Məlumat verildiyi kimi, Azərbaycan Müdafiə Nazirliyinin nümayəndə heyəti "Azərbaycan-Pakistan İşçi Qrupunun 7-ci Görüşü"ndə iştirak etmək məqsədilə Pakistan İslam Respublikasına səfər edib. Burada keçirilən görüş zamanı ikitərəfli hərbi əməkdaşlığın cari vəziyyəti və perspektivləri, eləcə də görüləcək birgə tədbirlər nəzərdən keçirilib.
Tədbirin yekununda Azərbaycan Respublikasının Müdafiə Nazirliyi ilə Pakistan İslam Respublikasının Birləşmiş Qərargahı arasında ikitərəfli hərbi əməkdaşlıq Planı imzalanıb. Bu fonda isə artıq o da məlumdur ki, Azərbaycan Pakistandan silah almağı planlaşdırır. Əldə edilmiş razılaşmaya əsasən, Azərbaycan qarşıdan gələn beş ildə Pakistan silahlarına 500 milyon dollar xərcləyəcək. Konkret hansı silahların alınacağı isə hələ dəqiq bəlli deyil. Bəzi təhlilçilər xərclənməli olan pulun məbləği üzərində mülahizə yürüdərək bildirir ki, burada söhbət, böyük ehtimalla, Pakistandan orta mənzilli raket və raket sistemlərinin alınmasından gedə bilər. O da sirr deyil ki, Pakistan məhz raket texnologiyasında Azərbaycan üçün ən münasib tərəfdaşlardan biridir. Bu ölkənin hərbi sənayesi Çin texnologiyası əsasında birpilləli, yaxın mənzilli ballistik raketlərdən tutmuş orta mənzilli ballistik raketlərə qədər istehsal edir. Bunlara "Xətf-1", "Xətf-2", "Xətf-1A", "Xətf-4", "Xətf-9", "Xətf-6" raketləri daxildir. Doğrudur, bu raketlərin bəziləri hələ sınaq mərhələsindədir və seriya istehsalı başlamayıb. Ancaq Pakistan ən azından 1500 kilometrə qədər mənzilli raketlərdə irəli gedib. Bundan əlavə, Pakistan hərbi sənayesi "Babur" və "Raad" qanadlı raketləri, yüksək dəqiqlikli H-2 qanadlı raketi istehsal edir. Azərbaycan həm Pakistandan bir neçə yaxın və orta mənzilli ballistik raket kompleksi əldə edə, həm də bu raketlərin birgə və daha təkmilləşdirilmiş versiyalarının istehsalını öz müəssisələrində təşkil edə bilər.
Hərbi məsələlər üzrə ekspertlər də bildirir ki, Pakistan ordusu dünyada güclü ordulardan biridir. Aydındır ki, belə bir ordunun hərbi texnikası zəif ola bilməz. Ekspertlərə görə, Pakistan kimi dövlətdən hərbi silah-sursatın alınması həm siyasi təzyiq vasitəsi kimi, həm də lazım olduqda silahlardan real istifadə zamanı Azərbaycan və Ermənistan ordularının müqayisəsində balans baxımından Azərbaycanın xeyrinə ola bilər. Hərbi məsələlər üzrə ekspert Üzeyir Cəfərov da deyir ki, iki ölkə arasında razılaşdırılan sənəd çox mühüm və əhəmiyyətli sənəddir. Onun sözlərinə görə, iki ölkə arasında hərbi sahədə əməkdaşlıq artan xətt üzrə inkişaf edir və bu, Azərbaycanın xeyrinədir. Üzeyir Cəfərov bildirir ki, razılaşdırılmış sənəddə tək müdafiə deyil, həm də müdafiə sənayesi nazirliyi ilə bağlı məsələlər nəzərdə tutulub.
Bu arada isə Azərbaycanın Pakistandan silah alması Ermənistanda ciddi təlaşa səbəb olub. Erməni politoloq Stepan Qriqoryan Azərbaycan və Pakistan arasında əməkdaşlığa məhdudiyyət olmadığına diqqət çəkərək, bunun Ermənistan üçün dəhşətli nəticələrə səbəb olacağını bildirib: "Pakistan NATO-nun və Avropa Birliyinin üzvü deyil və ona heç kim mane ola bilməz. Pakistan Ermənistanı dövlət kimi belə tanımır, Azərbaycanla isə qardaş münasibətlərə malikdir. Bu bizim ən böyük bəlalarımızdan biridir. Bu ölkə nüvə dövlətidir və çox güclüdür. Belə güclü dövlətlərlə sıx əlaqələr Azərbaycana istənilən an Qarabağı qaytarmağa imkan verir". Erməni politoloq bu fonda İrəvan rejimini "dişsiz siyasət aparmaqda" ittiham edib: "Azərbaycan öz məqsədinə doğru qətiyyətlə irəliləyir, Ermənistan isə öz ampluasındadır. Heç bir real addım, real cavab yoxdur. Bizim verdiyimiz cavablar da çox gec olur". Qriqoryan deyib ki, Azərbaycan Qarabağı yaxın dövrlərdə qaytarmağa hazırlaşır: "Güman ki, bu, müharibə yolu ilə olacaq. Çünki danışıqlar heç bir nəticə vermədi və Bakının atdığı addımlar göstərir ki, onlar heç nə ilə barışmaq istəmirlər. Hətta böyük güclərin nə deməsindən asılı olmayaraq, Azərbaycan öz istəyində israrlıdır. Güman ki, Azərbaycan böyük müharibəyə hazırlaşır və bu onun qələbəsi ilə başa çatacaq. Çünki onlar hər şeyi ölçüb-biçirlər. Bu günə qədər Ermənistanın əli çatmayan bir çox ölkədən silahlar əldə ediblər, Pakistan da onlardan biridir. Sonra Ermənistan hakimiyyəti bəhanə gətirməsin ki, bizim heç nədən xəbərimiz yox idi". Xatırladaq ki, Azərbaycanın Rusiya və İsraildən də silah alması ermənilərə çox qorxuya salıb. İndi bu siyahıya Pakistan da əlavə olunur və bütün bunlar Qarabağ münaqişəsinin çözümünə də təsir edəcək.
Nahid SALAYEV
