Azərbaycan Həmkarlar İttifaqlarının İdman Təşkilatları Assosiasiyasının sədri Nadir Əliyev və “Yasamal” idman-sağlamlıq klubunun direktoru Alik Həsənovun həmin klubun istifadəsində olan keçmiş “Məhsul stadionu” adlanan ərazinin satışı adı altında sahibkarlara məxsus pul vəsaitlərini ələ keçirmələri barədə daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddələri ilə cinayət işi başlayıb.
Aparılan istintaqla Nadir Əliyevin Alik Həsənovla qabaqcadan əlbir olaraq Bakı şəhəri, Yasamal rayonu, Həsən bəy Zərdabi prospekti 69D ünvanında 1,26 hektar torpaq sahəsində yerləşən sözügedən stadion ərazisini guya həmin yerdə çoxmərtəbəli binanın inşa edilməsi məqsədilə 5 milyon 500 min manata sata biləcəklərini ayrı-ayrı sahibkarlara bildirmələrinə, həmin məsələnin həlli üçün əvvəlcə beh verilməsi, habelə Konfederasiyanın rəhbər vəzifəli şəxslərinə rüşvət qismində çatdırılması adı ilə sahibkarladan 900 min manat məbləğində pulu aldatma yolu ilə ələ keçirmələrinə əsaslı şübhələr müəyyən edilib.
Bundan başqa, istintaq zamanı Alik Həsənovun həmin vəzifədə işləyərkən eyni üsul və məqsədlə direktoru olduğu stadionun ərazisini digər sahibkara 8 milyon manata sata biləcəyini bildirməsinə, bunun üçün aidiyyəti vəzifəli şəxslərə rüşvət verilməsi və müvafiq sənədləşdirmənin aparılması adı ilə sahibkara məxsus 360 min manat məbləğində pul vəsaitini təkrarən ələ keçirməsinə də əsaslı şübhələr müəyyənləşdirilib.
Qeyd edilən hallarla bağlı toplanmış ilkin sübutlar əsasında Nadir Əliyev və Alik Həsənova müvafiq olaraq Cinayət Məcəlləsinin 178.4 (xüsusilə külli miqdarda ziyan vurmaqla dələduzluq) və 32.4, 312.1 (rüşvət verməyə təhrik etmə) və 32.4, 312.2-ci (rüşvət verməyə təkrarən təhrik etmə) maddələri ilə ittiham elan edilərək, barələrində məhkəmənin qərarı ilə həbs qətimkan tədbiri seçilib. Hazırda cinayət işi üzrə ibtidai istintaq davam etdirlir.
Qeyd edək ki, bu məsələ sosial şəbəkələrdə ciddi etirazla qarşılanıb. Hüquqşünas Aslan İsmayılov “Məhsul” stadionunu satan vəzifəli şəxslərin həbs edilməsinə münasibət bildirib:
"Bir balaca ağlı olan bu məlumatın tam olmadığını görər. Uzun illər AHKİ-də yüz minlərin yox, yüz milyonların mənimsənilməsi barədə yazdığımdan, hazırkı cinayət işini araşdıracaq şəxslərə bəzi məlumatları çatdırıram. Hələ SSRİ dövrü bütün ölkədə və respublikalarda olan əmlakların tam 3\1-i həmkarların mülkiyyətində idi. SSRİ dağılandan sonra isə Azərbaycanda mövcud olan bütün əmlakların da 3\1-i həmkarların mülkiyyətində qaldı. Bura tək stadionlar yox, ölkədə mövcud olan minlərlə sanatoriya, istirahət mərkəzləri, mehmanxanalar, uşaq bağçaları, pioner düşərgələri, şahmat məktəbləri, peşə öyrədən, musiqi dərnəkləri, məktəbləri, pioner evləri, kitab mağazaları, silahdan istifadə öyrədən tirlər, avtomobil kursları, idman zalları, mədəniyyət evləri, kitabxanalar, tibb ocaqları və digər tikililər, minlərlə avtomobil və digər texniki avadanlıqlar və s. daxil idi. 1991-ci ildə sədr seçilən şəxs həmin əmlakların çox hissəsini cürbəcür "nadir"lərin əli ilə dədə malı kimi satdı".
İdman mütəxəssisi Kənan Məstəliyev “Bakı-Xəbər”ə açıqlamasında bildirdi ki, ölkəmizdə idmana hər zaman dövlət səviyyəsində böyük qayğı və diqqət olub: “Ölkə rəhbərliyinin idmançılara göstərdiyi qayğını, ən mötəbər idman yarışlarına ev sahibliyi etməyimizi buna misal göstərə bilərik. Bu baxımdan Azərbaycan dünyada öndə gedib. Bununla yanaşı, ölkədə idman sahəsində islahatlar da həyata keçirilir. Həyata keçirilən həbsləri də idmana olan diqqətin nümunəsi kimi qəbul edə bilərik. Bir daha sübut olunur ki, idman qurğularına dövlətin ciddi nəzarəti var. Onları kimsə istədiyi formada mənimsəyib sata bilməz. Bu sahədə problemlər var. İdman çox strateji sahədi. Ölkə rəhbərliyinin göstərdiyi etimadı doğrultmaq lazımdır. İdmançılarımız bizim bayrağımızı dalğalandırır. Qeyd edilən hadisə məni çox narahat etdi. Ölkədə görülən işlərə bu şəkildə kölgə salmaq olmaz. Bu istiqamətdə yoxlamalar rayonlarda da aparılmalıdır. “Məhsul” stadionunun futbol tariximizdə xüsusi yeri olub. Orada şərait yaradılsa, uşaq futbolunu yaxşı inkişaf etdirmək olar. Çünki orada əhali sıxlığı var. İdmançı və azarkeş toplamaqla bağlı heç bir problem oomayacaq. Bu maraq futbolumuzun inkişafına töhfə verə bilər. Hərə istədiyi idman stadionunu satıb yerində bina tikmək fikirinə düşsə bizi fəlakət gözləyər. Bu istiqamətdə atılan hüquqi addımları qənaətbəxş sayıram. Belə əyri əməllərə əl atanlar mütləq cəzasını almalıdır”.
Məhəmmədəli QƏRİBLİ
