Erməni icması xülyalardan əl çəkməsə məhvə məhkumdur
Ermənilər həmişə yalanla yaşayıblar, indi də özləri özlərini yalanla ovundurur, özlərinə təsəlli verirlər. Bu yerdə bir köhnə zərb məsəl yadıma düşdü. Bir gün bir erməni rəiyyət (mülkədardan asılı, onun torpağını icarəyə götürən (çox vaxt irsən) kəndli) görür ki, bunun ağasının papağı başında əyri durub.
Düşünür ki, ağanın papağı əyilibsə, deməli hardasa başından düşəcək. Qarabaqara düşür ağanın dalınca ki, papağı harda düşsə götürüb qaçacam. Sən demə ağanın da kefi kök olduğundan papağını qəsdən yan (əyri) qoyubmuş. Görür erməni nökər düşüb dalına, bunu güdür. Soruşur ki, ara, ay "dığa" xeyirdimi, düşmüsən arxama? Erməni də qorxusundan dili topuq vura-vura deyir ki, ağa papağın əyilib, dedim, birdən düşüb bulaşar, düşəndə yerə dəyməmiş tutum. Bu da ağanın xoşuna gəlmir ki, necə yəni, mən papağımı başımda saxlaya bilmirəm? Qamçı ilə erməninin kürəyini bir qədər "ölçüb" buraxır. İndi ermənilər də həmin rəiyyətin günündədir. Amma heç olmasa rəiyyət erməni gördüyünü səhv başa düşmüşdü. "Ayakve" Təşəbbüsü isə öz qərəzli arzularını reallıq kimi qələmə verib, erməniləri ruhlandırmağa çalışır. İndiyə qədər bu qəbildən olan təşkilatlar ermənilərin başını "erməni soyqırımı", "böyük Ermənistan", "dənizdən dənizə dövlət", "qərbi Ermənistan" və s. kimi nağıllarla qatır, beyinlərini "yuyurdular". Bu yolla erməniləri bütün qonşuları ilə düşmən ediblər. İndi artıq ermənilər bu "şirin" nağıllara inanmır. Ona görə də erməni icmasının başını qatmaq üçün yeni ideyalar uydururlar ki, Azərbaycan da, Gürcüstan da tezliklə dağılacaq, bütün Qafqaz bizə qalacaq. Müxalif erməni təşviqat ideoloqları əhalini həmin erməni rəiyyət kimi düşünməyə vadar etmək istəyir.
Bu baxımdan özünü şovinist-millətçi daşnaksütun ideya qanadına məxsus sayan "Ayakve" Təşəbbüsünün bəyanatı çox gülüncdür.
Bu gün Azərbaycanın ciddi problemləri var. Bu barədə "Ayakve" Təşəbbüsünün yaydığı bəyanatda deyilir. Bəyanatda daha sonra bildirilir:
"İqtisadi artım çox aşağıdır, neft hasilatı azalır, sosial problemlər pisləşir. Gələn il Azərbaycan müdafiə büdcəsini 7%, işğal olunmuş "Artsax"a xərcləri 20% azaltmalı olacaq.
4 il ərzində Azərbaycan "Artsax"ın "mənimsənilməsi"nə təxminən 11 milyard dollar xərcləyib, lakin rəsmi məlumatlara görə, hökumət buraya cəmi 8000 nəfəri köçürə bilib. Onların əksəriyyəti rəsmi olaraq orada yaşayır, amma əslində insanlar bu yerləri tərk edirlər. Biz qayıtmaqdan nə qədər çox danışsaq, onlar da bir o qədər çox məskunlaşdıqları əraziləri tərk edəcəklər.
"Artsax"ın tutulması zamanı 15 minə yaxın azərbaycanlı həlak oldu, amma əslində Azərbaycan bundan heç nə qazanmadı, ona görə də ölkədə ictimai-siyasi ziddiyyətlər güclənir".
Əvvəla, Azərbaycanda neft hasilatının azalması təbii prosesdir və bu gözlənilən idi. Hələ onu demirik ki, Azərbaycanın yenilənən müqaviləsi ilə daha 25 il ərzində 500 milyon tondan çox neft hasil ediləcək. Bu olmasa belə, Azərbaycanın aktivlərinin həcmi Ermənistanın dövlət büdcəsindən 20 dəfə çoxdur. Müdafiə xərclərinə gəldikdə isə gələn il bu xərclər 25 faiz artacaq.
Keçmiş məcburi köçkunlərin məskunlaşdığı dədə-baba yurdundan geri qayıtması isə ağ yalandır. Digər tərəfdən, işğaldan azad edilmiş ərazilərdə indiyə qədər 8 min deyil, 30 mindən çox keçmiş məcburi köçkün məskunlaşdırılıb. Yeni qəbul edilmiş qanuna əsasən isə həmin əhalinin məşğulluğunu daha yaxşı təmin etmək üçün onlara əkinə yararlı torpaqlar ucuz qiymətə icarəyə veriləcək. Bununla yanaşı işğaldan azad edilmiş ərazilərdə sahibkarlıqla məşğul olan subyektlərə geniş spektrli vergi güzəştləri və sığorta tətilləri verilib.
Eyni zamanda, keçən 4 il ərzində işğaldan azad edilmiş ərazilərin bərpasına və yenidən qurulmasına 19 milyard manat xərclənib, amma illik xərclərdə azalma mövcud deyil. Bu il də həmin məqsəd üçün 4 milyard manat ayrılıb. Çox güman ki, büdcədə il boyu əlavə imkanlar yaransa, büdcəyə yenidən baxıb, ötən ilki kimi, bu xərcləri bir qədər də artırmaq mümkün olacaq.
O ki qaldı 44 günlük müharibədə və antiterror əməliyyatlarında Azərbaycan tərəfinın şəhidlərinə, onların adlı siyahısı bütün açıq resurslarda dərc edilib. Onların sayı da, şəxsiyyəti də tam bəllidir. "Ayakve" bu sayı orta hesabla beşə vurub, özünə təsəlli verir. Erməni cəmiyyəti bu rəqəmə ola bilsin ki, inanır. Çünki bu gün saysız-hesabsız müharibədə ölmüş erməni əsgəri var ki, hökumət tərəfindən onların müharibədə həlak olduğu tanınmır. Ermənilər elə bilir ki, Azərbaycanda da yəqin belə hallar var. Lakin Azərbaycanda bu qəbildən olan bir fakt belə yoxdur. Hökumət və xalq öz şəhidlərinə sayğı ilə yanaşır. Azərbaycan üçün şəhidlər müqəddəsdir, çünki onlar canlarını öz vətəninə qurban verib. Erməni əsgəri isə yad torpaqlarda işğalçı ordunun əsgəri kimi ölüb. Ona görə də ölən erməni əsgəri yalnız öz yaxınları üçün əzizdir. Cəmiyyət üçün onlar o qədər də əhəmiyyət kəsb etmir.
Bu gün erməni icması tarixdən bir etnik qrup olaraq silinmək istəmirlərsə, boş xəyallardan əl çəkib, reallıqla barışmalıdır. Əks təqdirdə həm erməni icmasının, həm də Ermənistanın gələcəyi sual altında qalacaq.
Akif NƏSİRLİ
