Paşinyan Azərbaycanla kiçik müharibə ssenarisi üzərində işləyir...
Qulamhüseyn Əlibəyli: "Paşinyan lokal xarakterli toqquşmalara gedə bilər"
Təhlillərə görə, dünyanın bəzi ölkələrinin – Fransanın, Yunanıstanın, Kiprin, Hindistanın Ermənistanı silahlandırması və bu ölkəni müharibəyə hazırlaması artıq təkzibolunmaz faktdır. Paşinyan indi Azərbaycanla kiçik müharibədə və yaxud da ki, sərhəd toqquşmalarında maraqlıdır.
Çünki Ermənistan seçkiyə gedir, Paşinyan da hakimiyyəti əldən vermək istəmir. Getdikcə ölkədə avtoritar rejim yaradır, əsas rəqiblərini həbslə hədələyir, hökumətdə kadrları dəyişir. Xüsusən də güc strukturlarında bu işlərin aparılmasına önəm verir.
Bütün bunlar o deməkdir ki, cəmiyyətə təzyiqləri artırmaq üçün repressiyaları gücləndirir ki, növbəti dəfə də hakimiyyətdə qala bilsin. Həmçinin xalqın içində də nüfuzdan düşdüyünə görə o, müəyyən bir sərhəd toqquşması, yaxud da ki, kiçik miqyaslı müharibəni Azərbaycanla törətməkdə maraqlıdır və buna hazırlaşır. Xaricdən silahların alınması da buna xidmət edir.
Maraqlıdır, Paşinyanın seçkiqabağı kiçik müharibə və ya kiçik sərhəd toqquşmaları ssenarisi ona nə qazandıra bilər? Onun seçki qələbəsini təmin edə bilərmi? Belə olacağı halda Paşinyan və Ermənistan bu ssenari ilə nə itirəcək?
"Ancaq bunun nəticələri onlar üçün ağır olacaq və hansısa dövlət gəlib Ermənistanın yerinə döyüşməyəcək"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəyli buna birmənalı yanaşmadı: "Ümumiyyətlə, Ermənistanın silahlandırılması, bu ölkə vasitəsilə Cənubi Qafqazda müəyyən təxribatların törədilməsi Qərbin maraq dairəsindədir. Xüsusən də Avropa İttifaqının əsas dövlətlərindən olan Fransanın maraq dairəsindədir. Onlar bu vasitə ilə bölgədə sabitliyin olmaması, hərbi gərginliyin saxlanılması görüntüsü yaratmaq istəyirlər. Məqsəd odur ki, Cənubi Qafqazdan Rusiyanı sıxışdırsınlar və regiona hakim olsunlar. Bu, eyni zamanda, Ermənistanın da maraqlarına uyğundur. Həm də iki mənada uyğundur. Bir tərəfdən onlar Qərb ölkələrindən, yəni öz himayadarlarından kömək gözləyirlər. Gözləyirlər ki, möhkəmlənsinlər və gələcəkdə revanş məqsədlərini həyata keçirsinlər. Digər tərəfdən qarşıdan seçki gəlir. O üzdən, bu seçkidə müəyyən maraqların ifadəsi bəzi qüvvələr üçün əhəmiyyət kəsb edir. Bu günlərdə Ermənistanda ABŞ-ın keçirdiyi rəy sorğusuna görə, əhalinin cəmi 2 faizi Azərbaycanla sülh müqaviləsinin imzalanmasına tərəfdardır. Böyük əksəriyyəti revanşist əhval-ruhiyyə ilə yaşayır. Bu isə onu göstərir ki, Ermənistan cəmiyyəti xəstədir. Onlar yenə də ümid edirlər ki, böyük dövlətlər onlara kömək edəcək və nəticədə öz məqsədlərinə çatacaqlar. Bu, xəstə erməni cəmiyyətinin mövqeyidir. Ermənistan hakimiyyəti bunu açıq ifadə etməsə də, onlar da əslində bu mövqedən çıxış edirlər. Ona görə də Paşinyan seçkiqabağı kütlənin əhvalına oynayan müəyyən addımlar atır. Onlardan biri də sərhəddə təxribatların törədilməsidir. Bununla göstərmək istəyirlər ki, guya sərhəddə sabitlik yoxdur. Bu yolla Paşinyan lokal xarakterli toqquşmalara gedə bilər. Ancaq bunun nəticələri onlar üçün ağır olacaq. Çünki Azərbaycan güclüdür və əvvəlki zəif dövlət deyil. Bu cür təxribatlar Ermənistanın başında çatlayacaq. Hansısa dövlət gəlib Ermənistanın yerinə döyüşməyəcək".
Vidadi ORDAHALLI
