İlyas Hüseynov: "Bu, Avropa İttifaqının siyasətinin ölkəmizə qarşı davamı kimi də anlaşılır"
Avropa İttifaqının (Aİ), kollektiv Qərbin Azərbaycana qarşı qərəzli siyasət yürütməsinin arxasında çirkin niyyətlərin dayandığı heç kəsə sirr deyil. Qərbin bir parçası, eyni zamanda da Aİ-nin və iri Qərb dövlətlərinin forpostu rolunda çıxış edən Polşa onların aləti olmaqda davam edir.
Aydındır ki, Polşa da Qərbin bir parçası olaraq son illər Azərbaycana qarşı qərəzli siyasət yürüdür. Polşa prezidentinin bu günlərdə Ermənistana səfər etməsi, gedib qondarma "genosid" abidəsinə baş əyməsi, bundan başqa Azərbaycan-Ermənistan sərhədində müşahidə aparması, orada özünü Ermənistanın yanında duran ölkə kimi göstərməsi, ölkəmizə düşmən münasibəti bəsləməsi təsadüfi deyil, bu, Qərbin antiazərbaycan siyasətinin təzahürlərindəndir. Yəni Polşa prezidentinin Azərbaycana qarşı mövqeyi həm də Avropa Birliyinin bizə qarşı apardığı siyasətin davamıdır.
Bu öz yerində. Eyni zamanda bura bəzi fikirlər də əlavə edirlər ki, Aİ münasibətindən qaynaqlanan mövqeyin müəyyən bir hissəsi də Belarus prezidenti A.Lukaşenkonun COP29 tədbirlərinə qatılması ilə bağlıdır. Yəni Polşa prezidentinin qərəzinin motivini həm anitiazərbaycan mövqeyi, həm də Lukaşenko amili təşki edə bilər. Lukaşenko amili də ona görə vurğulanır ki, yadınızdadırsa, Polşa prezidenti Belarus prezidentinin COP29-da iştirakından narazı idi, onun timsalında ifadə olunan narazılıq həm də Avropa İttifaqının narazılığı demək idi. Hətta Polşa prezidenti COP29-da ailə şəkli çəkdirməkdən imtina etdi ki, Lukaşenko ilə bir yerdə foto çəkdirmək istəmir. Təbii ki, Polşa və Belarus arasında ciddi problemlərin Azərbaycanla heç bir əlaqəsi yoxdur. Amma Polşa prezidenti öz havadarlarının yolunu davam etdirməkdən qalmayıb və ölkəmizə qarşı düşmən münasibətini açıq şəkildə büruzə verib. Ermənistana gedir, bizimlə sərhədə gəlir, öz aləmində Belarusla probleminin heyifini bizdən çıxmaq istəyir. Yəni "mənim düşmən olduğum ölkə ilə niyə dostluq edirsiniz, Qərbin düşməni niyə tədbirə dəvət edilib?" kimi uyğunsuz davranış sərgiləyir. Azərbaycanın düşməni ilə dostluq edir, yaxınlaşır.
Ehtimal edilir ki, Polşa prezidentinin sərgilədiyi son davranışlarda həm Avropa İttifaqının qərəzindən qaynaqlanan mövqe var, həm də motivlərdən biri Lukaşenkodur.
"Ermənistana səfəri çərçivəsində Polşa prezidentinin Azərbaycanla sərhədə gəlməsi və binoklla Azərbaycan sərhədinə baxması..."
Politoloq İlyas Hüseynov "Bakı-Xəbər"ə şərhində bildirdi ki, Polşa prezidenti Andjey Dudanın regiona səfəri kifayət qədər ciddi müzakirə olunur, hətta xarici mətbuatda da bu səfərə dair müəyyən məqamlara rast gəlirik. "Çünki hər zaman Şərqi Avropa və Baltikyanı ölkələrdən olan dövlət və hökumət başçılarının postsovet məkanına səfərləri gərginliklə yadda qalır, əsasən də daxili işlərə qarışmaq məzmunu daşıyır. Biz Gürcüstanda da oxşar hadisələri görmüşük. Ermənistana səfəri çərçivəsində Polşa prezidentinin Azərbaycanla sərhədə gəlməsi və binoklla Azərbaycan sərhədinə baxması, Avropa İttifaqının "mülki missiyasının" tərkibində polyakların sayının artırılmasına dair fikirlər Varşava və Bakı arasında olan münasibətlərə də toxunur. Bu, digər tərəfdən Avropa İttifaqının siyasətinin ölkəmizə qarşı davamı kimi də anlaşılır. Nəzərə almaq lazımdır ki, Polşa Azərbaycanın ərazi bütövlüyünü həmişə dəstəkləyən dövlət olub və bu xüsusda bizim strateji münasibətlərimiz vardır. Hazırda isə davranışları müəyyən mahiyyət daşıyır. Həmçinin hər zaman Polşa Rusiya və Belarusa qarşı bu mövqedən çıxış edib, bununla ABŞ-la münasibətlərini yaxınlaşdırmağa cəhd göstərib, Rusiya-Ukrayna müharibəsində bu aydın şəkildə özünü göstərməkdədir. Hətta Avropa ailəsində də Polşanın davranışlarını kifayət qədər adekvat anlamırdılar. Çünki Avropa da olan problemləri görməzdən gəlib, yalnız Vaşinqtonla münasibətləri yaxınlaşdırmaq məqsədləri dəfələrlə ifadə olunub. Bu baxımdan, bu səfər həm də qalmaqallı oldu. Digər tərəfdən, Azərbaycanın Xarici İşlər Nazirliyi bəyanatla çıxış etdi və Polşanın Azərbaycandakı səfiri XİN-ə dəvət olunaraq ona etiraz məktubu təqdim olundu. Bu mesajdır ki, Polşa öz davranışlarını korrektə etməli, yeni geopolitik reallıqlar çərçivəsində addm atmalıdır və regionda gərginliyin artırılması üçün element kimi, xırda bir aktor kimi çıxış etməməlidir" - deyə İ.Hüseynov qeyd etdi.
İradə SARIYEVA
