Azərbaycanda əlilliyi olan şəxsləri və 15 yaşı tamam olmuş sağlamlıq imkanları məhdud uşaqları işlə təmin edən işəgötürənlərə vergi və sığorta güzəştlərinin edilməsi nəzərdə tutulur. Bu barədə mətbuata Əmək və Əhalinin Sosial Müdafiəsi Nazirliyindən bildirilib. Bu məsələ 2014-2018-ci illəri əhatə edən "Əlilliyi olan şəxslərin hüquqlarının müdafiəsinə dair Milli Fəaliyyət Proqramı" layihəsinə daxil edilib. Layihəyə əsasən, əlilliyi olan şəxslərin və 15 yaşı tamam olmuş sağlamlıq imkanları məhdud uşaqların məşğulluğunun təmin edilməsi məqsədilə işəgötürənlərə vergi və sığorta güzəştlərinin müəyyən olunması barədə təkliflər hazırlanacaq.
Bununla yanaşı, müəssisələrdə əlilliyi olan şəxslər və 15 yaşı tamam olmuş sağlamlıq imkanları məhdud uşaqlar üçün qanunvericiliklə müəyyən olunmuş kvotaya əməl edilməsinə nəzarət gücləndiriləcək. Bu kateqoriyadan olan insanların əhali üçün nəzərdə tutulan əmək yarmarkalarında iştirakları təmin olunacaq. Lazım gəldikdə onlar üçün ixtisaslaşmış əmək yarmarkaları da keçiriləcək.
Maraqlıdır, ümumilikdə bu kimi yeniliklər əlillərin işlə təminatında nə kimi praktiki fayda verə bilər?
İqtisadçı-ekspert Rövşən Ağayev hesab edir ki, hazırda Azərbaycanda bir çox sahibkar əlil olanları işə götürməkdə o qədər də maraqlı deyil: "Bu kimi durum, nəticə etibarilə, əlil olanların həm maddi, həm də psixoloji durumuna mənfi təsir göstərir. Azərbaycan əlillik səviyyəsinə görə MDB-də üçüncü yerdədir. Ölkənin dövlət qanunvericiliyində, qoşulduğu beynəlxalq konvensiyalarda göstərilir ki, dövlət işləmək qabiliyyəti olmayan, fiziki cəhətdən qüsurlu vətəndaşının da yaşamını təmin etməlidir. Ancaq əlil insanlara diqqət, qayğı göstərmək vacib olduğu qədər də hər birimizin vətəndaşlıq borcudur. Əlil insanların cəmiyyətə inteqrasiyasını təmin etmək, onların mövcud komplekslərindən qurtulmasına nail olmaq, eyni zamanda, problemlərini həll etmək sağlam insanların qarşısında duran ən mühüm məsələlərdən biridir. Əslində əlillər haqqında olan qanun da bunu tələb edir. Qanunvericiliyə görə, dövlət müəssisələrində hər 50 işçidən biri güzəştli kateqoriyanın nümayəndələri, o cümlədən əlillər olmalıdır. Əslində əlillərin üzləşdiyi əsas probemlərdən biri də elə budur. Əlillərin işlə təmin olunması sadəcə dövlət idarələrinin deyil, özəl şirkətlərin də ən mühüm vəzifəsi olmalıdır".
