Tural İsmayılov: "Fransa tarixinin həm daxili, həm də xarici siyasətində ən məntiqsiz və bərbad dövr Emmanuel Makronun prezidentliyi dönəmi oldu"
Fransa parlamenti baş nazir və hökumət üzvlərinə etimadsızlıq bildirərək, onları istefaya göndərib. Bu, altmış ildə ilk dəfə baş verdi. Fransanın baş naziri Mişel Barnier hökuməti cəmi üç ay əvvəl hakimiyyətə gəlmişdi. Bu barədə France24 məlumat yayıb.
Bu, Georges Pompidu hökumətinin istefa verdiyi 1962-ci ildən bəri Fransa hökumətinin etimadsızlıq səsverməsi nəticəsində ilk dəfə yıxılmasıdır.
Milli Assambleyada belə səsverməyə səbəb baş nazir Mişel Barnierin 2025-ci il üçün sosial təminat büdcəsini parlamentdə, Konstitusiyanın 49.3-cü maddəsindən istifadə edərək, deputatların səsverməsindən yan keçməklə qəbul etməsi olub.
Hökumətə etimad göstərməmək təşəbbüsü Marin Le Penin rəhbərlik etdiyi ifrat sağçıların dəstəklədiyi ifrat sol partiyalar tərəfindən irəli sürülüb.
577 yerlik Milli Assambleyanın 331 üzvü hökumətə etimadsızlıq ifadəsi üçün səs verib. Barnier indi istefa ərizəsini ölkə prezidenti Emmanuel Makrona təqdim etməlidir. Yayda Fransada keçirilən növbədənkənar parlament seçkilərindən sonra heç bir partiya parlamentdə mütləq çoxluğu əldə edə bilmədi və baş nazirin prezident tərəfindən təyin edilməsi çətin siyasi şəraitdə baş verdi.
Son günlər Emmanuel Makronun istefası ilə bağlı çağırışlar olub, lakin çərşənbə axşamı Fransa lideri bir daha istefa vermək niyyətində olmadığını və 2027-ci ildə başa çatacaq "səlahiyyətinin son saniyəsinə qədər" ölkəyə xidmət edəcəyini bildirib.
Fransa parlamenti etimadsızlıq səsverməsi ilə hökumət istefaya göndərib. Bu, altmış ildə ilk dəfə baş verdi. Bununla Fransa nə qazanacaq və nə itirəcək?
Baki-xeber.com-un sualına cavab olaraq politoloq Tural İsmayılov bildirdi ki, Fransada baş verən hökumət böhranı prezident Makronun və onun təyin etdiyi baş nazirin ölkəni idarə etmək qabiliyyətinin olmadığını bir daha sübut edir: "Ümumiyyetlə, Fransa tarixinin həm daxili, həm də xarici siyasətində ən məntiqsiz və bərbad dövr Emmanuel Makronun prezidentliyi dönəmi oldu. Bununla bağlı həm Fransa cəmiyyətində, həm də beynəlxalq arenada artıq müəyyən rəy formalaşıb. Son günlər Fransada hökumətə etimadsızlıq göstərilməsi isə o deməkdir ki, Fransa artıq 2025-ci ili dövlət büdcəsi olmadan qarşılayacaq. Bu isə özü ilə ölkəyə çox ciddi problemlər gətirəcək. Yəni dövlət büdcəsi təsdiq edilmədiyi ücün hüquq-mühafizə, sosial müdafiə, təhlükəsizlik və digər dövlət orqanlarında çalışan işçilətin əmək haqqının verilməsində, müavinətlərin ödənilməsində ciddi problemlər yaradacaq. Bu da Fransadakı daxili gərginliyi bir qədər də şiddətləndirəcək.
Bir qədər əvvəl biz Makronun pensiya islahatlarına qarşı böyük etirazları müsahidə etdik. Ölkədə vəziyyət o qədər gərginləşmişdi ki, insanlar küçələrdə mağazaların pəncərələrini sındırıb onu yağmalayırdı.
Sonuncu baş nazir Mişel Barnierə göstərilən etimadsızlıq onu göstərir ki, Fransanı idarə edənlərin rasional məntiqləri yoxdur. Heç dünyanın avtoritar ölkələrində belə hökumətin ağlına da gəlmir ki, hansısa büdcə xərclərini parlamentin müzakirəsinə çıxarmadan təsdiq etsin. Amma bu məntiqsizliyi sabiq baş nazir Mişel Barnier etdi və cəzasını aldı.
Bu gün Fransa parlamenti hökumət formalaşdırmaq imkanında deyil. Çünki heç bir siyasi blok mütləq çoxluğa nail ola bilməyib. Parlamentdə yaranmış qərarsızlıq vəziyyəti isə Makron siyasətinin nəticəsidir. Rəy sorğuları göstərir ki, Fransa cəmiyyəti hakimiyyətin həm daxili, həm də xarici siyasətindən narazıdır".
Dəniz NƏSİRLİ
