Aprelin 23-də Azərbaycan Laçın-Xankəndi yolunun başlanğıcında Ermənistanla sərhəddə nəzarət-buraxılış məntəqəsini qurandan sonra Xankəndi şəhərində yaşayan erməni sakinlər evlərini kütləvi şəkildə satışa çıxarırlar.
Ermənilərə məxsus əmlak satışı saytlarına baxsaq görərik ki, hazırda Xankəndi və ətrafında yerləşən yüzlərlə əmlak - mənzil, ev, müxtəlif kommersiya obyektləri və torpaq sahələri təcili satılır. Özü də maraqlıdır ki, evlərin satış qiyməti fantastik dərəcədə şişirdilib. Təxmini hesablamalara görə, Xankəndidə normal şəraitli bir evin qiyməti 60-100 min dollar arasında dəyişir. Satış elanlarına nəzər yetirəndə görmək olar ki, əksəriyyəti “təcili”, “razılaşma mümkündür” başlığı ilə qeyd olunub. Xankəndidəki evlər və mənzillər əksərən içindəki əşya və avadanlıqlarla birgə satışa çıxarılıb. Belə elanlar son dörd gün ərzində daha da artıb.
Maraqlıdır, Xankəndidə doğrudan da evlər belə təcili satışa çıxarılırsa, o zaman qiymətlər niyə belə bahadır? Adətən təcrübədə təcili satışa çıxarılan daşınmaz əmlakın qiyməti ucuz olur. Ermənilər isə həm təcili elanlar verir, həm də evlərin qiymətini baha təqdim edirlər. Xankəndi erməniləri evləri belə baha qiymətə kimlərə satmaq istəyirlər? Kimlər həmin evləri almağa maraq göstərə bilər? Təbii ki, azərbaycanlılar belə baha qiymətə orada ev almaq istəməz. Belə olan halda ermənilər kimə stavka edib evləri bu cür baha satmaq istəyirlər?
“Ermənilərin Qarabağda sayı çox az olduğu üçün onların məkrli planları baş tutmayacaq”
Sözügedən məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, bu cür satış kampaniyasında ermənilərin bir sıra hiyləgər məqsədləri ola bilər: “Əvvəla, ermənilərin nəfəsi belə yalan və hiylədir. Ona görə də burada bir erməni hiyləsi var. Prinsipcə, Azərbaycan qanunlarını qəbul etməyən ermənilər evlərini dəyər-dəyməzə satıb çıxıb getməlidilər. Ancaq biz fərqli mənzərənin şahidi oluruq. Ona görə də tələsmək və hadisələri qabaqlamaq lazım deyil. Ermənilər bununla görüntü yaradırlar ki, guya Azərbaycan onları sıxışdırdığı üçün bu addımı atmaq məcburiyyətində qalıblar. Bununla beynəlxalq ictimaiyyətdə belə görüntü yaradırlar ki, guya Azərbaycan erməniləri sıxma-boğmaya saldığı üçün onlar bu addımı atırlar. Başqa bir tərəfdən, bu, Rusiyanın məkrli oyunu da ola bilər. Yəni Xankəndidə evləri Rusiya vətəndaşları almaqla orada rus nüfuzunu məskunlaşdırmaq niyyəti ola bilər. Biz Rusiya tərəfindən istənilən addımları gözləyə bilərik. Məsələ ondadır ki, Rusiya buraya caynağını salıb, Qarabağdan çıxmaq istəmir. Rusiya Qarabağdan ermənilərin köçməməsi üçün nə mümkündürsə edir. Bütün vasitələrlə çalışır ki, ermənilər Qarabağı tərk etməsin. Zaman-zaman Qarabağ ermənilərinə Rusiya vətəndaşlığının verilməsi gündəmə gəlir. O baxımdan mənzillərin satılmasının arxasında Rusiyanın dayanması ehtimalı var. Ancaq nə etsələr də onların planları baş tutmayacaq. Ona görə ki, Qarabağda ermənilərin sayı çox azdır. Üstəlik, orda olanların çoxu yaşlıdır. Qarabağda ermənilərin sayı bir neçə yüz min olsaydı, o zaman bu, müəyyən problemlər yarada bilərdi. Ermənilərin Qarabağda sayı çox az olduğu üçün onların məkrli planları baş tutmayacaq”.
Vidadi ORDAHALLI
