Gürcüstan Mərkəzi Seçki Komissiyası Mixeil Kavelaşvilini prezident seçkisinin qalibi elan edib. Parlamentdə səsvermədə iştirak edən 225 nümayəndədən 224-ü ona səs verib. Gürcüstan Seçici Kollegiyasında ümumilikdə 300 nümayəndə var. Amma müxalifət üzvləri səsverməni boykot ediblər.
Nə Gürcüstan prezidenti Salome Zurabişvili, nə də müxalifət bu seçkinin legitimliyini tanıyıb. Zurabişvili seçki barədə deyib: "Heç nə olmayıb. Heç kim heç kimi seçməyib. Heç nə baş verməyib".
İlk dəfədir Gürcüstanda prezidenti əhali deyil, Seçici Kollegiyası seçir. Yeganə namizəd isə keçmiş futbolçu Mixeil Kavelaşvili olub. O, hakim "Gürcü Arzusu"ndan rəsmən ayrılmış "Xalqın gücü" partiyasının üzvüdür. Onun namizədliyini hakim partiyanın fəxri sədri, milyarder Bidzina İvanişvili verib. Seçici Kollegiyasında hakim partiyanın 211 təmsilçisi var. Onlardan 89-u parlament üzvü, 109-u yerli idarəetmə orqanlarının təmsilçiləri, 13-ü Acariyadan deputatlardır. Beləliklə də, səsvermənin keçirilməsi, birinci turda prezidentin seçilməsi üçün yetərincə səs olub. Kollegiyada dörd müxalifət partiyasından 61 deputat formal təmsil olunsa da, onlar parlamenti boykot ediblər, səsverməyə qatılmayıblar. Hakim partiya andiçmənin dekabrın 29-da keçiriləcəyini bildirib. Zurabişvili deyir ki, onun mandatı yeni parlament. yeni prezident seçənədək qüvvədə olacaq. Müxalifətdən olan deputatlar parlament seçkilərinin nəticəsini tanımayıb. Gürcüstanın baş naziri İrakli Kobaxidze müxalifətin küçə etirazlarında uduzduğunu, ölkədə Ukraynanın "Maydan" ssenarisinin iflasa uğradığını deyib: "Radikal müxalifət əvvəlcə seçkiləri uduzdu, sonra da küçədə. Bilirsiniz ki, dörd partiyaya xaricdən ciddi dəstək var, 10-dan çox zəngin QHT-lər var. Ancaq onlar son günlər birlikdə aksiyalara heç 2 min adam yığa bilmirlər". Baş nazir hesab edir ki, hakimiyyət radikal müxalifətin zorakı resursunu tam neytrallaşdıra bilib. "Gürcü Arzusu"nun yaradıcısı Bidzina İvanişvili məsələ ilə bağlı qeyd edib: "Mixeil Kavelaşvilini Gürcüstan prezidenti seçilməsi münasibətilə təbrik edirəm. Ölkəmizin əsl gürcü, vətənpərvər və hörmətli prezidentini təbrik edirəm. Seçkilərdən sonra ölkənin tam parlament strukturunu nəzərdə tutan Avropa tipli Gürcüstan Konstitusiyası tam şəkildə həyata keçirilib. Kavelaşvilinin andiçməsindən sonra bu ölkədə insanları qütbləşdirmək, parçalamaq və radikallaşdırmaq üçün süni cəhdlər birdəfəlik dayanacaq. Əminəm ki, o, bu mühüm institutu Konstitusiya çərçivəsinə qaytaracaq və eyni zamanda cəmiyyətimizin birləşməsində, dinc yanaşı yaşamaqda xüsusi rol oynayan prezident olacaq". Məhz Bidzina İvanişvili yeni prezident postuna Kavelaşvilinin seçilməsində əsas rol oynayıb. Bundan əvvəl o, bu posta Giorgi Marqvelaşvili və fransız diplomat Salome Zurabişvilini göstərib. Onların hər ikisi sonradan radikal müxalifət sıralarına keçib. İndi İvanişvili keçmiş futbolçunu sevimlisinə çevirib. Əvvəlki iki dövlət başçısından fərqli olaraq, Kavelaşvili Birləşmiş Ştatları və Avropa İttifaqını həvəslə tənqid edir, həmçinin "Gürcü Arzusu"nun prioritet hesab etdiyi mühafizəkar dəyərləri tam dəstəkləyir. Gürcüstan parlamentinin spikeri Şalva Papuaşvilinin dediyi kimi, respublika "öz dar siyasi məqsədlərini həyata keçirmək üçün konstitusiya çərçivəsindən kənara çıxmağa həmişə hazır olan" avantürist siyasətçilərlə doludur: "Mixeil Kavelaşviliyə prezidentliyi dövründə arzulamaq istədiyim əsas şey gürcü xalqına və Gürcüstan dövlətinə sədaqətidir. Bu, istənilən hökumət üçün yeganə etibarlı yoldur".
Amma Qərb yenə Gürcüstanın seçimi ilə razılaşmır. ABŞ Dövlət Departamenti Gürcüstan rəsmilərinə ölkədə "demokratiyanı sarsıtmağa" görə viza məhdudiyyətləri tətbiq edib. Helsinki Komissiyasının sədri, respublikaçı konqresmen Co Vilson bildirib ki, Zurabişvili Gürcüstanın yeganə legitim başçısı olaraq qalır: "Rusiyanın marionet prezidentinin rəhbərliyi altında Gürcüstanı əsarət altına almağa çalışan qeyri-legitim hökumətə qarşı durmaqda onun cəsarətini yüksək qiymətləndirirəm". Avropa Parlamentinin üzvləri də oxşar bəyanatlarla çıxış ediblər. Avropa Parlamentinin litvalı üzvü Rasa Jukneviçine bildirib: "Bidzina İvanişvili hakimiyyəti ələ keçirməyə davam edir". Onun polşalı həmkarı Mixail Şerban qeyd edir: "Mixeil Kavelaşvili qəsbkardır. Gürcüstanın "Lukaşenko"su. Gürcüstanda yeganə legitim prezident Salome Zurabişvilidir". Bu arada gürcü müxalifəti israr edir ki, Kavelaşvilinin ölkənin altıncı prezidenti seçilməsi onsuz da çətin olan vəziyyəti daha da gərginləşdirir. Müxalifətin dörd koalisiyasının birgə bəyanatında deyilir: "Kavelaşvili "Xarici agentlər haqqında" qanunun təşəbbüskarlarından biri olub və tez-tez fəal anti-Qərb təbliğatı ilə məşğul olur... Biz, Gürcüstanın siyasi partiyaları və koalisiyaları, vətəndaş cəmiyyəti təşkilatları və etirazçılarla birlikdə, yekdilliklə razılaşırıq ki, problemin yeganə həlli yolu yeni parlament seçkilərinin təkmilləşdirilmiş seçki sistemində, siyasi cəhətdən balanslaşdırılmış seçki administrasiyası və neytral hökumət institutları ilə keçirilməsidir". Bununla bağlı onlar Aİ-dən Gürcüstanın hazırkı hakimiyyətini qeyri-legitim kimi rəsmən tanımasını tələb edirlər. Bundan əlavə, müxalifət Brüsseldən respublikanın hakim elitasının nümayəndələrinə, o cümlədən İvanişviliyə və onun ailə üzvlərinə qarşı sanksiyalar tətbiq edəcəyini gözləyir. Baş verənlər fonunda etirazlar dayanmasa da, küçə toqquşmalarının intensivliyi səngiyib. Bu durumda müxalifət bütün diqqətini İvanişvili rejiminin beynəlxalq qınaqına yönəltmək qərarına gəlib. Beləliklə, Gürcüstada siyasi gərginlik dvam edir. Səlahiyyət müddəti başa çatan 72 yaşlı prezident Salome Zurabişvilinin də vəzifəsindən getmək fikri yoxdur. Zurabişvili Qızıl Ordunun Gürcüstana təcavüzü nəticəsində mühacirətə üz tutan bir ailədə dünyaya göz açıb. O, 2004-cü ildə Gürcüstanın xarici işlər naziri təyin olunanadək, uzun illər Fransanın diplomatik xidmətində çalışıb. 2018-ci ildə prezident olmaq üçün "Gürcü Arzusu"nun dəstəyini qazanan Zurabişvili indi hakim partiyanı siyasi xəttinə görə tənqiq edir. Zurabişvilidən fərqli olaraq, Kavelaşvili özünü xalqa sadiq biri kimi gələmə verir. İşveç, İngiltərə və Rusiyada futbol oynamış Kavelaşvilinin uğurlu idmançı karyerası olub. O, deputat seçiləndən sonra 2016-cı ildə "Xalqın gücü" partiyasını qurub. "Gürcü Arzusu"nun daha radikal və antiqərb qanadı sayılan bu siyasi birliyin seçiciləri mühafizəkar kənd sakinləridir. Kavelaşvili immiqrasiya və milli suverenlik, eləcə də ənənəvi gürcü dəyərlərinin qorunması məsələsində barışmaz mövqe tutur.
Xatırladaq ki, Gürcüstanda prinsipial siyasi mübarizənin əsasını hazırda həbsdə yatan keçmiş prezident Mixeil Saakaşvili qoyub.
Nahid SALAYEV
