Azərbaycan Respublikasının Prezidenti İlham Əliyev "Azərbaycan Respublikasında sənayenin inkişafına dair 2015-2020-ci illər üçün Dövlət Proqramı"nın təsdiq edilməsi haqqında Sərəncam imzalayıb.
"2014-cü ilin Azərbaycan Respublikasında "Sənaye ili" elan edilməsi haqqında" Azərbaycan Respublikası Prezidentinin 2014-cü il 10 yanvar tarixli, 212 nömrəli Sərəncamına uyğun olaraq və Azərbaycan Respublikası Konstitusiyasının 109-cu maddəsinin 3-cü bəndini rəhbər tutaraq qərara alıram:
1. "Azərbaycan Respublikasında sənayenin inkişafına dair 2015-2020-ci illər üçün Dövlət Proqramı" təsdiq edilsin.
2. Azərbaycan Respublikasının Nazirlər Kabineti:
2.1. aidiyyəti mərkəzi və yerli icra hakimiyyəti orqanları ilə birlikdə Dövlət Proqramının icrasını təmin edən zəruri tədbirlər görsün;
2.2. bu Sərəncamdan irəli gələn digər məsələləri həll etsin.
3. Azərbaycan Respublikasının İqtisadiyyat və Sənaye Nazirliyi Dövlət Proqramında nəzərdə tutulan tədbirlərin həyata keçirilməsini əlaqələndirsin və Proqramın icrasının gedişi barədə ildə bir dəfə Azərbaycan Respublikasının Prezidentinə məlumat versin".
Dünya bazarında neftin qiymətinin oynadığı bir dövrdə Azərbaycan iqtisadiyyatının çoxşaxəli sahələr üzrə inkişafında sözügedən proqram nə kimi mühüm rol oynaya bilər? Xüsusən də iqtisadiyyatda qeyri-neft sektorunun çəkisinin artırılması baxımından bunun nə kimi əhəmiyyəti var?
Məsələyə münasibət bildirən iqtisadçı alim Əli Əlirzayev bunu müsbət dəyərləndirdi: "Məsələ ondadır ki, Azərbaycanda sənayenin hərtərəfli inkişaf etdirilməsi ilə bağlı görüləsi çoxsaylı işlər var. Bizdə bir sıra sahələrdə sənayenin inkişafı arzuolunan səviyyədə deyil. O baxımdan yeni proqram bu sahələrdə inkişafa təkan verəcək. Başqa sahələrə nisbtən emal, kənd təsərrüfatının emalı, maşınqayırma, yüngül sənaye zəif inkişaf edib. Sadalanan sahələrin kompleks inkişaf etdirilməsinə ehtiyac var. Bu sahələrin inkişafı yeni iş yerlərinin açılmasına, bununla bağlı olan xidmət sahələrinin inkişafına təsir göstərəcək. Onu da qeyd edim ki, bunun üçün bölgələrdə kifayət qədər potensial var. Ona görə də sənaye ilə bağlı yeni inkişaf proqramının qəbul olunmasını müsbət dəyərləndirirəm".
