Faiq Ələkbərli: "Göy Məscidin azərbaycanlılara aid olması ilə bağlı yüzlərlə nümunə var"
Ermənistan Azərbaycan xalqının əsrlər boyu öz dədə-baba torpaqlarında yaşaması və zəngin mədəni irs yaratması faktını hər vəchlə danmağa çalışır. Ermənistan Qərbi Azərbaycanda xalqımızın min illər ərzində yaratdığı mədəni irsi – tarixi abidələri, qəbiristanlıqları, məscidləri, tarixi yaşayış yerlərini dağıdaraq, UNESCO tərəfindən ümumbəşəri mədəni dəyər kimi tanınan Azərbaycan aşıq sənətinə ciddi zərər vurub.
Bu fikirlər Azərbaycan Prezidenti İlham Əliyevin "Qayıdış hüququ: Ermənistandan zorla çıxarılmış azərbaycanlılar üçün ədalətin təmin edilməsi" mövzusunda II beynəlxalq konfransın iştirakçılarına müraciətində yer alıb.
Dövlət başçısı qeyd edib ki, bu tarixi-mədəni abidələr arasında yalnız Azərbaycan memarlığının və İslam mədəniyyətinin parlaq nümunələrindən biri olan Göy Məscid salamat qalıb. Lakin Ermənistan Göy Məscidin orijinal tarixi-memarlıq üslubunu qəsdən dəyişdirərək onu başqa ad altında təqdim etməyə çalışır. Regionun tarixini və mədəni mənzərəsini təhrif etmək, yenidən yazmaq məqsədi daşıyan belə destruktiv addımlar dözümsüzlük və irqçilikdən başqa bir şey deyil.
Göy Məscid bizim irsimizin yeganə nümunəsi olsa da, Ermənistan onu məhv edir.
"İslam mədəniyyətinin parlaq nümunəsi olan Göy Məscidin təhrif edilməsi təsadüfi deyil"
Mövzu ilə bağlı fikir bildirən AMEA Fəlsəfə və Sosiologiya İnstitutu "Türk xalqlarının fəlsəfi fikir tarixi və müasir fəlsəfəsi" şöbəsinin müdiri, fəlsəfə üzrə fəlsəfə doktoru, dosent Faiq Ələkbərli "Bakı-Xəbər"ə şərhində bildirdi ki, Ermənistanın vaxtilə və indi Azərbaycanın tarixi abidələrini məhv etdiyi bəllidir. Xüsusilə milli, dini abidələr ermənilər tərəfindən ya təhrif edilib, ya da məhv olunub. Erməni vandalizmi illərdir davam edir. Bu səbəbdən də ölkə başçısı İlham Əliyevin Bakıda keçirilən "Qayıdış hüququ – Ermənistandan zorla çıxarılan azərbaycanlılar üçün ədalətin təmin edilməsi" mövzusunda beynəlxalq konfrans iştirakçılarına müraciəti tamamilə doğrudur".
Həmsöhbətimizin sözlərinə görə, İslam mədəniyyətinin parlaq nümunəsi olan Göy Məscidin təhrif edilməsi təsadüfi deyil. Əslində bu təhrifi Ermənistan təkbaşına etməyib: "Ermənistan bunu İran adlanan ölkə ilə bir yerdə edib. Göy Məscid Azərbaycan xalqına, Azərbaycan irsinə aiddir. Ermənilərin təhrif etdiyi abidələrdən biri də Göy Məsciddir. Göy Məscidin azərbaycanlılara aid olması ilə bağlı yüzlərlə nümunə var. Türk-müsəlman memarlığı bu məsciddə özünü göstərir. Bu memarlıq abidəsi ərəb, fars, hind və digərlərindən fərqlənir. Göy məscidi təhrif edib İran ya erməni abidəsi kimi təqdim etmək düzgün deyil. Bu səbəbdən də ölkə başçısı İlham Əliyevin iradları haqlıdır. Adıçəkilən məscid qısa zamanda öz mahiyyətinə qovuşacaq. Ermənistan bu cür çirkli addımlar atmağa davam etdikcə nə qonşuları ilə normal münasibəti olacaq, nə də dünya ilə. Ümid edirəm ki, Ermənistan hakimiyyəti bu cür təhriflərin qarşısını alacaq".
Günel CƏLİLOVA
