Məhərrəm Zülfüqarlı: "Bu da beynəlxalq vəziyyətlə əlaqədardır"
"İran və Azərbaycan arasında viza rejiminin ləğvi prosesi mərhələli şəkildə irəli aparılır". Xəbər verildiyi kimi, bunu İran Xarici İşlər Nazirliyinin sözçüsü Bəhram Qasımi deyib.
B.Qasımi bildirib ki, İran mümkün olduğu qədər digər ölkələrlə viza rejimini ləğv etməyə çalışır: "Bu bizim ümumi siyasətimizdir və bu məsələni digər ölkələrlə müzakirə edirik. Həmin ölkələrdən biri də Azərbaycandır. Danışıqlar aparılıb və qərara alınıb ki, viza rejiminin ləğvi prosesi mərhələli şəkildə aparılsın. İran Azərbaycanla vizasız rejimin tətbiq olunması ilə bağlı əlavə tədbirlərin qəbul olunmasının tərəfdarıdır. İki ölkə arasında münasibətlərin xüsusiyyətini nəzərə alaraq ümid edirəm ki, vizaların ləğv olunması barədə razılıq əldə oluna bilər".
Onun sözlərinə görə, bu istiqamətdə atılan ilk addım viza alınması üçün tələb olunan şərtlərin yüngülləşdirilməsi ola bilər. Mətbuat katibi qeyd edib ki, İran bu proqramı Rusiya ilə də həyata keçirir.
Bütövlükdə iki ölkə arasında viza rejiminin mərhələli şəkildə ləğv edilməsini ekspertlər necə dəyərləndirir?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, iki ölkə arasında viza rejiminin ləğvi faydalıdır: "Əvvəla İran Azərbaycan vətəndaşları üçün viza rejimini ləğv edib. İndi Azərbaycan vətəndaşları istədiyi vaxt xarici pasportla İrana gedə bilər. Türkiyə də birtərəfli qaydada Azərbaycan üçün viza rejimini ləğv edib. Sadəcə olaraq Azərbaycan müəyyən səbəblərdən İran və Türkiyə vətəndaşları üçün viza rejimini ləğv etmir. Bu da beynəlxalq vəziyyətlə əlaqədardır. Yaxın Şərqdə gedən mürəkkəb proseslər, İŞİD təhlükəsi və Türkiyənin, İranın həmin ölkələrlə həmsərhəd olması hələlik buna imkan vermir. Çünki İraqda, Suriyada müharibə gedir. Birdən-birə İranla viza rejiminin ləğvi problem yarada bilər. Ancaq yəqin ki, müharibə dayanarsa, regionda sülh yaranarsa, Azərbaycan İran vətəndaşlarına viza rejimi tətbiq etməyəcək. Yəni bu addımı ata bilər. Hesab edirəm ki, Azərbaycan İranla viza rejimini mərhələli şəkildə ləğv edə bilər".
Vidadi ORDAHALLI
