Azərbaycanın "hücum diplomatiyası"nı türk dünyasında "hücum mediası" formasında niyə də davam etdirməyək?!

Tarix: 24.11.2014 / 01:26
Bölmə: Gündəm

Məlum olduğu kimi, bu il noyabrın 15-dən 17-dək Kuzey Kıprıs Türk Cumhuriyyətinin gözəl dəniz şəhəri olan Girnedə Türkdilli Ölkələrin və Toplumların 4-cü Forumu keçirilib. Bundan əvvəlki forumlar 2010-cu ildə Ankarada, 2012-ci ildə Bakıda, 2013-cü ildə Qırğızıstanın paytaxtı Bişkekdə keçirilib. Ümumi razılaşmaya görə, hər il keçirilməli olan Media Forumu növbə ilə türkdilli dövlətlərdən birində keçirilir.
4-cü Forumda Azərbaycanın media təmsilçiləri də iştirak ediblər. Ümumiyyətlə forumun yaradılmasında Azərbaycan Mətbuat Şurası və Prezident yanında KİV-in İnkişafına Dövlət Dəstəyi Fondunun, şəxsən Vüqar Səfərli və Əflatun Amaşovun xüsusi fəaliyyətləri olub. 4-cü Forumda Azərbaycanı Əflatun Amaşov, Vüqar Səfərli, "Bakı-Xəbər" qəzetinin baş redaktoru Aydın Quliyev, "Xalq cəbhəsi" qəzetinin baş redaktoru Elçin Mirzəbəyli, "Yeni Azərbaycan" qəzetinin baş redaktoru Hikmət Babaoğlu, "Zaqatala" qəzetinin baş redaktoru İbrahim İbrahimov, MTRŞ sədri Nuşirəvan Məhərrəmli, Sevil Yusifova təmsil ediblər. Panel iclaslarının birinə Əflatun Amaşov sədrlik edib, "Yeni Azərbaycan" qəzetinin baş redaktoru Hikmət Babaoğlu "Dağlıq Qarabağ problemi türkdilli ölkələrin mətbuatında" mövzusunda məruzə edib. Panel müzakirələrində Elçin Mirzəbəyli, Aydın Quliyev müxtəlif məsələlər ətrafında müzakirələrdə fəallıq göstərərək təkliflər veriblər.
Forumda "Bakı-Xəbər" qəzetinin baş redaktoru Aydın Quliyev uydurma "erməni genosid"i ilə mübarizəyə türkdilli medianın səfərbər olunması mövzusunda çıxış edib. Aydın Quliyevin çıxışının mətnini oxuculara təqdim edirik:

"Sayqıdəyər oturum başqanı! Dəyərli dost həmkarlar, qan qardaşlarım!
Sizinlə birlikdə türk dünyasının 30-a yaxın dövlət və toplumlarının təmsilçilərinin iştirakı ilə 4-cü forumun işinə qatılmaqdan və tarixi qərarların qəbulunun iştirakçısı olmaqdan məmnunam. Artıq üçüncü dəfədir ki, belə foruma qatılıram. 2012-ci ildə Bakı, 2013-cü ildə Bişkek forumlarında iştirak etmişəm. Mənimlə həmfikir olacağınıza əmin olduğum üçün onu da demək istəyirəm ki, Aralıq dənizinin bu mirvari adasında böyük fədakarlıq nümunəsi göstərərək möhkəm dövlətçilik quruluşu yaratmış kiprli qardaşlarımızın 31 illik müstəqillik şənliklərinin də iştirakçısıyıq. İnşallah, Kuzey Kıprısın dövlət müstəqilliyinin 50, 100 illik yubileylərini də bax beləcə yaşayacaq, bizim Media Forum prosesində də bununla yanaşı addımlayacağıq.
Türkdilli ölkələrin media inteqrasiya prosesinin mühüm hədəflərindən biri türk dünyasının mövcud problemlərini öz mediamızın diqqətində saxlamaq, düzgün rəy yaratmaq, düşmənlərimizə bizim problemlərimizi, tariximizi, mədəniyyətimizi saxtalaşdırmaq, dəyişdirmək imkanı verməməkdir. Düşünürəm ki, bu çox böyük və tarixi əhəmiyyətli hədəfdir. Nəzərə alaq ki, əvvəla bu gün türk dünyasının bir neçə probleminə dünya miqyasında ikili standartla yanaşmalar var, həmçinin türk dünyasının tarixini düşməncəsinə saxtalaşdırmaq üçün çox güclü ideoloji təxribat mərkəzləri fəaliyyət göstərir. Deməli, bizlər bir olsaq ikili standartın daşıyıcılarına və saxtakarlara tutarlı zərbələr vura bilərik. Məsələn, baxın, bu gün Azərbaycanın üzləşdiyi Dağlıq Qarabağ probleminə ikili standartla yanaşmalar artıq həddini aşıb, BMT TŞ-nin 4 qətnaməsi yerinə yetirilmir, Ermənistanın açıq təcavüzünə hüquqi-siyasi qiymət verilmir, tərəflərin məsuliyyətini bərabərləşdirməklə münaqişəni həll etmək kimi mənasız yol tutulur. Azərbaycan türklərinin haqqı tapdanır. Bu gün Azərbaycanın etnik-dini kontekstdə multikultural və tolerant dövlət olduğunu nəzərə alsaq, sizi də inandırmaq istəyirəm ki, Dağlıq Qarabağ problemi kontekstində təkcə Azərbaycan türklərinin yox, Azərbaycanda yaşayan onlarla digər millətin də haqqı pozulur. Çünki onlar da Azərbaycanın ərazi bütövlüyünün təmin olunması kimi haqq mübarizəmizdə bir o qədər maraqlıdırlar. Mən eyni sözləri Qaqauz türklərinin, Kipr türklərinin, İraq türkmənlərinin, Bosniya, Trakiya türklərinin haqq-hüququnun pozulmasına da aid etmək istəyirəm. Türk dünyasının - Azərbaycanın, Türkiyənin, Qazaxıstanın, Qırğızıstanın, Kıprısın və s. mediası bu dərdlərimizin ətrafında möhkəm milli və peşə həmrəyliyi göstərməlidir.
Əlbəttə, başa düşürük ki, bu gün özünün tam müstəqil dövlət quruluşları olmayan türkdilli toplumlardan - uyğurlardan, yakutiyalılardan, başqırdlardan, kalmıklardan, tatarlardan çox şey tələb etmək real olmazdı.
Ancaq Türkiyə, Azərbaycan, Kıprıs və Orta Asiyanın müstəqil türk dövlətlərinin görə biləcəyi xeyli işlər var.
Bilirsiniz ki, gələn il aprelin 24-də Ermənistan və erməni lobbisi "erməni genosidi" deyilən tam uydurma bir hadisənin yüz illiyinə hazırlaşır. Biz bilməliyik ki, onların hədəfi tək qardaş Türkiyə Cumhuriyyəti deyil, bütünlüklə türk dünyasıdır. Çünki Ermənistan Anadolu, Azərbaycan, tatar, qırğız, qaqauz türkü olub-olmamasından asılı olmayaraq, bizim hamımıza düşmən kimi baxır, hər düşən fürsətdə bizdən qisas almaq istəyir, təəssüf ki, bir çox hallarda buna nail də olur. Onlar guya yüz il əvvəl baş vermiş qondarma "genosid"i dünyada tanıtdıra bilsələr, bunun Anadolu türkünə, Azərbaycan türkünə, Kıprıs türkünə, qazax, türkmən, qırğız və s. türkünə dəhşətli ziyanı dəyəcək. Birimiz bu dəhşətli ziyanı elə həmin anda yaşayacaq, birimiz beş-on il sonra yaşayacaq, sonda bütün türk dünyası yaşayacaq.

Bəs nə etməliyik? Azərbaycanın dövlət başçısı artıq bir neçə ildir ki, Ermənistanın və erməni lobbisinin təcavüzkar siyasəti əleyhinə "hücum diplomatiyası", "saldırı diplomatiyası" elan edib. Sizə deyim ki, Azərbaycan diplomatiyasının bu taktikasının uğurları heç də az deyil. Belədə niyə bizlər media təmsilçiləri olaraq 2015-ci ili erməni diplomatiyasına, erməni mediasına, erməni təcavüzkarlığına qarşı türk dünyasının birgə "hücum mediası", "saldırı mediası" ili elan etməyək?! Bu çox da ağır iş deyil. Yetər ki, hər birimiz çalışdığımız qəzetdə, televiziyada, saytda, sosial şəbəkədə, qatıldığımız bütün beynəlxalq və daxili tədbirlərdə tarixdə heç bir "erməni genosidi"nin olmadığını, bunun qlobal bir erməni uydurması olduğunu ucadan deyək və hamını buna inandırmağa çalışaq. Sizə absurd gəlmirmi ki, ermənilər 1915-ci ilin aprelində Anadoluda guya milyon yarım erməninin qətlə yetirildiyini iddia edirlər? Məgər ötən əsrin əvvəllərində Anadoluda milyon yarım erməni yaşaya bilərdimi? Nəzərə alsaq ki, onlar üçün çox əlverişli olan 70 illik sovet quruluşu dönəmində dünyanın hər yerindən, hər küçədən, hər ölkədən qarşılarına çıxan hər ermənini istənilən vasitələrlə şirnikləndirərək Ermənistana yığmaqla öz əhalilərinin sayını zor-bəla ilə iki milyon yarıma çatdırda bilmişdilər. Bu bir daha göstərir ki, ötən əsrin əvvəlində Anadoluda milyon yarım erməninin nəinki qətliamı, heç yaşaması belə absurddur.
Dəyərli dostlar, inanıram ki, çağırışıma ciddi dəyər verəcəksiniz və bizlər uydurma "erməni genosidi"nin yüz illiyini tanıtdırmaq səylərinin iflasa uğradılmasında bütün türk dünyası üçün tarixi əhəmiyyətli işlər görəcəyik.
Təşəkkür edirəm!"
Kuzey Kıprıs Türk Cumhuriyyəti, 15-17 noyabr 2014-cü il, Girne şəhəri.

DİGƏR XƏBƏRLƏR

Tarix: 08.11.2026 / 07:38

Dövlət Komitəsi və Metropolitendən maraqlı Zəfər Günü aksiyası - “Zəfər arzuları”

Tarix: 08.11.2026 / 07:32

Azərbaycanın Zəfər bayramı Bratislavada qeyd olundu

Tarix: 08.11.2026 / 07:15

CNN Türk Bakıdan dünyaya ZƏFƏR mesajı verdi

Tarix: 07.11.2026 / 10:16

İğdırda Azərbaycanın Zəfər Günü qeyd olunub

Tarix: 07.11.2026 / 09:26

“Dəmir Yumruqdan Zəfərin Səsinə” adlı rəsm sərgisi keçirilib

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 05.11.2026 / 21:49

Banklarda 4.6 milyard manat pul yatıb qalıb, kredit bazarında böhrandır... Bu necə olub?...

Tarix: 05.11.2026 / 20:15

Avropa Ermənistanı Rusiyanın əlindən alır - Kreml qəzəb püskürür...

Tarix: 05.11.2026 / 17:34

İran Trampsayağı ad iddiasına başladı - "Xəzər" yox, "Kaspian"?..

İşğaldan azad rayonlarımızda insan faktoru həlledicidir - Məskunlaşmanın əsas istiqamətləri...