Məhəmməd Əsədullazadə: “Türkiyənin belə konkret mövqe sərgiləməsi Azərbaycana böyük dəstəkdir”
Tovuzda baş verən son döyüşlər fonunda Türkiyənin mövqeyi daha konkret və qəti şəkil aldı. Hətta bu ölkə rəsmiləri bir sıra bəyanatlar verdilər ki, Azərbaycanın ərazi bütövlüyünü bütün vasitələrlə qoruyacağıq.
Əvvəllər deyilirdi ki, ərazi bütövlüyünü dəstəkləyirik, amma son açıqlamalarda ortada qoruyacayıq ifadəsi var. Özü də bütün vasitələrlə. Məsələn, Türkiyə Xarici İşlər Nazirliyi Ermənistan silahlı qüvvələrinin bölmələrinin Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə hücuma keçməyə cəhd göstərməsi ilə bağlı yaydığı açıqlamada qeyd olunur ki, Türkiyə ərazi bütövlüyünü qorumaq mübarizəsində bütün imkanları ilə Azərbaycanın yanında yer almaqda davam edəcək. Digər tərəfdən, Türkiyənin Milli Müdafiə naziri Hulusi Akar deyib ki, Dağlıq Qarabağı qanunsuz işğal edən və illərdir təcavüzkar davranış həyata keçirən Ermənistana qarşı Azərbaycan Silahlı Qüvvələrinin yanında dayanmağa, "bir millət, iki dövlət" olaraq qəbul etdiyimiz azərbaycanlı qardaşlarımızı var gücümüzlə dəstəkləməkdə davam edəcəyik. Türkiyə prezidenti Rəcəb Tayyib Ərdoğan isə işğalçı Ermənistanın Tovuz istiqamətində törətdiyi təxribatdan danışarkən deyib ki, bütün imkanlarımızla qardaş Azərbaycanın yanında olmağa davam edəcəyik:“Türkiyə bundan sonra da Azərbaycana edilən hücumların qarşısında yer alacaq. Türkiyə qədim dostluq bağları və qardaşlıq münasibətlərinin olduğu Azərbaycanın haqqına, hüququna və torpaqlarına yönəlik hər cür hücumun qarşısında yer almaqda əsla tərəddüd etməyəcək”.
Sözügedən məsələdə Türkiyənin daha konkret mövqedən çıxış etməsi nə deməkdir və Azərbaycan üçün əhəmiyyəti nədən ibarətdir?
- “Qardaş ölkə bununla, 1918-ci ildə olduğu kimi, indi də bizə öz ordusu ilə kömək etməyə hazır olduğunu elan etdi”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bır sıra məqamlara toxundu:“Ermənistanın ölkəmizə qarşı təxribatları fonunda bizə tam dəstək qardaş Türkiyədən gəldi. Türkiyə prezidenti, müdafiə naziri və digər rəsmilər, həmçinin müxalifət partiyaları ortaq mövqedən çıxış etdilər. Türkiyənin belə konkret mövqe sərgiləməsi Azərbaycana böyük dəstəkdir. Türkiyə bununla, 1918-ci ildə olduğu kimi, indi də bizə öz ordusu ilə kömək etməyə hazır olduğunu elan etdi. Hesab edirəm ki,1-ci Qarabağ müharibəsində əvvəlki Türkiyə hakimiyyəti bizə tam dəstək versəydi, bugünkü mənzərə yaranmazdı. Ancaq indi praqmatik siyasətçi olan Rəcəb Tayyib Ərdoğan Türkiyəni regional gücə çevirib və bizə dəstək tam real əsaslara söykənir. Hesab edirəm ki, bu gündən Türkiyə ilə Azərbaycan arasında bağlar daha da möhkəmləndi. Artıq bilirik ki, şanlı Türk ordusu bizi daha böyük dövlətlərdən qorumaq gücündədir. Bununla Türkiyə açıq şəkildə bizi müdafiə edəcəyini sübut etdi. Əlbəttə ki, Azərbaycan Ermənistanı tam məhv etməyə hazırdı. Ordumuzun vurduğu zərbə bunun əyani göstəricisidir. Ancaq buna rəğmən, Türkiyənin dəstəyi də vacibdir”.
Türkiyənin Azərbaycanın yanında olması onu deməyə əsas verir ki, ölkəmizin arxasında böyük dayaq var.
Vidadi ORDAHALLI
