Üzeyir Cəfərov: "Müharibə şəraitində olan, torpaqları işğal altında saxlanan bir ölkənin belə genişmiqyaslı təlimlər keçirməsi zəruridir"
Azərbaycan Silahlı Qüvvələrində irimiqyaslı təlimlər keçiriləcək. Müdafiə Nazirliyinin mətbuat xidmətindən verilən məlumata görə, Prezident İlham Əliyevin təsdiq etdiyi plana əsasən, noyabrın 12-dən 18-dək səhra şəraitində qoşunların və silahların idarə olunması sisteminin yoxlanılması məqsədilə Silahlı Qüvvələrdə irimiqyaslı təlimlər keçiriləcək.
Təlimlərə 60 mindən artıq şəxsi heyət, 50-dən çox təyyarə və helikopter, 150-dən artıq tank və zirehli texnika, eləcə də raket və artilleriya qoşunlarının 700-dək sistemi cəlb ediləcək.
Belə irimiqyaslı hərbi təlim nəyə hesablanıb?
Hərbi ekspert Üzeyir Cəfərov hesab edir ki, son vaxtlar ermənilərin cəbhədəki fəallığı təsadüfi xarakter daşımır:
"Dediklərimiz öz təsdiqini tapır. Ermənilər Azərbaycanı böyük təxribata cəlb etmək istəyir. Ermənilər onu istəyir ki, tərəflər arasında toqquşma baş versin və beynəlxalq qurumlar bu məsələyə müdaxilə etsin. Ermənilər aktiv şəkildə bu planı həyata keçirməklə məşğuldur.
Burada ATƏT-in Minsk Qrupunun da əli var və ermənilər çəkinmədən Azərbaycanı təxribata çəkir. Erməni ordusu ayrı-ayrı istiqamətlərdən Azərbaycan Silahlı Qüvvələrinin mövqelərini durmadan atəşə tutur. Maraqlısı ondadır ki, ermənilərin atəş açdığı silahların çəkisi də artıb. Əvvəllər avtomat və pulemyotlardan atəş açırdılarsa, artıq 60 mm-lik minaatanlardan, qumbaraatanlardan, o cümlədən iriçaplı silahlardan atəş açırlar. Ermənilər son zamanlar daha çox Ermənistanla olan dövlət sərhədində təxribatlar törətməyə başlayıb. Onlar əvvəl Tərtər və Füzuli istiqamətində açıq təxribatlar edirdi, indi isə Ağdam istiqamətində açıq şəkildə təxribat edir. Ermənilərin təxribatına qarşı ordumuz tam hazırdır.
Azərbaycan ordusu noyabr ayının 12-dən 18-dək genişmiqyaslı, 60 min şəxsi heyətin iştirakı ilə hərbi təlimlər keçirəcək. Ermənilər bu faktordan da istifadə edib təxribatlarının sayını artıracaq. Ermənilərin yeganə məqsədi və məramı cəbhədə qan tökülməsidir. Görünən odur ki, Azərbaycan tərəfi ciddi döyüşləri hələ düşünmür. Azərbaycan hələ də beynəlxalq qurumların məsələ ilə bağlı aktivliyini gözləyir. Təlimlərin keçirilməsinə gəldikdə isə, müharibə şəraitində olan, torpaqları işğal altında saxlanan bir ölkənin belə genişmiqyaslı təlimlər keçirməsi zəruridir".
Məhəmmədəli QƏRİBLİ
