Bəhruz Quliyev: "Qərb Ermənistan qarşısında Rusiyadan uzaqlaşmaq, onun çətiri altından çıxmaq şərtini qoyub"
Ermənistanla KTMT arasında münasibətlər geri dönüşü olmayan nöqtəyə keçib. Bunu Ermənistan Baş naziri Nikol Paşinyan deyib.
"Dedik ki, KTMT-nin fəaliyyətində iştirakımızı dondururuq. Bu o deməkdir ki, biz heç bir sənədin müzakirəsində iştirak etmirik. Biz, sadəcə olaraq, heç bir sənədə veto qoymuruq, çünki mahiyyət etibarı ilə biz özümüzü KTMT-dən kənarda hesab edirik, qoy istədiklərini etsinlər. Bu vəziyyət Ermənistanın KTMT-yə qayıtmasını getdikcə çətinləşdirir, hətta mümkünsüz edir", - Paşinyan bildirib.
Bu günlərdə KTMT-nin Astana sammitindən sonra Rusiya prezidenti Vladimir Putin jurnalistlərlə keçirdiyi brifinqdə demişdi ki, Ermənistan fasilə verib, lakin KTMT sammitində qəbul edilən sənədləri təsdiqləyib. Paşinyan isə bunu inkar edərək deyir ki, biz heç bir sənədin müzakirəsində iştirak etmirik, heç bir sənədi qəbul etmirik. Bundan başqa, Paşinyan iddia edir ki, 2021 və 2022-ci illərdə Azərbaycan tərəfindən ərazi iddiasına və təcavüzə məruz qalmışıq. Təcavüzə məruz qalmışıq deyən adam Azərbaycanla sülh sazişi imzalayar?
"İrəvan isə sözdə razılaşsa da, əməldə bir addım belə ata bilmir və o üzdən, Nikol spekulyativ açıqlamalarla çıxış edir"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyev hesab edir ki, Ermənistanın KTMT-dən imtina görüntüsünün arxasında siyasi iddialar dayanır: "İrəvan bilir ki, Rusiya KTMT adlı hərbi blokun dağılmasını istəmir. Ən azından, beynəlxalq arenada bir görüntü yaratmaq üçün Moskvaya bu qurum hələlik lazımdır. Ermənistan isə 44 günlük müharibənin acısını Rusiyadan bu yolla çıxmaq istəyir. Ermənistanın KTMT-də təmsil olunması, yaxud olunmaması heç nəyi dəyişdirmir. Əksinə, İrəvanın bu qurumda formal olaraq qalması Kremlə bəzi üstünlüklər qazandırır. Belə ki, Ermənistan nə qədər Qərbə yönəlik siyasət yürütməyə çalışsa da, Rusiya ilə mövcud bağları qopmağa qoymur. Həm də Rusiya bu ölkədə siyasi, iqtisadi, xüsusən də hərbi varlığını qoruyub saxlaya bilir".
Politoloq vurğuladı ki, Ermənistan ikibaşlı oyun oynamağa cəhd edir: "Paşinyan bir tərəfdən ölkəsinin KTMT-nin toplantılarında iştirak etmədiyini deyir, amma qəbul edilən bütün qərarlara, sənədlərə imza atdığı bəlli olur. Ermənisayağı bu gedişlər bizə də tanışdır, 44 günlük müharibənin sonunda imzalanan üçtərəfli bəyanatda Paşinyan dərkənar qoymadığını iddia edirdi. Əlbəttə, bu addımı ilə o, daxili auditoriyanın ona qarşı gözlənilən təzyiqlərini yayındırmaq istəyirdi. Bir müddət keçəndən sonra çıxılmaz duruma düşərək sənədə imza atdığını etiraf etməli oldu. Qərb Ermənistan qarşısında Rusiyadan uzaqlaşmaq, onun çətiri altından çıxmaq şərtini qoyub. İrəvan isə sözdə razılaşsa da, əməldə bir addım belə ata bilmir və o üzdən, Nikol spekulyativ açıqlamalarla çıxış edir. Düzdür, nə MDB, nə KTMT, nə də Aİİ tədbirlərində iştirak etmir, amma bu, İrəvanın həmin qurumlardan, daha doğrusu Rusiyanın buxovundan, onun təsir dairəsindən qopduğu, uzaqlaşdığı anlamına gəlmir. Ermənistan müstəqil yaşamağa alışmayıb, onu kimsə idarə etməli, təhlükəsizliyini təmin etməlidir. Rusiya Ermənistanın sərhədlərini qoruyur, dövlətin yaşamasını təmin edən bütün strateji sahələr Rusiyanın əlindədir, 102-ci hərbi baza Moskvanın İrəvanla hansı tərzdə danışmasını müəyyənləşdirir. Rusiya hərbçilərinin Ermənistan ərazisində qalma müddətinin bitməsinə ən azından 24 il var. Bu razılaşmanın, memorandumun ləğvi Ermənistana çox ağır başa gələr. İrəvan bunu nəzərə alır, ona görə də hələlik imtina edə biləcəyi sammitlərə, konfranslara, iclaslara qoşulmamaq yolunu tutur. Qərb isə Ermənistana hələlik söz verir, əməli işə keçməyi isə həmişə ertələyir. Çünki Rusiya ilə dünyanın fərqli nöqtələrində toqquşsa da tam üstünlük əldə edə bilmir. Ona görə də gözləmə mövqeyindədir, fürsət axtarır".
Vidadi ORDAHALLI
