Azərbaycan Mərkəzi Bankının ölkənin kommersiya banklarına nizamnamə kapitallarını 50 milyon manata çatdırmaqla bağlı verdiyi vaxt başa çatır. Ancaq ölkədəki banklardan bəziləri hələ də bu tələbi yerinə yetirə bilməyib.
Belə davam etsə, həmin banklar ya digər bir banka birləşməli, ya da fəaliyyətini dayandırmalı olacaq.
Artıq bəzi xəbər portallarında nizamnamə kapitalanı toplaya bilməyən 7 bankın adı açıqlanıb. Həmin banklar bunlardır: 1. "Azərbaycan Kredit Bankı" - 5,8 milyon manat;
2. "Eurobank" - 7,5 milyon manat;
3. Pakistan Milli Bankının Bakı filialı - 10,2 milyon manat;
4. "Yunayted Kredit Bank" - 37,3 milyon manat;
5. İran Milli Bankının Bakı filialı - 39 milyon manat;
6. "Naxçıvanbank" - 42 milyon manat;
7. "Azər-Türk Bank" - 44 milyon manat.
Hazırda bank əmanətçiləri bankların bağlanma təhlükəsi xəbəri yayılandan sonra narahatlıq hissi keçirir.
İqtisadçı - ekspert Rəşad Həsənovun fikrincə, 30 min manatdan aşağı olan əmanətlərin qaytarılması ilə bağlı problem olmayacaq: "Bəzi məlumatlara görə, təxminən 8-10 bankın ilin sonuna qədər vaxtı var ki, kapitallarını artıraraq tələb olunan 50 milyon manat civarına çatdırsınlar. Bu bankların adını açıqlamaq düzgün olmazdı. Çünki bu, insanlar arasında təşvişə səbəb ola bilər. Bunu Mərkəzi Bank özü açıqlasa daha yaxşı olar. Çox güman ki, bu bankların bəziləri digər banklara birləşdirilə, bəziləri isə bağlana bilər. Əmanətlərə gəldikdə isə, qanunvericiliyə görə, 30 min manata qədər olan əmanətlər Sığorta Fondu tərəfindən sığortalanıb. Bu əmanətçilər üçün heç bir təhlükə yoxdur. Pulların geri qaytarılmasında heç bir problem olmayacaq. Əsas problem yüksək məbləğdə olan əmanətlərlə bağlıdır. Bir çox kiçik banklar daha çox əmanətçi cəlb etmək üçün digər banklara nisbətən daha yüksək faiz təklif edirdilər və insanlar da bu qanunlardan xəbəri olmadan müqavilələri oxumadan imzalayaraq həmin banklara 30 min manatdan yuxarı məbləğdə vəsait qoyurdular. Gələcəkdə bu banklar bağlanarsa, vəsaitlərin qaytarılması ilə bağlı ciddi problem yaşana bilər".
