Azərbaycanda idxal olunan minik avtomobilləri, istirahət və ya idman üçün yaxtalar və bu məqsədlər üçün nəzərdə tutulan digər üzən vasitələr üzrə aksiz dərəcələrinin artırılması təklif edilir. Bu təklif Milli Məclisin İqtisadi siyasət komitəsinin iclasında müzakirə olunan "Vergi Məcəlləsində dəyişikliklər edilməsi haqqında" qanun layihəsində əks olunub.
Dəyişikliklərə əsasən, ölkəyə idxal olunan minik avtomobillərində mühərrikin həcmi 2000 kub sm-dək olduqda aksiz dərəcəsi mühərrikin həcminin hər kub sm-ə görə 0,15 manatdan 0,20 manata qədər artırılacaq. Mühərrikin həcmi 3000 kub sm-ə qədər olduqda indi 300 manat və əlavə olaraq mühərrikin həcminin 2001-3000 kub sm hissəsi üçün hər kub sm-ə görə 1 manat aksiz dərəcəsi tətbiq olunursa, dəyişiklik qəbul olunduqdan sonra belə avtomobillər üçün 400 manat və əlavə olaraq 2001-3000 kub sm hissəsi üçün hər kub sm-ə görə 1,5 manat aksiz dərəcəsi ödəniləcək. Bundan başqa, hazırda mühərrikin həcmi 4000 kub sm-dək olduqda aksiz dərəcəsi 1300 manat və əlavə olaraq 3001-4000 kub sm hissəsi üçün hər kub sm-ə görə 2 manat təşkil edirsə, qanun layihəsi təsdiqlənəndən sonra aksiz dərəcəsi müvafiq olaraq 1900 manat və əlavə olaraq 3001-4000 kub sm hissəsi üçün hər kub sm-ə görə 4 manat olacaq.
Maraqlıdır, ekspertlər dəyişikliklərə necə yanaşır?
Məsələyə münasibət bildirən Əli Əlirzayev buna, prinsipcə, müsbət yanaşdı: "Dövlətin mənafeyi tələb edirsə, niyə də aksiz vergilər artırılmasın?! İmkanlı olan şəxslər onsuz da bahalı maşınlar, yaxtalar alır. Nəzərə almaq lazımdır ki, bahalı məhsulun vergisi çox olur. Əslində bu siyasət bütün dövlətlərdə var. Digər tərəfdən, büdcəni doldurmaq və neft gəlirlərindən asılılığı minimuma endirmək baxımından buna müsbət baxıram. Bu minvalla yerli istehsalı və yerli məhsullara olan marağı artırmaq da olar. Ancaq, istənilən halda, xaricdən idxal olunan məhsullara tətbiq olunan vergi müəyyən limit həddində olmalıdır. Ondan yuxarı olmamalıdır".
