğul olur. Mən demirəm ki, bu proses asan olmalıdır, lakin elə qurulmalıdır ki, namizəd bezməsin.
Onu da deyim ki, son illər elmi jurnallarda çap olunma tələblərinin artması manipulyasiyaların çoxalmasına səbəb olub. Bu manipulyasiyalar isə elmin mahiyyətini ciddi şəkildə dəyişib. İnsanlar çalışırlar ki, məqalələri mütləq həmin jurnallarda dərc olunsun, istinad sayı artsın. Nəticədə müdafiəyə təqdim olunan işin əhəmiyyəti, faydası, elmilik səviyyəsi, tətbiq imkanları və gətirdiyi dividendlər ikinci dərəcəli məsələyə çevrilir”.
Həmsöhbətimiz onu da əlavə etdi ki, son illərdə elmlər doktoru adını alanlar arasında elələri var ki, onlar hətta magistr diplomuna belə layiq deyillər. Onun sözlərinə görə, elmi ad alan bəzi şəxslərin alimlik duruşu yoxdur, onlar üçün əsas məqsəd sadəcə diplom əldə etməkdir. Ümumiyyətlə, elmi mühitdə sərtləşmə çox vacibdir. Alim olmaq istəyən şəxs saxtakarlığa meyl etməməlidir.
Günel CƏLİLOVA
