Elşad Musayev: "Putin İrəvana gəlib iclasa qatılsa, Ermənistana beynəlxalq təzyiqlər arta bilər"
"Ali Avrasiya İqtisadi Şurasının iclasının Ermənistanda keçirilməsini istəməyən iki tərəf var: Birincisi Ermənistandır". Bunu Ermənistan parlamentinin "Hayastsan" fraksiyasının deputatı Artur Xaçatryan deyib.
O, Ermənistanın Roma Əsasnaməsini ratifikasiya etdiyini və üzərinə düşəni yerinə yetirməyə borclu olduğunu vurğulayıb: "Xatırlatmaq istəyirəm ki, Vladimir Putin Monqolustana gedəndə Monqolustan böyük təzyiqlərə məruz qaldı, yəqin ki, Ermənistan hakimiyyəti belə təzyiqə məruz qalmaq istəməzdi. Amma istisna etmirəm ki, təşəbbüs şimaldan gəlib, yəni dedilər: siz təşəbbüs etmisiniz, onun altından çıxmalısınız, çünki yayda liderlər Aİİ-nin sessiyasına toplaşanda yer seçdilər".
Məsələ ondadır ki, Ermənistan hakimiyyəti Ali Avrasiya İqtisadi Şurasının növbəti iclasını İrəvanda deyil, Sankt-Peterburqda keçirəcək. Baxmayaraq ki, 2024-cü ildə Aİİ-yə Ermənistan sədrlik edir, amma ikinci dəfədir iclas İrəvanda keçirilmir. Paşinyan ehtiyat edir ki, İrəvanda tədbir keçirilsə Putin ora gəlməyəcək. Yox, əgər gəlsə, o zaman Ermənistan Beynəlxalq Cinayət Məhkəməsinin Roma Statutunu ratifikasiya etdiyi üçün Putini həbs etməlidir. Çünki BCM 2023-cü il martın 17-də Putinin həbsinə order verib. Ona görə də bütün bunlardan yayınmaq üçün Paşinyan tədbirin Sankt-Peterburqda keçirilməsi xahiş edib. Bu yolla özünü sığortalamaq istəyir. Çünki yaxşı bilirlər ki, Putini İrəvanda həbs etməyə cəsarətləri çatmayacaq.
"Bütün bunlardan sığortalanmaq üçün Paşinyan iclasın Sankt-Peterburqda keçirilməsini istəyir"
Sözügedən məsələni "Bakı-Xəbər"ə şərh edən Böyük Azərbaycan Partiyasının sədri, millət vəkili Elşad Musayev buna bir neçə aspektdən yanaşdı: "Məlum olduğu kimi, bu il dekabrın 25-də Sankt-Peterburqda Ali Avrasiya İqtisadi Şurasının iclası keçiriləcək. Bu il ərzində quruma Ermənistan sədrlik edir. Məntiqlə, iclas İrəvanda keçirilməlidir. Çünki növbəlilik əsasında Ermənistan Şuraya sədrlik edir, amma çox qəribədir ki, iclas İrəvanda deyil, Sankt-Peterburqda keçiriləcək. Verilən məlumat da ondan ibarətdir ki, iclasın Sankt-Peterburqda keçirilmə təklifini Ermənistan verib. Paşinyan hakimiyyəti də buna getməyə bilməzdi. Çünki Ermənistan Beynəlxalq Cinayət Məhkəməsinin Roma Statutunu ratifikasiya edib. Bu isə o deməkdir ki, Ermənistan Roma Statutundan irəli gələn öhdəlikləri yerinə yetirməlidir. Yəni Putin Ali Şuranın iclasına gələcəyi halda İrəvanda həbs edilməlidir. Ancaq biz burada növbəti bir erməni hiləgərliyinin şahidi oluruq. Çünki Putin İrəvana gəlib iclasa qatılsa, Ermənistana beynəlxalq təzyiqlər arta bilər. Bütün bunlardan sığortalanmaq üçün Paşinyan iclasın Sankt-Peterburqda keçirilməsini istəyir. Ancaq hesab edirəm ki, Putin İrəvana gəlsəydi belə, Ermənistana güclü təzyiq olmayacaqdı. Çünki Ermənistana münasibətdə böyük dövlətlərin ikili standartlardan çıxış edərək riyakar mövqe sərgiləməsi göz qabağındadır. Onlar yaxşı bilirlər ki, Putinin İrəvana gəlməməsi üçün görüşün Sankt-Peterburqda keçirilməsini təşkil edən Paşinyandır. Nikola təzyiq etmək istəsələr o saat bir sıra vasitələri hərəkətə gətirərlər. Açıq deyəcəklər ki, Paşinyan öhdəliklərdən yayınmaq üçün iclası İrəvanda keçirmək istəmir. Ancaq bunu etmirlər. Niyə? Çünki Ermənistana təzyiq göstərməkdə maraqlı deyillər. Necə ki, Rusiya bütün sanksiya altında olan məhsulları Ermənistan üzərindən alır, ancaq Qərb bütün bunları görməzdən gəlir. Bax, budur onların riyakarlığı".
Vidadi ORDAHALLI
