Xəyal Bəşirov: "Onların Azərbaycana qarşı qərəzli və düşmən münasibəti, bizim daxili işlərimizə qarışmaq cəhdləri özünü hər addımda göstərir"
ABŞ-ın və Qərbin bəlli təşkilatları var ki, onların əsas məqsədi Azərbaycanı əsassız ittihamlarla suçlamaq, qaralamaqdır. ABŞ-ın və Qərb ölkələrinin birgə təşkilatçılığı, eyni zamanda mailiyyəsi ilə yaradılan, fəaliyyət göstərən Mütəşəkkil Cinayətkarlıq və Korrupsiya Hesabatı Layihəsi – OCCRP də bu yolu tutur. OCCRP-nin Cənubi Qafqaz siyasəti bəllidir.
Burada onun Azərbaycanı əsas hədəf kimi seçməsi, ölkəmizin daxili işlərinə qarışmaq istəyi və əsasən də erməni maraqlarının müdafiəçisi kimi çıxış etməsi məlumdur. Diqqət çəkən məqamlardan biri odur ki, OCCRP ermənipərəst Samanta Pauerin rəhbərlik etdiyi Beynəlxalq İnkişaf Agentliyi (USAİD) ilə də əməkdaşlıq edir, birgə antiazərbaycan layihələri icra edirlər. Bu təşkilat Samanta Pauer tərəfindən "tərəfdaş qurum" hesab edilir və hazırda OCCRP-nin əməliyyatlarını USAID əməkdaşı Şennon Maquayrinin kurasiya etməsi barədə faktlar var. Yəni OCCRP öz çirkin məqsədlərini USAID vasitəsilə də həyata keçirir.
"OCCRP və USAID kimi təşkilatlar, onların rəhbərləri bu prosesə heç bir təsir göstərə bilməz"
Siyasi Hüquq və Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, ümumiyyətlə, təkcə OCCRP deyil, bu qəbildən olan bir sıra beynəlxalq təsisatların kimlərin dar çərçivədə maraqlarına xidmət etdiyini biz dəfələrlə real təcrübədə görmüşük. "OCCRP, USAID, "Amnesty İnternational", "Human Rights Watch", "Freedom House", "Sərhədsiz Reportyorlar" kimi təşkilatların əslində müstəqil deyil, faktiki olaraq ayrı-ayrı güclərin, dairələrin maraqlarına xidmət etdiklərini özləri öz fəaliyyətləri ilə sübut ediblər. Belə bir hal mümkün deyil ki, təşkilat müstəqildir, onun araşdırmasının predmetləri, müstəqil istiqamətləri var və bu müstəqil təşkilat da apardığı araşdırmaların hamısının sonunda hansısa dövlətlərə, o cümlədən də Azərbaycana qarşı hər dəfə qərəzli mövqe tutur. Yəni Azərbaycan dövlətinin fəaliyyətində, atdığı addımlarda heç bir müsbət məqam görməyən, bir müsbət məqamı araşdırıb tapa bilməyən və həmişə ona qarşı hücumlar təşkil edən, onun addımlarını mənfi olaraq qələmə verən bu təşkilatların araşdırması, təbii ki, ədalətli, şəffaf ola bilməz. O təşkilatların özləri, rəhbərləri, səlahiyyətli şəxslər dəfələrlə əməlləri ilə sübut ediblər ki, çirkaba bulaşıblar, kimlərdənsə əldə etdikləri maraqlar müqabilində sifarişlər yerinə yetirib addımlar atıblar, hansısa ciddi araşdırmalar aparmadan nəticələr elan edirlər. Nəticələri əvvəlcədən bəlli olan araşdırmaların da mahiyyətini bilirik. Ona görə də düşünürəm ki, bu təsisatlar əslində QHT və media siyasəti olaraq ayrı-ayrı dövlətlərin, xüsusilə də kiçik ölkələrin daxili işlərinə qarışıb, öz aləmlərində onları "fakt qarşısında" qoyub bundan istifadə edərək onlara təsir göstərmək məqsədi güdürlər".
X.Bəşirov qeyd edir ki, biz bunu Gürcüstanın timsalında açıq şəkildə gördük. O bildirdi ki, Gürcüstan hökuməti məlum Qərb, ABŞ təşkilatının, beynəlxalq təsisatların fəaliyyətini nəzarətə götürəcəyini və şəffaflığı, reallıqları ortaya qoyan qanun qəbul etmək niyyətində olduğunu bəyan edən kimi, dərhal onlar Gürcüstana qarşı hücuma keçdilər və bu gün də o hücumların ardı-arası kəsilmir. "Bu bir daha göstərdi ki, həmin o beynəlxalq təsisatlar və onların aid olduğu güc mərkəzləri, dövlətlər özlərinin ayrı-ayrı dövlətlərin daxilindəki uzantılarının ifşa olunması, onların sıradan çıxarılmasına qarşı fəaliyyətlərini davam etdirirlər.
Azərbaycan vaxtında və lazımi məqamda bu addımları atıb. Həm QHT, həm də media sahəsində Azərbaycan dövlətinin Konstitusiyasına, xalqımızın və dövlətimizin maraqlarına xidmət yönündə qanunlara dəyişikliklər həyata keçirib. Qanunların qəbul edilməsi zamanı beynəlxalq hüququn prinsipləri ilə yanaşı Azərbaycan dövlətinin və dövlətçiliyinin maraqları da üstün tutularaq bu qanunlar qəbul edilib. Təbii ki, bu həmin o uzantıların, Azərbaycan dövlətinin daxilində də kənardan maliyyələşərək fəaliyyət göstərən emissarların, missiya sahiblərinin fəaliyyətini məhdudlaşdırıb. Biz Gürcüstan nümunəsində gördük ki, Azərbaycan dövləti bunu vaxtında lazımı şəkildə etməsəydi bizi də o bəlalar gözləyə bilərdi. Nə yaxşı ki, dövlətimiz bunu məqamında həyata keçirdi. Həmin o qüvvələrin Azərbaycanın daxili işlərinə qarışmaq imkanları məhdudlaşıb. Amma bütün bunlara baxmayaraq, yenə də onlar ölkəmizin daxili işlərinə qarışmağa cəhd göstərirlər, istəyirlər ki, daxili işlərimizə qarışsınlar. Azərbaycanda peşəsindən, vəzifəsindən, eyni zamanda statusundan asılı olmayaraq bütün şəxslər qanun qarşısında bərabərdir. Biz zaman-zaman görmüşük ki, hətta yüksək vəzifəli, səlahiyyətli şəxslər belə qanun pozuntularına yol verdikləri təqdirdə məsuliyyətə cəlb edilirlər. Burda hətta partiya, siyasi mənsubiyyət, eyni zamanda hansısa bir vəzifədə olub-olmamasından asılı olmayaraq, istənilən şəxsin məsuliyyət məsələsi Azərbaycan qanunvericiliyində nəzərdə tutulduğu kimi həyata keçirilir. Əgər hər hansısa bir şəxs QHT rəhbəri, ya səlahiyyətli şəxsdirsə, yaxud media sahəsində fəaliyyət göstərirsə bu onun toxunulmazlığına dəlalət etmir. Həmin o şəxslər media təmsilçisi, QHT nümayəndəsi olub-olmamasından, yaxud digər sahədə fəaliyyət göstərməsindən asılı olmayaraq hansısa bir qanun pozuntusuna yol verirsə, hüquqa zidd addımlar atacaqlarını düşünürlərsə yanılırlar. Həmin şəxslərə qarşı Azərbaycan hüquq-mühafizə orqanları addımlar atır. Sanki adlarını çəkdiyim o beynəlxalq təsisatlar Azərbaycan vətəndaşlarının hüquqlarını qoruyurmuş kimi görüntü yaradıb onların uzantıları olan, onlardan maliyyələşən, onların maraqlarına xidmət edən və onların diqtəsilə addımlar atan şəxslərin qorunması üçün əllərindən gələni edirlər. Onlar səfirləri, diplomatları, beynəlxalq aləmdə fəaliyyət göstərən şəxsləri, hətta ayrı-ayrı dövlətlərin səlahiyyətli şəxslərini bu istiqamətdə səfərbər edib Azərbaycana qarşı hədyanlar, əsassız ittihamlar, iftiralar səsləndirməyə cəhd göstərirlər".
Antiazərbaycan koalisiyasında birləşən "OCCRP və USAID kimi bədnam təşkilatların, onların rəhbərlərinin, ermənipərəst, Azərbaycan düşməni Samanta Pauer kimilərinin, eləcə də onun təşkilatının əməkdaşlarının, məmurlarının ölkəmizin daxili işlərinə qarışmaq cəhdlərinin uğursuz olduğunu deyən X.Bəşirov qeyd etdi ki, onlar heç bir vasitə ilə istəklərinə nail ola bilməzlər. "Onların Azərbaycana qarşı qərəzli və düşmən münasibəti, bizim daxili işlərimizə qarışmaq cəhdləri özünü hər addımda göstərir. Amma OCCRP və USAID kimi təşkilatlar, onların rəhbərləri bu prosesə heç bir təsir göstərə bilməz. Biz atdığımız addımlarla həmin dövlətlərin, təşkilatların Azərbaycana qarşı mövqeyini müəyyənləşdiririk. Digər məqamlarda biz Azərbaycan dövlətinin daxilindəki hüququn tələblərini həyata keçiririk. Azərbaycan qanunverciliyinə görə, istənilən şəxs cinayət törədibsə mütləq şəkildə məsuliyyətə cəlb edilməlidir. Hüquqi dövlət olan Azərbaycanda və bir sıra dövlətlərdə qanunvericilik sistemləri, cinayət qanunvericiliyi mövcuddur. Ədalətli cəzanın tətbiq edilməsində əsas məqsəd sosial ədələtin bərpa edilməsi, cinayət törətmiş həmin şəxsin islah edilməsi, gələcəkdə həm o şəxs, həm də digərləri tərəfindən o cinayətlərin törədilməsinin qarşısının alınmasıdır. Azərbaycan dövlətinin atdığı bu addımlar əslində dövlətçiliyimizə, onun təhlükəsizliyinə qarşı olan təhdidlərin, hansısa cəhdlərin qarşısını almaq məqsədi daşıyır ki, bundan sonra da bu belə olacaq" - deyə X.Bəşirov qeyd etdi.
İradə SARIYEVA
